Яшчэ адна прапанова ў «Смаргоні» абышлася без сцюардаў – афрыканец заручыўся з беларускай, якой дзякаваў у дзень бацькі
На сцэне ўсё прайшло спакойна.
«Смаргонь», якая вярнулася па выніках сезона ў вышэйшую лігу, месяц таму ў момант праславілася на ўвесь футбольны свет – і зусім не вынікам. Віруснае відэа з прапановай рукі і сэрца паўабаронцы каманды Уладзіслава Шубовіча пасля забітага мяча трапіла ў найбуйнейшыя сусветныя паблікі і СМІ: да прыкладу, у Instagram-акаўнце 433 яно сабрала 18,5 мільёна праглядаў і 1,6 мільёна лайкаў (нават для профілю з 57 мiльёнамi падпісчыкаў гэта рэдкі поспех).
Як аказалася, гэта было не апошняе сёлета жаданне гульца «Смаргоні» змяніць сямейны статус. На клубным закрыцці сезона прыклад з Шубовіча ўзяў камерунскі абаронца «мядзведзяў» Крысціян Інтсаен – футбаліст запрасіў сваю дзяўчыну на сцэну і зрабіў ёй прапанову. На гэты раз абышлося без скандалаў.
Крысціян, які ў Беларусі не лічыцца легіянерам (інакш не меў бы права гуляць у Д2), правёў у краіне ўжо тры сезоны: зімой 2020-га ён падпісаў кантракт з «Крумкачамі», а апошнія два гады (уключаючы мiнулы ў «вышцы») афрыканец выступае ў райцэнтры з Гродзенскай вобласці, дзе ён гулец асновы – сёлета правёў 18 матчаў (прапусціў пачатак чэмпіянату з-за траўмы, але далей выходзіў выключна ў старце) і аформіў свой першы беларускі гол (пацярпелі «Баранавічы»).
Выбранніцу футбаліста клічуць Вераніка, з сацсетак пра яе можна даведацца нямногае: сваім горадам яна ўказала Мінск, а месцам атрымання адукацыі – Полацкі лясны каледж.
Адзначым, што пару месяцаў таму футбаліст рэпосціў са сторыс Веранікі вось такое фота з дзіцем і подпісам «Дзень бацькі».
