Кавалевіч пра звальненне гульцоў «Нёмана»: «Яны трэніруюцца, увесь час з камандай. Гэта гульцы асноўнага складу. Больш нічога не магу сказаць»
Галоўны трэнер «Нёмана» Ігар Кавалевіч пракаментаваў інфармацыю пра разрыў і непадпісанне кантрактаў з чатырма гульцамі клуба, якія раней трапілі ў «чорны спіс» «Мінспорту».
– Па-першае, сёння ў нас выходны. Заўтра будзе трэніроўка, збярэмся. Па-другое, якое дачыненне я маю да разрыву кантрактаў? Хто разрываў – таму і патэлефануйце. Я галоўны трэнер, а не ў кадрах працую. Магу вам расказаць, як мы сыгралі, абмеркаваць нейкія тэхніка-тактычныя дзеянні, калі вы спытаеце.
– Але як галоўны трэнер вы ўжо напэўна зацікаўлены ў гэтых гульцах.
– Мы зацікаўлены ва ўсіх.
– Ёсць размовы, што гэтыя футбалісты могуць застацца ў «Нёмане», калі пройдуць «спецыяльную камісію».
– Я ўжо кажу: гэта не да мяне. Вядома, я ў іх зацікаўлены. І яны трэніруюцца, увесь час з камандай. Гэта гульцы асноўнага складу. Больш нічога не магу сказаць. Не валодаю сітуацыяй, – сказаў Кавалевіч.
