У АБФФ правялі паседжанне па выніках выступу зборных, пра адстаўкі Кандрацьева і Ясінскага не паведамляецца

У тэхнічным цэнтры АБФФ прайшла сустрэча кіраўніцтва федэрацыі з галоўнымі трэнерамі нацыянальнай і маладзёжнай зборных Беларусі, а таксама з трэнерамі юнацкіх зборных каманд U-16 і U-17.

На паседжанні абмяркоўваліся апошнія вынікі зборных.

«З боку кіраўніцтва ў сустрэчы прынялі ўдзел Старшыня Мікалай Шарснёў, першы намеснік Старшыні Андрэй Васілевіч, намеснікі Старшыні Уладзімір Базанаў і Міхаіл Ботнікаў, генеральны сакратар Сяргей Жардзецкі, тэхнічны дырэктар Дзмітрый Касёнак. У сваю чаргу з трэнераў, якія ўдзельнічалі ў дыскусіі, варта вылучыць галоўнага трэнера нацыянальнай зборнай Георгія Кандрацьева і яго памочнікаў Алега Радушку, Дзмітрыя Раўнейку і Паўла Яўсеенку, галоўнага трэнера маладзёжнай зборнай Сяргея Ясінскага, трэнераў юнацкіх зборных Беларусі Дзмітрыя Караткевіча і Валерыя Апанаса», – паведамляе прэс-служба АБФФ.

Адзначым, што аб адстаўках галоўных трэнераў асноўнай і маладзёжнай зборных не паведамляецца. Нагадаем, што падапечныя Георгія Кандрацьева ў двух матчах адбору да Еўра-2024 уступілі Ізраілю (1:2) і абгулялі Косава (2:1), а каманда пад кіраўніцтвам Сяргея Ясінскага згуляла ўнічыю з Андорай (1:1).