Кіраўнік БФСЛ Марусаў аб адхіленні: «Калі раней мы ўдзельнічалі ў трох-чатырох міжнародных турнірах за сезон, то зараз такіх – шэсць. З расіянамi канкурэнцыя наймацнейшая»
Кіраўнік Беларускай федэрацыі стральбы з лука Мікалай Марусаў падзяліўся меркаваннем аб удзеле ў спаборніцтвах з расіянамі.
Нагадаем, што многія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага працягваецца Расіяй ва Украіне з выкарыстаннем тэрыторыі Беларусі.
– У сувязі з рашэннем МОКа адхіліць беларусаў і расіян ад міжнародных стартаў супрацоўніцтва з калегамі з суседняй краіны выйшла на новы ўзровень.
Праводзім сумесныя спаборніцтвы і зборы. У Арол, дзе праходзілі некалькі турніраў, адправіліся 28 лучнікаў з Беларусі. Мы прынялі ўдзел у Кубку Расіі і міжнародных спаборніцтвах "Руская зіма" і выступілі паспяхова.
– Па якой формуле праходзіў Кубак суседняй краіны? Бо замежнікаў да ўнутрырасійскіх спаборніцтваў звычайна не дапускаюць.
– Арганізатары выйшлі са становішча наступным чынам. Пасля агульнага папярэдняга этапа вызначыліся ўдзельнікі двух фіналаў.
Адзін праходзіў з удзелам беларусаў, расіян і казахстанцаў. У другім удзельнічалі толькі прадстаўнікі нашых усходніх суседзяў. Усё прайшло дакладна і без эксцэсаў.
– Ёсць меркаванне, што без удзелу ў міжнародных спаборніцтвах, дзе выступаюць сусветныя зоркі, узровень беларускіх стралкоў з лука не падняць. Як лічыце?
– Сапраўды даводзілася чуць такія размовы. Але факты, як гаворыцца, – рэч упартая. Калі раней мы ўдзельнічалі ў трох-чатырох міжнародных турнірах за сезон, то зараз такіх – шэсць.
Мы ездзім у Расію, яны прыязджаюць да нас. Ва ўсходніх суседзяў лёгка набіраецца два-тры саставы высакакласных выканаўцаў. Акрамя таго, падключаюцца і лучнікі з Казахстана.
Параўноўвалі вынікі турніру ў Арле і зімовага чэмпіянату Еўропы, у якім паспелі паўдзельнічаць да ізаляцыі беларусаў і расіян на міжнароднай арэне.
Вынік, які дазволіў заняць месца ў васьмёрцы наймацнейшых на тым кантынентальным форуме, супастаўны з 32-й пазіцыяй выніковага пратакола спаборніцтваў у горадзе на берагах Акі.
Так што канкурэнцыя наймацнейшая, і магчымасць удасканальваць майстэрства ў нашых стралкоў ёсць. Таму пытанне, як быць далей, на парадку дня не стаіць, – упэўнены Марусаў.