Вядоўца мітынгаў за Пуціна змагаецца, каб у біятлоне Беларусь стала субʼектам РФ. Спартсмены, здаецца, не супраць

З 9 па 18 лютага ў Расійскай Федэрацыі пройдзе спартакіяда паміж суб’ектамі Расійскай Федэрацыі. Здавалася б, якім тут бокам Беларусь? Хоць у афіцыйнай назве нашай краіны і прысутнічае слова «рэспубліка», але тое рэспубліка быццам бы незалежная і суверэнная, якая да РФ ніякага дачынення не мае.

Але ж вайна ва Украіне надзейна прышпіліла беларускі спорт да расійскага. Міжнародныя спартыўныя санкцыі накладзеныя на абедзве краіны. Шмат у якіх відах знікла магчымасць выступаць на буйных замежных стартах. У выніку «ізгоі» пачалі актыўна кааперавацца, каб забяспечыць сябе спаборніцкай практыкай. Таму Беларусь ужо мае дачыненне і да ўнутрырасійскай спартакіяды з удзелам у некалькiх вiдах. Вось i зборная па біятлоне будзе выступаць на тых жа ўмовах, што і суб’екты РФ, з магчымасцю заявіць пяць мужчын і пяць жанчын.

– У рэгіянальных расійскіх каманд такая ж квота, – без нейкай там няёмкасці зазначаў рэжымны трэнер Юрый Альберс.

Але так сталася, што незадоўга да старту арганізатары – хутчэй за ўсё, ненаўмысна і без злой мэты – нагадалі спартсменам з Беларусі, што іх краіна суб’ектам Расійскай Федэрацыі – як мінімум на сёння – не з’яўляецца. Здарылася гэта дзякуючы гонкам з масавым стартам, якія мусяць адбыцца 17 лютага для мужчын і 18 лютага для жанчын у Чэлябінскай вобласці. Запланавана, што спаборнічаць у гэтай дысцыпліне адначасова будуць па 30 чалавек. І сярод іх ізноў не змаглі адшукаць месца беларусам. Ізноў – бо аналагічная сітуацыя ў мінулым годзе мела месца на чэмпіянаце Расіі па біятлоне. Беларусы там удзельнічалі ва ўсіх гонках, акрамя мас-стартаў.

Прычыны з большага зразумелыя. Дастаткова зафіксаваць, што ў склад РФ уваходзяць 83 суб’екты, і гэта нават без уліку Беларусі. Калі б кожны з іх выставіў нават па адным спартсмене, то ўтварылася б неверагодная па біятлонных мерках масавасць. Ну а пры абмежаванні ў 30 асоб расіяне заклапочаныя тым, як даць выступіць сваім найлепшым біятланістам.

Пра гэта, уласна, на днях і заявіла расійскае міністэрства спорта.

– Спартакіяда – гэта ў першую чаргу ўсерасійскія спаборніцтвы, якія арганізаваныя для каманд суб’ектаў Расіі, і магчымасць прагляду спартыўнага рэзерву для далейшага фармавання зборных каманд Расійскай Федэрацыі і арганізацыі трэнавальнага працэсу, – так там патлумачылі адсутнасць беларускіх біятланістаў у мас-старце, дзе на колькасць удзельнікаў моцна ўплывае і ўмяшчальнасць стрэльбішча.

Здавалася б, беларусам няма на што крыўдаваць. Але знайшоўся чалавек, які пакрыўдзіўся за нас. Біятлонны каментатар і вядоўца пуцінскіх прапагандысцкіх мітынгаў Дзмітрый Губерніеў папракае арганізатараў спартакіяды за «гасціннасць» і зазначае, што яшчэ ёсць час выправіць сітуацыю, «каб не выглядаць поўнымі дурнямі». Губерніеў адстойвае права Беларусі як мінімум у біятлоне стаць паўнавартасным суб’ектам Расійскай Федэрацыі.

Увогуле, ад самага пачатку беларусаў запрашаць на спартакіяду і не збіраліся. Але пару тыдняў таму сітуацыя перайгралася (Губернiеў заслугу ў гэтым прыпiсвае сабе). І ніхто ў беларускай камандзе супраць гэтага не выказваўся. Хіба што лідар мужчынскай каманды Антон Смольскі акуратна абурыўся, што запрашэнне паступіла вельмі позна, і праз гэта давялося змяняць планы. Але іх ахвотна змянілі, а ў астатнім – толькі плюсы.

– Планую стартаваць ва ўсіх гонках на спартакіядзе. Спадзяюся, мае ўнутраныя сілы і стан дазволяць гэта зрабіць, бо хочацца спаборнічаць, – сказаў Смольскі, які не так даўно аднавіўся пасля хваробы.

– Усё класна, новае месца. Настрой у камандзе пазітыўны. Мы жывем у камфортных умовах, усё прыемна, – гэта словы Дмітрыя Лазоўскага, які таксама кажа, што каманда ўжо дабралася да Златавуста.

Магчыма, прадстаўнікоў рэжымнай Беларусі ў нейкай ступені хвалюе фінансавае пытанне – а ці могуць яны прэтэндаваць на прызавыя ад расіян (за золата абяцаюць каля 4 тысяч долараў, за срэбра – амаль 2 тысячы, за бронзу – 1,2 тысячы)? Але той жа Смольскі тут не надта пераймаецца. Спадзяецца, што ўдома з ім і так разлічацца.

Магчыма, і на гэта Расія падкіне грошай.