Яраслаў Чупрыс: «Паразы ад маскоўскага «Дынама» будуць на руку мінчанам, у плэй-оф нярэдка ўсё пераварочваецца»
Галоўны трэнер «Шахцёра» Яраслаў Чупрыс падзяліўся сваімі думкамі аб шанцах мінскага «Дынама» ў плэй-оф КХЛ.
– Галоўны вынік «рэгуляркі» – «Дынама» выйшла ў плэй-оф. Вядома, каманда магла фінішаваць вышэй, былі ўсе шанцы для гэтага. Але плэй-оф – час герояў, і не так важна, з якога месца ты туды выйшаў.
– Што перашкодзіла беларускаму клубу выступіць лепш?
– Шмат фактараў. Што канкрэтна паўплывала на вынік – на гэтае пытанне можа адказаць толькі галоўны трэнер і яго штаб. Яны лепш за ўсіх ведаюць, якой была сітуацыя ў камандзе ў плане траўм, хвароб і ўсяго астатняга.
З боку было бачна, што «Дынама» выдатна выглядае супраць топавых супернікаў. У той жа час хапала няўдач у гульнях з камандамі, якія знаходзіліся ніжэй «зуброў» у табліцы ці недзе побач. Тут «Дынама» страціла шмат ачкоў, з-за чаго і не змагло заняць месца вышэй.
Што да мінулых сустрэч з супернікам па першым раундзе, то не выключаю, што гэтыя паразы будуць на руку мінчанам. Таму што ў плэй-оф нярэдка ўсё пераварочваецца, – сказаў Чупрыс.
