Сыны Квартальнава труцца ля мінскага «Дынама»: старэйшы займеў у складзе трох кліентаў, а малодшага, здаецца, узялі ў фарм
І вось усю кар'еру такія супадзенні!
У панядзелак стала вядома, што малодшы сын новага галоўнага трэнера мінскага «Дынама» Дзмітрыя Квартальнава Аляксандр праходзіць прагляд у «Дынама-Маладзечне». Паводле інфармацыі расійскага хакейнага інсайдэра Аляксея Шаўчэнкі, 20-гадовы правы форвард ужо заключыў кантракт з фармам «зуброў».
Да паездкі ў Маладзечна хакеіст трэнаваўся ў бацькі ў «Дынама». Мяркуючы па тым, што нападаючы зʼехаў ад «зуброў», камандзе КХЛ ён не падышоў, аднак усё спрабуе застацца (а можа, ужо застаўся) у дынамаўскай структуры.
«Іншы сын-агент дае зразумець, што супраца з ім прынясе месца ў мінскім «Дынама». Клуб з Беларусі – гэта цяпер нейкая кармушка ці што?» – напісаў Шаўчэнка.
Карʼера Аляксандра Квартальнава пакуль складваецца даволі сціпла. Выхаванец маскоўскіх «Крылаў Саветаў» у сярэдзіне «дзясятых» апынуўся ў структуры ЦСКА, калі першую каманду ўзначальваў ягоны бацька. На моладзевым узроўні нападаючы пачынаў у «армейцаў». Сезон-2019/20 правёў у МХЛ, дзе выступаў за «Спартак» (2+3 у 28 матчах), а наступную рэгулярку пачаў у Казані, дзе апынуўся пасля абмену. Па супадзенні «Ак Барс» на той момант ужо ўзначальваў бацька хакеіста. Агентам нападаючага быў брат Мікіта, якога тады абвінавачвалі ў прасоўванні сямейных інтарэсаў, але той спрытна сыходзіў ад адказу, прыкрываючыся іншымі (больш паспяховымі) прыкладамі.
Пасля сезону ў МХЛ (14+13 у 54 матчах) у верасні 2021-га Квартальнаў-малодшы ўпершыню аказаўся ў заяўцы «Ак Барса» на матч КХЛ. Бацька тлумачыў гэта моладзевым лімітам лігі – у ростары на гульню павінен быў прысутнічаць мінімум адзін хакеіст 2002 года нараджэння або маладзейшы. Ну а яшчэ галоўны трэнер вырашыў даць падапечнаму «падыхаць вялікай камандай». У большасці выпадкаў Аляксандра запісвалі ў пратакол 13-м нападаючым. Агулам за рэгулярку-2021/22 Квартальнаў 21 раз трапляў у заяўку, але зʼявіўся на лёдзе толькі восем разоў, маючы сярэдні айстайм 3:41. Таксама ў тым сезоне форварда адпраўлялі ў фармы з ВХЛ і МХЛ.
У красавіку 2022-га кіраўніцтва «Ак Барса» не стала працягваць кантракт з Дзмітрыем Квартальнавым. Аналагічнае рашэнне было прынятае і па ягоным малодшым сыне. Міжсезонне-2022 атрымалася для хакеіста багатым на падзеі. У траўні хакеіст вярнуўся ў «Спартак», але супраца працягнулася толькі да 1 жніўня таго ж года – «чырвона-белыя» абвясцілі пра скасаванне кантракту па дамове бакоў. Праз тыдзень Квартальнаў усплыў у «Куньлуне», з якім падпісаў пробны кантракт – кітайскі клуб паўнавартаснае пагадненне ў выніку так і не прапанаваў.
Але прадстаўнік хакейнай дынастыі не застаўся без клуба. У дзень стартавага матчу сезона-2022/23 Квартальнаў падпісаў на сезон двухбаковы кантракт з «Адміралам». За Уладзівасток у КХЛ ён так і не згуляў: у верасні-кастрычніку 13 разоў трапляў у заяўку на матчы, але ні разу не выйшаў на лёд. Восем матчаў за «Ак Барс» бацькі – вось і ўсё, што Квартальнаў-сын нагуляў у расійскай топ-лізе. Папярэдні сезон ён дакочваў у МХЛ за «Тайфун» і «Крылы Саветаў», у суме набраўшы 3+8 за 35 матчаў.
Пасля прызначэння Дзмітрыя Квартальнава ў Мінск шмат гаварылася пра ягонага старэйшага сына, які займаецца агенцкай дзейнасцю. Мікіту Квартальнава вінавацілі ў спробах прымусіць хакеістаў «Дынама» падпісаць з ім як агентам пагадненне пад пагрозай немагчымасці працягваць карʼеру ў клубе. Аналагічныя прапановы нібы паступалі патэнцыйным навічкам «зуброў».
У свежым інтэрвʼю «Спорт-Экспрэсу» Мікіта Квартальнаў прызнаўся, што на сёння трое гульцоў у складзе «зуброў» маюць з ім кантракт. Называць прозвішчы агент не пажадаў, але зазначыў, што супраца нібыта пачалася да таго, як ягоны бацька атрымаў прызначэнне ў клуб. Верыце?
