Праца мары! Танкавы блогер з Мінска запусціў стрым, працягласць якога залежыць ад данатаў гледачоў. Ужо зарабіў вялізную для Беларусі суму
Звычайнаму беларусу можа стаць дрэнна 🥲
2 траўня вядомы YouTube-блогер па World of Tanks Андрэй EviL_GrannY Сомаў (мае 705 тысяч падпісчыкаў), які пражывае ў Мінску, запусціў «бясконцы» стрым, працягласць якога залежыць ад саміх гледачоў. Сутнасць у тым, што кожны іх данат працягвае відэапаток: на дадзены момант, ахвяраванне на адрас Сомава ў памеры 100 расійскіх рублёў = +1 хвіліна.
Падчас стрыму EviL_GrannY у асноўным транслюе тое, як гуляе ў танкі, глядзіць відэа з навінамі пра World of Tanks ад распрацоўшчыкаў і абмяркоўвае са сваёй аўдыторыяй. Сомаў абяцаў пагуляць і ў іншыя гульні.
Як адзначае «Наша Ніва», падчас стрыму ён таксама есць і адпачывае, пакурваючы кальян.
Напярэдадні вечарам распакоўваў новы тэлефон: навінку Xiaomi 13 Ultra цаной у раёне тысячы долараў, якая нядаўна толькі выйшла на рынак.
Таксама блогер абяцае, што будзе паказаны працэс падрыхтоўкі ежы (сапраўды паказвае), і будзе шпацыр па Мінску ў жывым эфіры.
У live-рэжыме Сомаў і спіць, накіраваўшы вэбку на ложак, а на астатняй частцы экрана транслюе раней знятыя відэа.
Так, за час, калі ён спіць, яму таксама плацяць!
Ведаеце, колькі ўжо паспеў зарабіць стрымер? Трансляцыя была распачатая 2 траўня і доўжыцца дагэтуль – за гэты час EviL_GrannY зарабіў каля 11,5 тысяч долараў.
Адзначым, што цяперашні стрым не першы досвед Андрэя Сомава – у мінулым годзе ён запускаў такі ж, які доўжыўся 12 дзён і прынёс блогеру 42 (!!!) тысячы долараў.
Хацелі б гэтак жа?