Экс-арбітр ЧБ Аніхімоўскі: «У РПЛ суддзям наогул нельга працаваць без ліцэнзіі VAR, з якой у Беларусі толькі брыгада Кульбакова»
Экс-арбітр чэмпіянату Беларусі Віталь Аніхімоўскі распавёў пра перспектывы запрашэння беларускіх суддзяў у чэмпіянат Расіі.
– Ці справяцца беларускія арбітры на матчах РПЛ?
– Калі пройдуць якасны зімовы збор, калі ім дадуць праграму, дадуць магчымасць папрацаваць на нядрэнных «таварняках», то, думаю, праблем не ўзнікне. Але трэба разумець, што ў нас толькі тры чалавекі, брыгада Кульбакова, маюць ліцэнзію VAR, а гэтая сістэма ўжываецца ў РПЛ паўсюдна. Пры гэтым па правілах, калі ў цябе няма ліцэнзіі, ты наогул не маеш права працаваць на матчы з VAR, нават рэзервовым арбітрам. І як будуць запрашаць суддзяў з Беларусі?
Магчыма, расіяне пачнуць актыўна навучаць беларускіх арбітраў. І ў мяне тут толькі адно пытанне: «Для чаго ім гэта трэба?» Адказ відавочны: Беларусь ім цяпер патрэбная як ніколі для пераследу сваіх акупацыйных мэтаў. Ці нават лепш ужо сказаць «Белоруссия».
– Расійскія суддзі праводзяць зборы за мяжой, у той жа Турцыі. Ці адпусціць «міністр спорту» Сяргей Кавальчук арбітраў з Беларусі?
– Калі РФС усе выдаткі возьме на сябе, то адпусціць :). Галоўнае, каб бюджэтныя грошы ў Беларусі не чапалі, – распавёў Аніхімоўскі.
