Аніхімоўскі пра магчымую працу беларускіх суддзяў у РПЛ: «З такімі крокамі ад Расіі мы проста страцім сваю незалежнасць»
Экс-суддзя вышэйшай лігі Віталь Аніхімоўскі выказаўся наконт прапановы беларускім арбітрам папрацаваць у Расіі.
– Хто-небудзь задумваецца, як гэта ўсё выглядае збоку? Як па мне, уся гэтая гісторыя – і з судзействам, і з размовамі пра магчымы ўдзел беларускіх каманд у РПЛ – гэта працяг паглынання нашай краіны, паглынанне нашага футбола Расіяй. На палітычным узроўні мы амаль ужо сталі адной з правінцый Расіі, зараз станем і ў сферы футбола.
Калі наймацнейшыя беларускія каманды з'едуць у Расію, то на Радзіме, па сутнасці, застанецца месцячковы чэмпіянат. У перспектыве гэта проста знішчыць наш футбол. З суддзямі тая ж гісторыя. Будуць запрашаць наймацнейшых у РПЛ, а ў Беларусі застануцца тыя, хто гатовы судзіць якраз месцячковыя турніры.
– У Расіі кажуць, што гэта магчымасць абмену вопытам.
– Для беларускіх суддзяў гэта сапраўды нядрэнны досвед, магчымасць паспрабаваць сябе на больш высокім узроўні. Але магчымасць для абмежаванай колькасці арбітраў. А што рабіць астатнім? Так і будуць варыцца на сваім узроўні. А далей – канец, ніякага развіцця.
Дакладна ведаю, ёсць беларускія суддзі, якія радуюцца магчымасці папрацаваць у РПЛ. Я не падзяляю іх думкі. Думайце больш глабальна. З такімі крокамі з боку Расіі мы проста страцім сваю незалежнасць. А футбол будзе дэградаваць яшчэ больш і больш, – сказаў Аніхімоўскі.