Хакеіст «Металурга» Лукін: «Паўфінал ужо забылі. Сёння згуляем са свежымі думкамі, адкінем увесь негатыў»
Хакеіст «Металурга» Канстанцін Лукін распавёў пра паўфінал Кубка дружбы, а таксама падзяліўся думкамі аб надыходзячым матчы за трэцяе месца.
– Шыкоўная атмасфера, поўныя трыбуны. Выдатнае свята хакея падрыхтавалі для жлобінцаў у суботу. Яркі матч атрымаўся па антуражы – на вышэйшым узроўні.
Стараліся абедзве каманды, гулялі ў адкрыты хакей. У прынцыпе, змагаліся з «Сокалам» на роўных. Але супернік скарыстаўся сваімі момантамі, а мы не.
Крыўдна прайграваць, калі адыгрывацца ў ходзе сустрэчы з рахунку 0:2. Пры гэтым, калі зраўнялі, маглі адразу закідваць і выходзіць наперад.
У мяне было шмат момантаў. Нават не лічыў, колькі ў выніку іх было. Закінуў адну шайбу, але пры такой колькасці трэба хаця б палову рэалізоўваць. Адзін гол пры такой колькасці кідкоў – гэта дрэнна.
Цяпер будзем гуляць за 3-е месца з «Нёманам». Паўфінал ужо забыліся. Сёння згуляем са свежымі думкамі, адкінем увесь негатыў. Трэба згуляць за сябе, за заўзятараў, за горад, – сказаў Лукін.
