Таленавіты хакеіст без дазволу зʼехаў з Беларусі (яму казалі, усё будзе ок) гуляць у ЗША, а цяпер яго карʼера падвісла
Вось пры чым тут агент Салея.
2 красавіка зʼявілася навіна, што 19-гадовы беларускі нападнік Іван Аношка па просьбе Федэрацыі хакея Беларусі (ФХБ) дыскваліфікаваны міжнароднай федэрацыяй (IIHF) за несанкцыянаваны пераезд у ЗША. Сцвярджаецца, што Аношка, парушыўшы кантракт, пакінуў свой клуб «Дынама-Шыннік» у жніўні 2023 года, каб гуляць за адну з каманд амерыканскіх мінорных ліг. Па запыце ФХБ трансфер хакеіста ў ЗША быў заблакаваны, яго самога прыгаварылі да чатырох месяцаў дыскваліфікацыі, цягам якіх яму будзе забаронена ўдзельнічаць у турнірах пад эгідай IIHF. Перад тым, як увесці санкцыі, Аношка далі два тыдні, каб ён вярнуўся ў «Дынама-Шыннік» і працягнуў там карʼеру, але нападнік гэтага не зрабіў.
Тэлеграм-канал «О, спорт! Ты – свет!» даведаўся дэталі гісторыі.
Хто такі Аношка?
Сёлета ў кастрычніку нападніку споўніцца 20. Хлопец нарадзіўся ў Мінску. Яго маці працуе ў сферы адукацыі, а вось бацька Сяргей Аношка цесна звязаны з прафесійным спортам: займаўся грэка-рымскім дужаннем, сурʼёзнай карʼеры як спартсмен не зрабіў, пасля чаго пераключыўся на трэнаванне і судзейства. Скончыў універсітэт фізкультуры, выкладаў у БДАТУ, дзе трэнаваў, напрыклад, чэмпіёна Еўрагульняў Кірыла Грышчанку. Як суддзя, у тым ліку галоўны, працаваў на розных міжнародных спаборніцтвах.
Свайго сына Сяргей Аношка аддаў усё ж у хакей – у школу сталічнага «Дынама».
– Тата глядзеў хакей па тэлевізары, я ўбачыў і пачаў гуляць у яго з малодшым братам. Потым папрасіў бацькоў аддаць мяне ў секцыю. Спачатку яны адвялі мяне ў школу «Юнацтва» на адзін трэнінг, але мне там не спадабалася. Потым я патрапіў у «Дынама». А малодшы брат пайшоў па шляху таты і займаецца барацьбой, – распавядаў Іван.
Сяргей Аношка пасярэдзіне
Як кажуць спецыялісты, з якімі пагутарыў тэлеграм-канал, Іван Аношка хутка стаў вылучацца сярод аднагодкаў, а з часам аказаўся адным з самых прыкметных хакеістаў Беларусі 2004 года нараджэння. Форварда вылучала бачанне пляцоўкі, хуткасць, пастаўлены кідок. І нават нягледзячы на даволі сціплыя габарыты (цяпер нападнік важыць каля 81 кг пры росце ў 178 см), не баяўся ісці ў барацьбу побач з варотамі.
З 2012 года Аношка выступаў за юнацкія каманды «Дынама», на шматлікіх турнірах (як унутраных, так і міжнародных) гуляў з нашыўкай капітана. Пасля былі этапы ў «Мінскіх зубрах», «Дынама U-18», зборнай Беларусі U-18 у Экстралізе Б. У складзе Беларусі U-18 Аношка прыняў удзел у юніёрскім чэмпіянаце свету, які прайшоў вясной 2021-га. Беларусы тады прабіліся ў чвэрцьфінал, дзе ўступілі расіянам 2:5, а сын барца на турніры правёў пяць матчаў і набраў у іх тры пункты (гол і дзве перадачы).
Перад чэмпіянатам-2021/22 форвард перайшоў у «Дынама-Маладзечна», а 22 верасня ўпершыню закінуў у Экстралізе – у матчы з «Брэстам». На той момант хлопцу было ўсяго 16. Да гэтага ён паспеў аформіць у чэмпіянаце два асісты.
Пасля таго сезона гулец перайшоў у «Дынама-Шыннік», у форме якога ў сезоне-2022/23 выступаў у Моладзевай хакейнай лізе: у 55 гульнях зарабіў 54 балы (21+33), праводзячы на лёдзе ў сярэднім 17.23 хвіліны. У спісе бамбардзіраў МХЛ форвард стаў 11-м.
Таксама ў 2022-м Аношка прыняў удзел у Кубку Чорнага мора ў складзе моладзевай зборнай Беларусі: каманда стала трэцяй, а гулец ў пяці сустрэчах набраў два балы (1+1), праводзячы на лёдзе ў сярэднім 25 хвілін.
У канцы 2022-га нападнік патрапіў у пашыраны спіс дарослай зборнай на кэмп перад Кубкам Першага канала, але ў выніку не быў выкліканы.
Хлопец збіраў шмат станоўчых водгукаў. З часам пра яго загаварылі ў кантэксце НХЛ. Увесну 2023-га Цэнтральнае скаўцкае бюро НХЛ уключыла выхаванца мінскага «Дынама» у топ-40 рэйтынгу хакеістаў з Еўропы для драфту. Праз дзесяць дзён пасля гэтай навіны Аношка атрымаў першы вялікі індывідуальны прыз – быў прызнаны найлепшым навічком сезона ў МХЛ.
У траўні таго года пад 156-м нумарам ён быў абраны на драфце USHL (галоўнай юніёрскай лігі ЗША) клубам «Су Фолс Стэмпід». Аношка фігураваў і ў розных рэйтынгах на драфт НХЛ-2023, аднак ніводны клуб не прапанаваў яму кантракту.
Аношка ў выніку адправіўся за акіян, але ў USHL да гэтага часу не дэбютаваў.
Дык што ж здарылася?
2 красавіка гэтага года Федэрацыя хакея Беларусі выступіла з заявай, што Аношка парушыў дзейны кантракт з «Дынама-Шыннік», у складзе якога адгуляў у МХЛ сезон-2022/23, без дазволу пакінуўшы клуб у жніўні 2023-га, каб гуляць за адну з каманд мінорных ліг ЗША. Па запыце ФХБ міжнародная федэрацыя адхіліла заяўку Аношкі на трансфер у ЗША. Акрамя таго, IIHF вырашыла адхіліць спартсмена ад удзелу ў нацыянальных і міжнародных гульнях пад сваёй эгідай на чатыры месяцы. Да ўступлення рашэння ў моц, то бок да 2 красавіка, гульцу далі двухтыднёвы тэрмін, цягам якога ён мог вярнуцца ў Бабруйск, каб працягваць выкананне кантрактных абавязанняў. Хакеіст гэтага не зрабіў – і бан уступіў у сілу. Аношка падаваў апеляцыю, яна не была задаволеная. У адпаведнасц з рэгламентам МХЛ гульцу прысвоены статус «Канфлікт», правы на яго ў сістэме КХЛ-МХЛ па-ранейшаму замацаваныя за «Дынама-Шыннік».
Тэлеграм-канал «О, спорт! Ты – свет!» спрабаваў атрымаць каментары і ў гульца, і ў яго бацькі, аднак беспаспяхова.
Тым не менш нам удалося даведацца дэталі гэтай гісторыі. Усё пачалося яшчэ вясной 2023-га. Калі пра хлопца загаварылі як пра патэнцыйнага навічка аднаго з клубаў USHL, на яго выйшаў амерыканскі агент Марк Гандлер – ён вёў справы Руслана Салея практычна ўсю яго карʼеру. Гандлер прапанаваў супрацу маладому беларусу, а калі таго выбралі на драфце USHL, узяўся за прасоўванне хакеіста за акіянам.
Аношка гарэў жаданнем перабрацца ў ЗША і паспрабаваць свае сілы ў юніёрскай лізе. Аднак у хлопца быў дзейны кантракт з «Дынама-Шыннікам», і клуб не надта хацеў адпускаць сваю зорку. У пэўны момант, як удалося даведацца з розных крыніц, у асяроддзі хакеіста зʼявіліся людзі, якія паабяцалі нейкім чынам урэгуляваць пытанне – а ты, маўляў, едзь за акіян, ні пра што не хвалюйся, усё будзе вырашана, будзеш гуляць у USHL. Што гэта былі за людзі, чаму і якія гарантыі яны давалі, нам невядома.
Аношка ў жніўні 2023-га зʼехаў за акіян, але за «Су Фолс Стэмпід» дэбютаваць не паспеў. Чаму? З ЗША быў накіраваны запыт у ФХБ па гульцу, каб аформіць трансфер, аднак беларускі бок у сваім адказе паведаміў, што хакеіст самавольна пакінуў «Дынама-Шыннік» і парушыў такім чынам кантрактныя абавязанні. А таму пераход не можа быць здзейснены. І гэта ўсё згодна з Рэгламентам міжнародных трансфераў IIHF (п. 3.5, арт. 2, «Адмова ў трансферы»). Пра парушэнне гульцом правілаў было паведамлена таксама ў міжнародную федэрацыю, а ўжо там на падставе фактаў была вынесеная афіцыйная забарона на ажыццяўленне пераходу.
Акрамя таго, паводле арт. 3 п. 3.1 усё таго ж рэгламенту аб міжнародных трансферах, на хакеістаў, якіх вінавацяць у парушэнні кантрактных абавязанняў, накладаюцца санкцыі ў выглядзе чатырохмесячнай дыскваліфікацыі. Калі гульца спаймалі на парушэнні ўмоў кантракту прафесійнага хакеіста, ён павінен або вярнуцца ў свой ранейшы клуб, або атрымаць вызваленне ад свайго ранейшага клуба. Калі на працягу двух тыдняў (дату пачатак адліку ўстанаўлівае IIHF) гулец не робіць гэтых дзеянняў, уступаюць у сілу спартыўныя санкцыі.
Тым не менш Аношка застаўся ў ЗША. І каб зусім не быць па-за хакеем, стаў часткай клуба «Нью-Джэрсі Рокітс». Калектыў выступае ў NCDC. Гэта адна з найнізкіх ліг юніёрскага хакея ЗША, якая зʼяўляецца незалежнай арганізацыяй, не падпадае пад законы Федэрацыі хакея ЗША і рэгламенты IIHF. Там Аношка гуляць мог. З лістапада 2023-га па канец сакавіка 2024-га форвард паўдзельнічаў у 39 матчах з улікам плэй-оф (калектыў вылецеў у першым раўндзе) і аформіў 8+21 па сістэме «гол + пас».
Што Аношка чакае далей?
Хоць пра дыскваліфікацыю і было абвешчана 2 красавіка, аднак фактычна ў дачыненні да хакеіста яна пакуль не ўжытая. Адлік чатырохмесячнага пакарання пачнецца з моманту вяртання Аношкі ў лігу пад эгідай IIHF, прычым у перыяд спаборніцтваў.
2 красавіка ў тэлеграм-канале «Хакейны бульбаш» зʼявілася інфармацыя, што ў «Дынама-Шыннік» нібыта гатовыя разгледзець як вяртанне Аношкі ў клуб, так і міравое пагадненне з гульцом. Рашэнне за Аношка – ехаць у Бабруйск або гуляць у ЗША.
Па словах спецыялістаў, з якімі паразмаўляў тэлеграм-канал «О, спорт! Ты – мір!», калі Аношка вернецца ў «Дынама-Шыннік» і «пакаецца», то стаўленне да яго будзе дакладна не як да лідара і зоркі калектыву – і гэта можа негатыўна адбіцца на карʼеры.
Калі ж Аношка застанецца ў ЗША, то таксама перспектывы не надта вясёлыя. Ён можа яшчэ год-другі пагуляць у NCDC, але далей проста не зможа заставацца ў лізе па ўзросце. Знайсці за акіянам клуб з ліку ўдзельнікаў турніраў пад эгідай IIHF, калі вісіць чатырохмесячны бан, праблематычна. У такім выпадку, застаўшыся ў ЗША, хакеіст рызыкуе скончыць карʼеру ў 20-21 год.
Фота: Фэйсбук Сяргея і Івана Аношак
