Топ-16 — з перамогі!
У фінскім горадзе Котка сустрэчай з аднайменным клубам «Цмокі» стартавалі ў Топ-16 Еўрачэленджа. На шчасце падапечныя Кайрыса пачалі стадыю з перамогі. І калі ў першай палове гаспадары трымаліся з беларускім клубам на роўных, то пасля вялікага перапынку Бэнсан і кампанія на галаву пераўзышлі суперніка і дамагліся разгромнай вікторыі.
Для таго, каб хоць часткова нівеліраваць перавагу ў антрапаметрыі пярэдняй лініі «цмокаў», настаўнік гаспадароў усяго другі раз у розыгрышы выпусціў у стартавай пяцёрцы Вантаю. Малады цэнтравы хай і актыўнічаў на чужым шчыце, але ў абароне відавочна не спраўляўся з Бэнсанам. Апошні настраляў 6 ачкоў толькі за першыя 3 з паловай хвіліны. У выніку неўзабаве 22-гадовага волата „Коткі“ замяніў Оуэнс, пасля чаго фінскі клуб ажыццявіў рывок 7:0. Пры гэтым большасць атак у нетыповай для сябе манеры завяршаў кідкамі з „фарбы“. Праўда, панікаваць беларускім заўзятарам не варта было. Бо, нават нягледзячы на не самы ўдалы дэбют, падапечныя Кайрыса выконвалі галоўныя задачы на паядынак. У прыватнасці, не давалі разгарнуцца Кары (аднаму з самых актыўных гульцоў Еўрачэленджа), не дазвалялі суперніку расчахліць грозную „дальнабойную артылерыю“, а таксама звялі да мінімуму колькасць хуткіх адрываў суперніка. Так, доўгі час фіны ішлі з мінскім калектывам на роўных. Аднак логікі ў такім развіцці падзей не праглядалася. Таму і нядзіўна, што яшчэ да вялікага перапынку „Цмокі“ перахапілі ініцыятыву. Пасля ж вялікага перапынку і зусім пераўзыходзілі суперніка па ўсіх артыкулах. І калі на антракт гаспадары сыходзілі з пасівам усяго ў 3 ачкі, то да экватара трэцяй чвэрці гарэлі ўжо "-20". Фантастычны спурт гасцей заканамерны, калі ўлічыць, што іх перавага ў трохсекунднай зоне, нарэшце, дала пра сябе ведаць. Адначасовае з'яўленне на пляцоўцы Бэнсана і Харпера пайшло „драконам“ на карысць — з бравым дуэтам гаспадары ніяк не маглі дамовіцца. У выніку спыніць бясконцы паток прасочванняў у „фарбу“ апанента гаспадарам удавалася хіба што цаной фолу. Бо нават выкарыстанне падвойнай апекі не прыносіла дывідэндаў. Варта было фінам да яе звярнуцца, як тут жа ішла зкідка ў кут, адкуль у сваю чаргу бесперашкодна атакавалі Харпер, Трасцінецкі або Лютыч. У выніку трэцюю чвэрць падапечныя Кайрыса выйгралі з непрыстойным лікам 35:14. Пры гэтым 9 з гэтых ачкоў набраў Бэнсан, які яшчэ да заканчэння 10-хвілінкі давёў асабісты рахунак да 22 балаў. Вядома, у спорце ў цэлым і ў баскетболе у прыватнасці мы назіралі за рознымі цудамі. Але, падобна, нават заўзятыя фанаты „Коткі“ пасля адчувальнага ўдару не спадзяваліся на паляпшэнне сітуацыі. Па крайняй меры з той цягай да індывідуалізму, якая нечакана выявілася ў фінскага клуба. Красамоўны факт: гаспадары здзейснілі больш страт, чым перадач! Апошніх і таго набралася толькі 10.У выніку ў заключным перыядзе паўночнікі не толькі не палепшылі сітуацыю, але і дазволілі „драконам“ зрабіць яшчэ больш салідную перавагу. У выніку адзіная інтрыга, якая дажыла да апошніх секунд паядынку: ці набяруць госці 100 ачкоў? Нарэшце трохзначная планка «Цмокам» скарылася — лічбы на табло трапленнем з фолам за 19 імгненняў да сірэны ўпрыгожыў Мікіта Мешчаракоў. Данальдас КАЙРЫС:— Ведалі, што каманда суперніка моцная снайперамі, таму асноўную ўвагу надалі абароне на перыметры. План спрацаваў, дзякуючы чаму практычна ўвесь матч прайшоў пад нашу дыктоўку. Задаволены тым, наколькі самавіта выглядала каманда на працягу заключных 30 хвілін паядынку.КОТКА — ЦМОКІ-МІНСК - 64:100 (23:17, 15:24, 14:35, 12:24)Котка. 15 студзеняКОТКА: Кары (12), Хэйнанен (3), Оуэнс (12), Аерс (7), Вантая (6 + 7 пад); Мацінен (10), Паўндс (10), Лехтаранта (2), Акпаса (2), Куусіста (0), Кілпеляйнен (0).ЦМОКІ-МІНСК: Міркавіч (3), Харпер (10), Ульянка (7), Коршук (0), Бэнсан (24); Хантэр (15), Лютыч (12), Пэці (11 + 8 пад + 8 пас + 6 пер), Мешчаракоў (7), Лашкевіч (6), Трасцінецкі (5).
