IIHF на чатыры месяцы адхіліла расійскага варатара Фядотава і забараніла ЦСКА здзяйсняць на працягу сезона міжнародныя трансферы

Міжнародная федэрацыя хакея (IIHF) на чатыры месяцы адхіліла расійскага варатара Івана Фядотава ад удзелу ў афіцыйных матчах за парушэнне міжнароднага трансфернага рэгламенту.

ЦСКА забаранілі ажыццяўляць на працягу сезона міжнародныя трансферы.

Прычынай таму з'яўляецца тое, што Фядотаў падпісаў кантракт з маскоўскім клубам, маючы дзейнае пагадненне з «Філадэльфіяй».

Клуб НХЛ задрафтаваў яго ў 2015 годзе, але толькі ў мінулым годзе падпісаў з ім аднагадовы кантракт. Перад ад'ездам у ЗША Фядотаў быў арыштаваны ў Санкт-Пецярбургу за нібыта ўхіленне ад вайсковай службы.

Завяршыўшы гадавую службу, ён вярнуўся ў хакей. «Філадэльфія» абвясціла, што яго кантракт пачне дзейнічаць у гэтым сезоне, але падчас знаходжання ў Расіі Фядотаў падпісаў двухгадовую дамову з маскоўскім ЦСКА.