Валадзько ўжо ў новай экзатычнай краіне – пасля клуба дарасталі да АПЛ, трэнер з золатам ЧС забіваў у Мінску і гуляў у легендарным матчы БАТЭ
Першы беларускі футбаліст у гісторыі яшчэ адной лігі.
Абаронца Максім Валадзько мінулым летам перайшоў з БАТЭ ў «Санта-Калому», пасля чаго стаў першым беларускім футбалістам у гісторыі чэмпіянату Андоры. Там ён узяў бронзу і стаў фіналістам Кубка краіны.
Цяпер Валадзько павінен стаць першым уладальнікам беларускага пашпарта за час існавання яшчэ аднаго элітнага дывізіёна – Мальты. Гулец з 33 матчамі за зборную 19 чэрвеня падпісаў кантракт з «Фларыянай» – клубам, дзе галоўнай зоркай з'яўляецца, бадай што, трэнер. Раскажам пра гэта падрабязней.
Экс-гульцы ЧБ выступалі на Мальце і раней
Да Валадзько ў чэмпіянаце Мальты ў розны час ужо гулялі экс-футбалісты беларускай «вышкі» – замежныя: сербы Боян Маміч («МТЗ-РІПА») і Аляксандр Чанавіч («Дынама» Мінск), украінец Аляксандр Максімаў («Тарпеда-БелАЗ»). А грузін Іраклій Майсурадзэ («МТЗ-РІПА», «Віцебск») і бразілец Рафаэль Ледэсма («МТЗ-РІПА», «Дынама» Мінск, «Віцебск») станавіліся чэмпіёнамі ў складзе «Валеты».
У «Фларыяне», куды перайшоў Валадзько, ніхто з іх не гуляў. Затое ў самым пачатку кар'еры туды на сезон-2007/08 заязджаў форвард Янік Балазі – забіў адзін мяч за 12 матчаў. Потым Балазi з'ехаў назад у Англію, прагрэсаваў, дарос да АПЛ і правёў там больш 100 матчаў за «Крыстал Пэлас», «Эвертан» і «Астан Вілу». Дарэчы, ліверпульцы ў жніўні 2016-га выкупілі гульца ў лонданцаў амаль за 30 мільёнаў еўра.
Клубы Мальты ў 2022-м выступілі куды лепш за беларускія ў Еўропе
«Фларыяна» – адзін з самых тытулаваных клубаў Мальты: 26 чэмпіёнскіх тытулаў і 19 Кубкаў краіны. Але ў мінулым сезоне каманда фінішавала толькі сёмай. Так што Валадзько застаўся без еўракубкаў – «Санта-Калома» вось у іх згуляе.
У 2022-м у Еўропе калектывы з Мальты выступілі заўважна лепш за беларускія каманды. Сярод апошніх толькі мінскае «Дынама» прайшло хоць раўнд адбору (на першай стадыі кваліфікацыі ЛК абыгралі чарнагорскі «Дзечыч»), а БАТЭ, «Гомель» і «Шахцёр» усе свае дуэлі прайгралі. А вось чатыры прадстаўнікі Мальты ў суме прайшлі адразу шэсць стадый! Асабліва адзначыліся ў «Хамрун Спартанс» – у кваліфікацыі ЛК па чарзе выбілі армянскі «Алашкерт», баснійскі «Вележ» і балгарскі «Леўскі». Спыніў каманду ў вырашальным раўндзе сербскі «Партызан». У групе еўракубкаў каманды ад Мальты пакуль не гулялі.
Беларускія і мальтыйскія клубы ў Еўропе сустракаліся тройчы – і кожны раз далей ішлі каманды з нашай краіны. У першым раўндзе кваліфікацыі Кубка УЕФА-1994/95 мінскае «Дынама» прайшло «Хіберніянс», прайграўшы ў гасцях (3:4, 3:1). У кваліфікацыі ЛЕ-2013/14 сустракаліся «Мінск» і «Валета»: «гараджане» згулялі ўнічыю на выездзе (1:1), але дома перамаглі (2:0) і пайшлі далей. У 2019-м у рамках кваліфікацыі Лігі Еўропы «Шахцёр» перамог ужо згаданы «Хіберніянс», здабыўшы дзве мінімальныя перамогі (1:0, 1:0).
Па даных нямецкага партала Transfermarkt, розніца паміж сярэднім коштам гульца чэмпіянату Беларусі і чэмпіянату Мальты зусім невялікая: 143 тысячы еўра супраць 140 тысяч. А агульны кошт гульцоў «Фларыяны» Валадзько, 3,53 мільёна еўра, меншы, чым усяго ў шасці клубаў «вышкі» – гэта БАТЭ, «Шахцёр», мінскае «Дынама», «Тарпеда-БелАЗ», «Нёман» і «Славія».
Трэніраваць Валадзько будзе чэмпіён свету, які забіваў зборнай Беларусі
За пару тыдняў да падпісання Валадзько «Фларыяна» пракруціла, мабыць, самы статусны трансфер у сваёй гісторыі, прычым не гульца. Галоўным трэнерам клуба стаў Маўра Камаранезі – чэмпіён свету-2006 як футбаліст зборнай Італіі і трохразовы чэмпіён гэтай краіны ў складзе «Ювентуса». У трэнерскай кар'еры ў яго ўжо сёмы клуб – ні ў адным ён не затрымліваўся нават на поўны год. У спісе мексіканскія «Корас дэ Тэпік» і «Кафеталерас дэ Тапачула», аргенцінскі «Тыгры», славенскія «Табар» і «Марыбар». А ў «Марселі» Камаранэзі пратрымаўся ў ліпені 2022-га ўсяго тыдзень - прыходзіў памочнікам харвата Ігара Тудора, але не спрацаваўся з экс-партнёрам па «Юве».
Камаранэзі ў бытнасць гульцом двойчы прыязджаў у Беларусь. У кастрычніку 2005-га гэта здарылася ў рамках кваліфікацыі на той самы трыўмфальны для Італіі ЧС-2006, які скончыўся трыўмфам італьянцаў. На «Дынама» беларуская зборная была разгромленая (1:4), а Маўра ў той сустрэчы аформіў адзін з асістаў на аўтара хет-трыка Луку Тоні, а затым забіў і сам (адзнака 3:29).
А вось восенню 2008-га Камаранезі быў не такі паспяховы на «Дынама». У гістарычным першым у Беларусі матчы групавога этапу ЛЧ «Ювентус» ледзь выратаваў ачко – БАТЭ да 23-й хвіліны павёў 2:0. Гасцям удалося зраўняць лік да перапынку, у якім Камаранезі замянілі. У другім тайме каманды не забівалі – сенсацыйная нічыя 2:2.
А вось калі італьянскія каманды ў згаданых турнірах гулялі з беларускімі супернікамі дома, Камаранезі на полі не з'яўляўся.