У бесталковага расіяніна і экс-баксёра з Канады была смешная гісторыя ў НХЛ, а пасля абодва апынуліся ў Мінску. Першы – дакаціўся, а другі інтрыгаваў і вылецеў з «Дынама»
Алкагалізм, траўмы і будучыя Z-баксёры.
У свежым выпуску свайго падкасту Nasty Knuckles былы хакеіст Майкл Рап (правёў за розныя клубы НХЛ больш за шэсць сотняў матчаў) распавёў гісторыю пра знаёмых мінскаму «Дынама» персанажаў. У сезоне-2005/06 амерыканец перасекся ў «Каламбусе» з расійскім форвардам Мікалаем Жэрдзевым, які праводзіў другі сезон за акіянам (тады ж у камандзе гуляў Джэф Плэт, але ён не мае ніякага дачынення да гісторыі). У Рапа меліся праблемы з катаннем, і яму даводзілася працаваць з трэнерам па фізпадрыхтоўцы. Тады ў «Каламбусе» гэтую пазіцыю займаў Бары Брэнан, які толькі прыйшоў у каманду. Спецыяліст распісаў для Рапа і Жэрдзева індывідуальныя праграмы трэніровак, каб форварды падцягнулі фізічныя кандыцыі. Майкл спраўна прыходзіў на заняткі, а вось расiянiна на іх не бачылі.
Аднойчы Брэнан у прысутнасці генеральнага менеджара Дага Макліна і галоўнага трэнера Жэрара Галана паклікаў да сябе Жэрдзева і яго перакладчыка. Трэнер па фізпадрыхтоўцы сказаў, што хакеіст прапускае заняткі, і папярэдзіў пра штрафы, якія будуць прымяняцца, калі сітуацыя не выправіцца.
Аднак Жэрдзеў не спалохаўся. На наступны дзень ён праз свайго перакладчыка паспрабаваў перадаць Брэнану канверт з грашыма. То быў не хабар за маўчанне, а штрафы адразу на месяц наперад, каб увогуле не займацца. З Жэрдзева пагражалі браць 100 долараў за пропуск. У канверце ляжаў чэк на 3 тысячы долараў – гэта значыць «аплата» 30 дзён трэніровак. Расіянін тады за сезон атрымліваў каля 2,5 мільёна долараў.
Гэтыя выхадкі не перашкодзілі Жэрдзеву стаць трэцім бамбардзірам «Каламбуса» у рэгулярцы-2005/06 з 54 (27+27) ачкамі ў 73 матчах.
З-за праблем з рэжымам (не, тут гаворка не пра Лукашэнку) Жардзеў доўга за акіянам не пратрымаўся – летам 2011-га вярнуўся ў КХЛ. Аднак і там выхадкі хакеіста даволі хутка перасталі цярпець. Хакеіст нават сыходзіў у манастыр, каб вылечыцца ад алкагалізму. Пасля гэтага Жардзеў вырашыўся ўзяцца за розум і аднавіў кар'еру ў 36 гадоў. Сезон-2021/22 нападаючы правёў у славацкай «Браціславе» і італьянскім «Мерана», у суме набраўшы 28 (11+17) ачкоў за 30 матчаў.
У ліпені 2022-га з'явілася інфармацыя, што Жардзеў можа аказацца ў мiнскім «Дынама». Пра запрашэнне хадайнічаў генеральны менеджар зборнай Беларусі Міхаіл Грабоўскі. Замежнiк падпісаў пробны кантракт, які пасля прагляду не ператварыўся ў паўнацэнны. Крэйг Вудкрафт казаў, што Жэрдзеў добра праявіў сябе на зборах, але трэнеры вырашылі не адбіраць гульнявы час у моладзі.
Экс-энхаэлавец з Беларусі не з'ехаў і практычна адразу падпісаўся з «Юнацтвам». За сталічны клуб выступаў да сярэдзіны кастрычніка 2022-га, правёўшы 14 матчаў і набраўшы 4 (3+1) балы. На гэтым беларускі этап кар'еры форварда не скончыўся – праз два тыдні хакеіст стаў гульцом «Дынама-Маладзечна». Там Жэрдзеў і прабыў да канца сезона – каманда вылецела ў першым раундзе плэй-оф. За Маладзечна расіянін адыграў 33 матчы і выбіў 17 (5+12) ачкоў.
«Ад пачатку паміж бакамі была такая дамова: як толькі сканчаецца плэй-оф, мы растаемся па ўзаемнай згодзе. Ці выканалі перада мной фінансавыя абавязацельствы? Так, усё добра», – сказаў Жэрдзеў.
Брэнан аб'явіўся ў мінскім «Дынама» куды раней і без пробнага кантракту. У чэрвені 2015-га «зубры» падпісалі канадца на пасаду трэнера па фізпадрыхтоўцы. Бары ніколі не гуляў у хакей на прафесійным узроўні. Да 25 гадоў займаўся боксам, а пасля прысвяціў сябе фізічнай падрыхтоўцы спартсменаў. Да лета 2011-га канадзец працаваў у НХЛ, а пасля перайшоў на аналагічную пасаду ў КХЛ: «Атлант», пазней – ЦСКА. Брэнан растаўся з армейскiм клубам па ініцыятыве апошняга. Паўночнаамерыканец казаў, што не ў курсе, чаму з ім перапынілі супрацоўніцтва.
Бары любіць падключаць да сваёй працы трэнераў па цяжкай атлетыцы – асабліва падчас перадсезоннай падрыхтоўкі. Калі за акіянам гэтым нікога не здзівіш, то ў Расіі да такой практыкі ставіліся са здзіўленнем. Сам жа спецыяліст казаў, што практычна ўсе свае практыкаванні ўзяў з савецкіх кніг.
«Мы за акіянам сталі запазычаць савецкія прыёмы, уключаць іх у сваю трэніровачную праграму. Цяпер іх выкарыстоўваюць амаль усе коўчы НХЛ. Гэтыя метады – цяжкая атлетыка, штурханне і цяга саней, спрынтарскі бег з грузам за спіной, якія развіваюць выбухныя якасці плiяметрычныя практыкаванні, скачкі на кукішках і гэтак далей», – тлумачыў коўч.
Расiйскі журналіст Аляксей Шаўчэнка называў запрашэнне Брэнана самай дурной памылкай за гісторыю «Дынама». На думку інсайдэра, канадзец у ЦСКА «уносіў сумятню ў клуб, лез не ў свае справы і плёў інтрыгі». Цікава, што тады Шаўчэнка правёў паралелі паміж галоўным трэнерам «зуброў» Любамірам Покавічам і галоўным трэнерам «армейцаў» Дзмітрыем Квартальнавым, які цяпер узначальвае «Дынама».
«Калі б Брэнан быў побач з Дзмітрыем Квартальнавым, то быў бы звольнены праз дзесяць хвілін (з іх дзевяць хвілін на збор рэчаў), але ж Покавіч не такі. [Тады генеральны менеджар «Дынама»] Уладзімір Беражкоў упершыню вельмі груба памыліўся, і нават не трэба чакаць вынікаў супрацоўніцтва з гэтым амерыканцам, бяда ўжо здарылася», – запэўніваў Шаўчэнка і прадказваў «Дынама» вялікую колькасць траўміраваных.
За Брэнана заступіліся ў мiнскім клубе. Генеральны дырэктар Максім Суботкін прапаноўваў не звяртаць увагу на негатыўныя каментарыі і назваў запрашэнне канадца сур'ёзным узмацненнем трэнерскага штаба. Беражкоў вельмі хацеў бачыць спецыяліста ў «Дынама» і нават угаварыў таго адкласці запланаваную аперацыю на калене. Сам Брэнан казаў, што Мiнску па сілах з не самым вялікім бюджэтам не толькі скласці канкурэнцыю ЦСКА, але і выйграць Кубак Гагарына.
Па выніку Шаўчэнка выйграў завочны заклад. Брэнану паказалі на дзверы ўжо ў кастрычніку таго года. Прычынай стаў анамальна перапоўнены лазарэт «Дынама» – больш ні ў каго ў лізе не было. Тады каманда ішла на восьмым месцы, гульня паступова наладжвалася, але ў распараджэнні Покавіча рабілася ўсё менш і менш хакеістаў. Клуб нават не стаў аб'яўляць пра раставанне з працаўніком – яго профіль проста выдалілі з сайта. Пазней Суботкіну задалі пытанне пра знікненне канадца. Гендзір быў нешматслоўны на гэтую тэму. «Проста ў нейкі момант на клуб узмацніўся ціск з-за колькасці траўміраваных і іншых пытанняў, таму мы вырашылі, што лепш будзе развітацца. Але зрабілі гэта па-сяброўску, і я не выключаю, што ў будучыні мы працягнем супрацоўніцтва», – адбіўся кіраўнік.
Пасаду трэнера па фізпадрыхтоўцы ў «Дынама» заняў Уладзіслаў Занкавец. Ён называў Брэнана пісьменным спецыялістам, адзначаючы, што ў таго свая методыка. Праўда, агаворваўся, што яна «не зусім падыходзіла канкрэтным хакеістам», з-за чаго пачаліся праблемы.
Таксама стала вядома пра канфлікты канадца з калегамі па «Дынама». Пра адзiн з іх расказала Таццяна Лавец, якая таксама займалася ў клубе фізпадрыхтоўкай хакеістаў. Паводле яе слоў, Брэнану не падабалася, што гульцы раіліся з дзяўчынай, з-за чаго ён нагаворваў на яе Покавічу. Пра такую сітуацыю ведалі хакеісты, якія заступіліся за Лавец. Напрыклад, Аляксей Калюжны абяцаў спецыялістцы, што яе ў клубе ніхто не кране.
Пасля «Дынама» Брэнан дапамагаў трэніравацца двум чэмпіёнам свету ў прафесійным боксе – Аляксандру Паветкіну і Дзянісу Лебедзеву (абодва сёння з'яўляюцца прыхільнікамі вайны ва Украіне). Таксама Бары папрацаваў у валейболе. Першую палову 2016-га ён быў трэнерам па фізпадрыхтоўцы ў мужчынскай зборнай Канады. З Брэнанам у трэнерскім штабе каманда ўпершыню з 1992 года адабралася на Алімпіяду, дзе ў Рыа вылецела ў чвэрцьфінале ад Расіі (0:3). Да 2017 года Бары працаваў у ЦСКА – з таго часу з хакеем ён не звязаны.
