У 2018-м Вараб'ю было 20 і яго прызналі найлепшым хакеістам Беларусі. Сёння яму 26 і ніхто не ведае, куды ён падзеўся
Магчыма, растварыўся ў ЗША.
Гэта было нешта зусім ужо анамальнае. У ліпені 2018-га найлепшым хакеістам Беларусі па выніках сезона-2017/18 быў прызнаны 20-гадовы Павел Варабей. Не сказаць, што ён быў вундэркіндам і дэманстраваў выдатную гульню – нічога такога. Абаронца толькі правёў першы сезон у КХЛ пасля пары гадоў у чэмпіянаце Беларусі. Выступаючы за каманду – аўтсайдэра лігі, закінуў 4 шайбы і аддаў 8 асістаў за 52 матчы. Нядрэнна для маладога гульца з сярэднім айстаймам у 11 хвілін, але і далёка не топ-паказнік.
Але на гэта звярнулі ўвагу. Увесну 2018-га ў складзе зборнай Беларусі выхаванец СДзЮШАР «Юнацтва» зʼездзіў на чэмпіянат свету ў Данію. Каманда там з трэскам правалілася: прайграла сем матчаў з сямі, прычым закінуць змагла толькі ў трох з іх. Абаронца зарабіў 1+1 з французамі пры паразе 2:6, а таксама прабіў галкіпера славакаў (4:7). Абедзве шайбы Варабей запісаў на рахунак пры гульні ў большасці – ён як раз і праяўляў сябе добра пры розыгрышы лішняга.
Хакеіст атрымаў для многіх нечаканае прызнанне, але толькі таму, што той сезон для астатніх беларускіх хакеістаў склаўся яшчэ горш, хаця на той момант у справе былі і вопытныя беларускія выканаўцы накшталт Уладзіміра Дзянісава, Аляксандра Кітарава, Аляксандра Паўловіча і г.д.. Таксама пад азначэнне «беларусы» траплялі натуралізаваныя паўночнаамерыканцы Джэф Плэт і Чарльз Лінгле. Равеснік Ягор Шаранговіч, з якім Варабей выступаў у малодшых зборных, яшчэ не раскрыўся. Дарэчы, выйграўшы з камандай моладзевы ЧС у Д2, Варабей быў прызнаны аргкамітэтам турніру самым карысным абаронцам і найлепшым гульцом абарончага плана.
Эксперты тады часта ў кулуарах казалі, што Варабей атрымаў вялікі аванс. Міхаіл Захараў і праз два гады не мог на гэта забыцца: катэгарычна рэкамендаваў у найлепшыя гульцы сезону Андрэя Касціцына, з сарказмам асцерагаючыся, што журналісты зноў прагаласуюць за Варабʼя (намякаючы, хто насамрэч «каранаваў» хакеіста).
Аднак карʼера абаронцы да таго моманту выглядала даволі бязладна. Засвяціўся ў «Сібіры» (Новасібірск, КХЛ) і «Металургу» (Новакузнецк, ВХЛ), ненадоўга заскочыў у Фінляндыю і перайшоў у «Віцязь» (Падольск, КХЛ), а таксама спускаўся ў «Дынама» (Санкт-Пецярбург, ВХЛ). У зборную яго запрашалі толькі на таварыскія матчы – дацкі ЧС так і застаецца для гульца адзіным у карʼеры.
Падобна, што такім і застанецца.
- Калі зірнуць у прынцыпе на беларускіх хакеістаў 1997 года нараджэння, то Варабей сапраўды вылучаўся сярод аднагодкаў. Разумны, пісьменны абаронца, не баяўся браць гульню на сябе, рукі ў яго не калаціліся, не хаваўся на пляцоўцы, заўсёды быў у гушчы падзей. Умеў гуляць у сучасны хакей, вельмі часта падключаўся да атак, выдатна дзейнічаў не толькі ззаду, але і наперадзе, – апісаў «Трыбуне» плюсы хакеіста трэнер, які з ім працаваў. – Зрэшты, былі і негатыўныя моманты. Напрыклад, не найлепшае катанне. У якім плане? Крокі маленькія (і гэта пры росце ў 191 см), хуткасць недастаткова высокая, што часам перашкаджала на пляцоўцы. Плюс, як ні дзіўна, пры ягоных габарытах (95 кг – Tribuna.com) не быў дастаткова магутным. Тым не менш, калі абʼектыўна, Варабʼю не проста так у тыя гады прадказвалі вялікую будучыню.
У 2021 годзе Варабей адправіўся за акіян, адхіліўшы кваліфікацыйную прапанову «Віцязя». Для нашых суразмоўцаў з хакейнага свету Беларусі гэта быў нечаканы крок, многія меркавалі, што гулец застанецца ў КХЛ.
- Не ведаю, што адбылося, але ў Варабʼя былі рэальныя шанцы стаць першакласным хакеістам. Магчыма, у нейкай ступені злы жарт згуляла прызнанне яго найлепшым у Беларусі ў 20 гадоў. Можа, таму ён падумаў, што ўсё ўжо ўмее. Так, у КХЛ ён працягваў гуляць, шмат матчаў правёў і за «Сібір», і за «Віцязь», але выглядаў ужо не так, як раней. Ад калег чуў, што ён нават недзе пачаў да сябе не так патрабавальна ставіцца на трэнаваннях, як тое было раней. Але насамрэч можа быць шмат фактараў, якія паўплывалі на карʼеру. У выніку, лічу, ён сябе не рэалізаваў як хакеіст, – падзяліўся думкамі яшчэ адзін трэнер, які перасякаўся з Варабʼём на клубным узроўні.
У 24 гады беларус падпісаў кантракт з «Арланда» з ECHL – трэцяй па сіле лігі Паўночнай Амерыкі. У першым жа матчы ён вызначыўся выніковай перадачай і дапамог абгуляць «Джэксанвіль» 4:1. Варабей нагуляў на паказнік карыснасці «+2». Праўда, у клубе не затрымаўся – і пачаліся тулянні па лізе: абмен у «Індзі Фюэл», наступны пераход у «Джэксанвіль». І гэта ўсё на працягу толькі сезона-2021/22, у якім агулам Варабей правёў 34 матчы (22 з іх за «Джэксанвіль») і набраў 13 пунктаў (7+6).
«Джэксанвіль» улетку 2022-га даваў абаронцу новы кантракт, але той раптам вярнуўся ў «Арланда» і адкатаў за яго 26 матчаў (1+5) пры паказніку карыснасці «– 6». Пры гэтым усяго «Арланда» ў сезоне-2022/23 правёў 72 матчы, заняў ва Усходняй канферэнцыі 11-е месца з 14 і праляцеў міма плэй-оф.
Апошняе зʼяўленне Варабʼя на лёдзе як прафесіянала на сёння датуецца 18 сакавіка – тады яго каманда саступіла «Айдаха» 2:6, а абаронца сышоў з пляцоўкі з паказнікам «- 1». Пасля каманда правяла яшчэ дзесяць матчаў «рэгуляркі», але абыходзілася ўжо без дапамогі Варабʼя. 30 чэрвеня гулец пакінуў «Арланда» свабодным агентам.
З тых часоў пра Варабʼя наогул нічога не чуваць. Яго няма ні ў заяўках клубаў ECHL, ні ў ростарах калектываў АХЛ. Ніводная з нашых крыніц у хакейным свеце не змагла паведаміць хоць што-небудзь пра лёс абаронцы.
- Адзінае, што я чуў, гэта, быццам бы, ён збіраўся заставацца ў ЗША і набываць нерухомасць. Вось толькі ўдалося ажыццявіць план ці не, не ведаю, – кажа адзін з хакейных спецыялістаў.
Пры гэтым ECHL – не ліга для зарабляння. Як распавялі «Трыбуне» хакейныя эксперты, якія працуюць у Паўночнай Амерыцы, у ECHL хакеісты атрымліваюць сціплыя сумы.
- У 2023 годзе ў месяц можна было зарабіць 5-8 тысяч «бруднымі». Гэта па амерыканскіх мерках вельмі мала. Для разумення, 5-6 тысяч долараў тут можна спакойна зарабіць кіроўцам Uber. Таму сумняваюся, што Варабей меў нейкія вялікія грошы ў «Арланда», – перакананы наш суразмоўца з ЗША.
Немагчыма вызначыць, чым займаецца хакеіст, і па ягоных сацыяльных сетках. Апошні пост у Instagram быў апублікаваны 28 траўня. На фота Варабей атрымліваў асалоду ад Атлантычнага акіяна.
26-гадовы гулец ніяк не адрэагаваў у мэсэнджарах на нашыя пытанні.
- Я нават не здзіўлюся, калі ён цішком скончыў карʼеру і акунуўся ў амерыканскае жыццё, зусім не звязанае з хакеем, – выказаў меркаванне адзін з трэнераў.
Фота: hockey.by
