Рамантычная трагікамедыя ў Д2: на покліч гульца з пярсцёнкам прыйшоў мужык, абранніцу выпхнуў сцюард – але ў гісторыі хэпі-энд
Дзяўчына экс-футбаліста «Крумкачоў» дакладна запомніць яго прапанову.
У суботу аматары белфутбола ў асноўным глядзелі на развязку вышэйшай лігі – і прапусцілі, як аказалася, самы яркі момант. Ён здарыўся ў Д2, дзе таксама завяршаўся чэмпіянат, у матчы «Смаргоні» і «Хвалі». Гаспадары загадзя выйшлі ў Д1, перамога над пінчукамі не дапамагла ім выйграць чэмпіянат (золата забраў «Нафтан»), але гэта ўсё тут зусім ні пры чым.
Экшн ініцыяваў Уладзіслаў Шубовіч – былы гулец брэсцкага «Руха», «Граніта» і «Крумкачоў», які цяпер выступае за «Смаргонь». Футбаліст вырашыў зрабіць прапанову сваёй дзяўчыне Алене Брык – хоць не так даўно жартаваў з калегам Аляксандрам Яцкевічам, што яшчэ рана.
Збіраўся ўсё зрабіць Шубовіч быццам бы пасля матчу, але тут падвярнулася аказія – пенальці ў чужыя вароты. Мяч аддалі абаронцу, ён забіў – і вырашыў не цягнуць да фінальнага свістка, а ўсё зрабіць тут і цяпер: узяў што трэба, падбег да броўкі і пачаў клікаць дзяўчыну.
Далей адбылася чарада трагікамічных падзей:
– на покліч Шубовіча першым адгукнуўся нейкі мужчына надта магутнай камплекцыі. Ішоў вельмі ўпэўнена – здаецца, з пачуццём гумару і любоўю да імправізацыі ў яго ўсё добра. Вось толькі парыў не ацаніў прэс-сакратар «Смаргоні» Андрэй Маслоўскі – ён дагнаў і адштурхнуў жартаўніка ля самай броўкі;
– да бакавой лініі падаспеў нехта ў манішцы сцюарда з паводзінамі тыповага сілавіка. Гэты персанаж даў у плечы Маслоўскаму, а потым павярнуўся і ўбачыў, як да поля хоча выйсці Брык – Шубовіч чакаў яе на калене. Сцюард успрыняў гэта, відавочна, як спробу грубага парушэння грамадскага парадку – і так хістануў дзяўчыну, што яна адляцела на пару метраў, добра яшчэ, на нагах утрымалася;
– Шубовіч падскочыў і пхнуў ужо сцюарда, да месца падзей паляцелі гульцы «Смаргоні» (Віталь Ліхцін натуральна накрычаў на суперніка ў аранжавым), а стрымліваць сцюарда прыйшоў суддзя матча Антон Лашук;
– Брык паправіла прычоску і вярнулася да броўкi, і Шубовіч зноў стаў на калена.
Нягледзячы на ўвесь стрэс, гісторыя скончылася надзетым кольцам і пацалункам (плюс жоўтай карткай для Шубовiча).
І усмешкай Брык з букетам кветак, які ўвесь час канфлікту трымала ля броўкi іншая дзяўчына.
А ў свой акаўнт Алена выклала пісьменна абрэзаную версію прапановы з подпісам пра каханне.
Што ж, прапанова дык сапраўды незабыўная. Напрыканцы яшчэ пару фота будучай жонкі Шубовіча, з якой ён сустракаецца крыху менш за два гады.
