Гулец «Барселоны» прыйшоў на матч у куртцы і з торбай, якія зроблены з панэляў мячоў ЛЧ

Калекцыю для Adidas стварылі некалькі лонданскіх дызайнераў. У яе аснове не толькі звыклыя для адзення і аксесуараў матэрыялы, але таксама сапраўдныя панэлі мячоў ЛЧ. Калі дакладней, мяча UCL Pro Ball London, які будзе выкарыстоўвацца да канца Лігі чэмпіёнаў УЕФА-2023/24, у тым ліку падчас запланаванага на 1 чэрвеня фіналу на «Уэмблі».

Учора ў куртцы і з сумкай з новай калекцыі ўпершыню з'явіўся на публіцы абаронца «Барселоны» Жуль Кундэ. Сімвалічна, што ён апрануўся так менавіта на матч Лігі Чэмпіёнаў. Каталонцы перамаглі «Напалі», француз быў на полі адным з найлепшых. А вось тое, што Кундэ у камандзе (а магчыма і ў сусветным футболе) самы стыльны, ужо даўно не абмяркоўваецца.

Адзначым, што ў прэзентацыі незвычайнага дызайну ўдзельнічаў таксама паўабаронца мадрыдскага «Атлетыка» Радрыга дэ Поль. На ім скураная куртка таксама выглядае цудоўна.

Можа аргенцінцу таксама ёсць сэнс апрануцца ў лігачэмпіёнскі дызайн напярэдадні сённяшняга матчу супраць «Інтэра»? Раптам таксама прынясе поспех.