Новы невытлумачальны правал «Мяшкова» – у плэй-оф дома з запасам прайгралі кітайцам (самай слабай камандзе ЧБ)
Але яшчэ не позна сабрацца.
У брэсцкага «Мяшкова» не найлепшыя часы – ужо другі сезон запар каманда, якая ўнутры Беларусі доўгі час наогул не давала збояў, пагаршае свае вынікі. Так, у ЧБ гэта заключаецца ў тым, што мацнейшай на пастаяннай аснове стала адна каманда – мiнскі СКА. Але для брэсцкага клуба, які ўзяў апошнія дзевяць чэмпіёнскіх тытулаў (мiнулы – з цяжкасцю, у заключным матчы), гэта балюча: адна нічыя і тры паражэнні ад СКА за «гладкую» частку чэмпіянату – не тое, на што разлічвалі ў Брэсце, нягледзячы на ўсе праблемы.
Цяпер у беларускім чэмпіянаце наступіў плэй-оф – першы за шмат гадоў. У ЧБ сем каманд, таму СКА, які выйграў рэгулярку, адправіўся адразу ў паўфінал – а вось «Мяшкову» прыйшлося стартаваць са стадыі 1/4. Праўда, супраць самага слабага суперніка – «Бусла Кітая». Каманда, якую заявілі ў ЧБ, каб паспрабаваць развіць кітайскіх гандбалістаў, за 24 матчы «рэгуляркі» змагла ўчапіць чатыры нічыіх ды дзве перамогі – абедзве над гродзенскім «Кронанам» з перадапошняга месца. «Мяшкоў» кітайскіх супернікаў не заўважаў – перамогі ў 8, 12, 11 і цэлых 16 мячоў, прычым апошняя была 18 сакавіка. Самым яркім эпізодам для «Бусла» супраць Брэста заставаўся «палон» кіпера Хэ Сіньяна, які няўдала вываліўся за рэкламныя шчыты.
Але «Мяшкоў» яшчэ летась паказаў, што ўмее раптам прайграваць закаранелым аўтсайдарам – калі раптам не выйшаў у фінал Кубка Беларусі. Але тады «Мяшкоў» хаця б да апошніх хвілін вёў у ліку – усё выглядала як вельмі балючы, але ўсё ж выпадковы збой у канцоўцы.
Цяперашні матч з «Буслам Кітая» пакінуў значна больш пытанняў. Так, «Мяшкоў» гуляў без асноўнага брамніка Дзяніса Забалоціна. Так, месяц таму прызначаны галоўным трэнерам расіянін Эдуард Какшароў першапачаткова выпусціў на пляцоўку другіх нумароў (а кіпера наогул трэцяга), якія быццам і зрабілі задзел у тры мячы, але потым дазволілі давесці да 8:8. Ужо тады выйшлі на пляцоўку асноўныя Мікалай Алёхін і Аляксандр Падшывалаў, але гэта неяк не дапамагло – кітайскія брамнікі цягнулі, а вось Андрэй Чмель у брэсцкай браме цудаў не рабiў. Вынік – 12:14 да перапынку. Праўда, такі трывожны званочак ужо быў – 8 лютага «Мяшкоў» таксама дома мінімальна прайграў «Буслу» першы тайм, але ў другім прывёз суперніку «+12», так што думалася пра прыкладна такі жа сцэнарый.
З пачаткам другога тайма Какшароў паказаў, што жарты скончыліся – браму заняў Ілля Усік, а «ў поле» выйшлі асноўныя Валянцін Куран, Андрэй Юрынок і галоўны бамбардзір каманды Максім Баранаў. Толькі, як аказалася, былы няўдачнік Хэ Сіньян злавіў кураж і адбіваў кідкі ад каго заўгодна, а яго зменшчык Чжоу Чжэтхаа не дазволіў Баранаву закінуць нават з 7-метровага. У выніку праз восем хвілін пасля перапынку «Мяшкоў» прайграваў ужо 13:19 – і ў гэтай сітуацыі сапраўды патрабаваліся ўжо і топ-дзеянні ад брамнікаў берасцейцаў, але ў іх вароты працягвала залятаць практычна ўсё.
Кітайцы перыядычна памыляліся самі – і разам з парай сэйваў гэта дазволіла «Мяшкову» да сярэдзіны тайма наблізіцца да суперніка на адлегласць у тры мячы. Аднак большага дасягнуць не ўдалося – тыя ж кітайцы, якія да гэтага дня больш за 30 мячоў маглі закінуць толькі «Кронану», зараз проста рвалі абарону знакамітага суперніка. У той час, калі відаць было апошнія шанцы адыграцца, брэсцкая каманда пастаянна дазваляла супернікам прарвацца індывідуальна або знайсці забытага партнёра пасам у лінію – а адзін гол папросту падарылі.
Вынік – сенсацыйная перамога кітайскіх андэрдогаў 35:30. Адразу пасля фінальнай сірэны гульцы гасцей зладзілі эмацыйнае пераможнае кола.
Пры гэтым для «Мяшкова» яшчэ нічога не страчана. Хто ведае, раптам гэты матч стане ўзрушэннем, якое дапаможа не толькі выйграць чвэрцьфінальную серыю да дзвюх перамог, але і ў самы патрэбны момант адолець СКА. А ў сярэдзіне красавіка брэсцкаму клубу гуляць яшчэ і ў чвэрцьфінале SEHA-лігі – карацей, ёсць за што пазмагацца, калі сабрацца.
