Што за беларуса хацелі забраць з «Дынама» за мільён долараў: трафей за акіянам, бан ад роднага клуба, пераклады для Вудкрафта
Гуляў з Протасам, але з НХЛ не склалася.
У міжсезонне КХЛ у мінскага «Дынама» яўна моцна абновіцца склад. Цяпер у каманды на кантракце няма ніводнага замежніка, а іншыя клубы КХЛ нацэліліся на запрашэнне маладых беларускіх гульцоў, якія не лічацца легіянерамі ў лізе.
Адным з іх стаў 23-гадовы абаронца Сяргей Сапега. Ён у статусе абмежавана свабоднага агента атрымаў прапановы ад магнітагорскага «Металурга» і «Авангарда». Прычым, паводле інсайдэрскай інфармацыі, омскі клуб выкаціў офер на два сезоны і 83 мільёны расійскіх рублёў – крыху больш за мільён долараў.
Аднак «Дынама» паўтарыла гэтую прапанову, нягледзячы на тое, што заробак Сапега ў «зуброў» быў значна меншы. Былі супярэчлівыя звесткі аб прычынах – паступала інфармацыя, што гэта зроблена па пратэкцыі СКА, каб здзейсніць выгадны абмен з піцерскім клубам, а былі і інсайды, што «Дынама» так падкрэслівае стаўку на беларускіх гульцоў.
Расказваем, чым характэрна кар'ера абаронцы і як ён здолеў звярнуць на сябе ўвагу топаў КХЛ.
Выйграў лігу за акіянам
Сапега пачынаў займацца хакеем у родным Віцебску. Як толькі хлопцу споўнілася 16, яго заявілі за другі склад гарадской каманды. Па ходзе таго ж сезона-2015/16 абаронца перабраўся ў «Дынама-Раўбічы», з якім дайшоў да фіналу плэй-оф вышэйшай лігі, дзе прайграў «Шахцёру-2».
Наступны сезон Сяргей пачаў у заяўленай у ЧБ зборнай U-18 і па ходзе гладкага чэмпіянату трапіў у каманду на два гады старэйшую. Ужо тады стала зразумела, што хлопцу час пераходзіць на новы ўзровень. Улетку 2017-га ён апынуўся ў «Трай-Сіці» у WHL – адной з трох асноўных юніёрскіх хакейных ліг Канады. Правёўшы там усяго чатыры матчы, Сапега перайшоў у іншую каманду лігі «Прынц Альберт», дзе адразу адразу стаў лідарам абароны і праводзіў на лёдзе па 20-25 хвілін.
Трыумфальным аказаўся другі сезон за акіянам. Выступаючы за «Прынц Альберт» з Аляксеем Протасам, абаронца за гладкі чэмпіянат набраў 43 (10+33) ачкі ў 58 матчах, а потым клуб упершыню за 34 гады выйграў плэй-оф і чэмпіёнскі тытул WHL. У серыі на выбыванне Сапега выбіў 13 (3+10) балаў у 23 паядынках.
Не прабіўся ў НХЛ
Пасля чэмпіёнскага сезона ў Сяргея меўся апошні шанц выйсці на драфт НХЛ, аднак тады абаронцу было ўжо 20, таму не стала здзіўленнем, што яго ніхто не абраў. Улетку 2019-га Сапега разам з Алістравым адправіўся ў лагер развіцця «Таронта» – але там трапіў пад першы ж адсеў, не паспеўшы згуляць ні ў адным спарынгу. Абаронца накіраваўся ў «Таронта Марліс» з АХЛ, але і ў іх лагеры не пайшло. Па выніку Сапега апусціўся яшчэ мацней па сістэме «Таронта» і сезон-2019/20 пачаў у трэцяй па сіле лізе Паўночнай Амерыцы, ECHL, за «Ньюфаўндленд».
Першы гладкі чэмпіянат на дарослым узроўні пачаўся з разрыву звязак калена, з-за чаго прыйшлося прапусціць амаль два месяцы. Падчас сезона Сапега паднімалі ў АХЛ, але дэбютаваць усё ніяк не давалі.
«У «Марліс» у абойме было восем абаронцаў, камандзе трэба было змагацца за трапленне ў плэй-оф, таму трэнерскі штаб не стаў рызыкаваць», – тлумачыў Сапега.
За «Ньюфаўндленд» жа Сапега набраў толькі 7 (0+7) ачкоў у 35 гульнях.
Мог аказацца ў «Дынама» раней
Пасля не самага пераканаўчага сезона пачалі гаварыць пра мэтазгоднасць вяртання Сапегi ў Мінск. Тым больш хакей за акіянам спыніўся з-за пандэміі каранавіруса, а ў «Дынама» спрабавалі зрабіць стаўку на беларускіх хакеістаў. Але ў выніку бакі не дамовіліся, пасля чаго тады трэнер «Дынама» Міхаіл Грабоўскі казаў пра ўплыў агентаў на гульца.
«Нам не спадабалася, што яны прапаноўвалі, а на нашыя ўмовы «Дынама» не пайшло, пасля гэтага перамовы спыніліся. Буду спадзявацца, што прапанова ад іх паступіць у наступным сезоне», – каментаваў тады Сапега.
У абаронцы заставаўся яшчэ год кантракту з «Таронта», аднак старт новага сезона ў Паўночнай Амерыцы запланавалі толькі на пачатак 2021-га, чаго гулец не чакаў.
«Практычна паўгода кармілі абяцаннямі, казалі, што дазвол на правядзенне матчаў атрыманы, і сезон хуткім часам пачнецца. Але, у рэшце рэшт, старт рэгулярнага чэмпіянату адклалі на пяць месяцаў», – наракаў Сапега.
У выніку Сапега на некаторы час вярнуўся ў родны горад, дзе пачаў трэніравацца з фарм-клубам «Віцебска». Аднак пасля адмовы ад прапановы клубнага дырэктара пагуляць за асноўную каманду Сапега атрымаў забарону на заняткі, з-за чаго быў вымушаны перайсці да індывідуальных трэніровак. Хакеіст прызнаваўся, што яму «было крыўдна, што родны клуб, у якім гуляў з шасці гадоў, не пускае сваіх жа выхаванцаў».
Пасля прылёту ў Амерыку беларуса перавялі ў АХЛ да «Таронта Марліс». Сезон стартаваў у лютым, але Сапега з-за высокай канкурэнцыі дэбютаваў за каманду толькі ў красавіку і правёў усяго два матчы – у другой палове траўня з-за ўсё таго ж каранавіруса сезон АХЛ датэрмінова завяршылі, не стаўшы праводзіць плэй-оф.
Атрымаў давер Вудкрафта, для якога стаў перакладчыкам
«Таронта» не стала прапаноўваць Сапега падоўжыць кантракт – і абаронца на гэты раз усё ж вярнуўся падпісаўся з «Дынама», дзе прапанавалі 2-гадовы аднабаковы кантракт. У мінскім клубе тады заяўлялі, што камандзе спатрэбіцца развітае гульнявое мысленне Сяргея і яго ўменне дзейнічаць нестандартна на лёдзе. Перад стартам свайго першага сезона ў КХЛ Сапега ў водпуску зрабіў аперацыю на насавой перагародцы і разабраўся са старымі траўмамі.
Спачатку Сапега прызнаваўся, што не прывык да такіх высокіх хуткасцей. Але дынамаўскі трэнер Крэйг Вудкрафт усё роўна давяраў маладому абаронцу, выпускаючы таго ў верхніх звёнах і ў брыгадах большасці. Можна сказаць, па-сапраўднаму пераход на дарослы ўзровень у хакеіста адбыўся якраз у Мінску. У дэбютным рэгулярцы за «Дынама» абаронца набраў 10 (2+8) ачкоў за 38 матчаў. Сапега таксама выходзіў на лёд ва ўсіх чатырох прайграных матчах плэй-оф супраць СКА.
Сяргей адплочваў Вудкрафту за давер практычнай дапамогай не толькі ў гульнях. У першыя гады жыцця за акіянам хакеісту было цяжка з-за дрэннага валодання англiйскай, таму гулец добра падцягнуў мову. У выніку ў «Дынама» менавіта Сапега стаў перакладчыкам слоў Вудкрафта на трэніроўках для хакеістаў, якія па-англiйску яго не разумелі. Праўда, Раман Гарбуноў расказваў, што займаўся гэтым абаронца без асаблівай ахвоты.
У сезоне-2022/23 Сапега пачаў яшчэ больш часу праводзіць на лёдзе – у сярэднім 16:44 замест ранейшых 13:35. За гладкі чэмпіянат Сяргей зарабіў 17 (4+13) балаў у 60 гульнях, а ў шасці матчах плэй-оф са СКА закінуў шайбу і аддаў галявую перадачу. Адзначым, што свой гол абаронца аформіў у меншасці.
«Я правёў добры сезон, але без даверу трэнерскага штаба і каманды такога не было б. Я ўжо адчуваю, што стаў лепшым у параўнанні з мінулым годам. Дзякуй усёй камандзе», – падвёў хакеіст вынікі сезона, які для яго завяршыўся пройгрышам камандзе Лукашэнкі.
У мінулым сезоне Сапега быў другім (саступаў толькі Іллі Шынкевічу) па памеры заробку ў «Дынама» – 10 мільёнаў расійскіх рублёў (133 тысячы долараў).
Добры ў сваёй універсальнасці
Сапега паказвае дастаткова надзейную гульню для свайго ўзросту на ўзроўні КХЛ. Дэф добра выходзіць з-пад ціску і даволі часта гуляе на шайбе – такіх абаронцаў называюць пакмуверамі. Уменні хакеіста ёсць куды развіваць, але ўжо зараз Сапега па сваёй гульні саступаў толькі двум-тром легіянерам з лініі абароны «Дынама» і дакладна глядзеўся на лёдзе не горш, напрыклад, за Шона Лалонда і Джона Гілмара.
Адна з галоўных якасцяў, якая магла прыцягнуць увагу топаў КХЛ да Сапегі, гэта яго рознабаковасць, адсутнасць вузкай спецыялізацыі. Такіх абаронцаў у лізе зараз сапраўды мала. Плюс хакеіст малады і два апошнія сезоны за «Дынама» дэманструе, што можа дадаваць у сваёй гульні.
Калі ў «Металургу» і «Авангардзе» ў Сапега бачылiся б перспектывы на добры айстайм, то ў СКА ростар перапоўнены, і давядзецца змагацца за месца ў заяўцы. Не выключаны пераход да статусу гульца ратацыі ці нават камандзіроўка ў «Сочы», з якім у піцерцаў наладжаны «арэндныя» сувязі.
