АБФФ цалкам выкупіць «Прэсбол», а яшчэ мае намер узяць пад кантроль буйны футбольны паблік (там ужо згодныя)
Шарснёў стварае (медыя)імперыю?
Зусім нядаўна «Трыбуна» пісала, што адлік жыцця «Прэсбола» ідзе на дні. Газета адчувала сурʼёзныя фінансавыя праблемы. Яны абвастрыліся пасля таго, як у чэрвені-2023 лукашэнкаўскае міністэрства па цэнзуры заблакавала сайт выдання. Менавіта сайт прыносіў рэдакцыі большасць фінансаў. Пасля блакавання эканоміка газеты пайшла пад адхон. Аклады журналістам прыбралі, плаціць сталі толькі за апублікаваныя матэрыялы – заробак некаторых аўтараў асеў удвая.
Дырэктар «Прэсбола» Юры Арлоў у гэты крызісны перыяд актыўна хадзіў на перамовы да кіраўніка Беларускай федэрацыі футбола Мікалая Шарснёва. АБФФ да нядаўняга часу валодала 50 працэнтамі акцый ТАА «Прэсбол-91», з чаго можна было меркаваць, што федэрацыя зацікаўленая ў існаванні праекту. Аднак Шарснёў не спяшаўся дапамагаць фінансамі. Арлова да апошняга цягнуў выданне за ўласныя сродкі, а таксама на грошы ад падпіскі і розніцы.
Аднак у пятніцу 6 кастрычніка на чарговым пасяджэнні выканкаму АБФФ было прынятае рашэнне аб тым, што федэрацыя выкупіць усе долі ТАА і стане аднаасобным уласнікам «Прэсбола». Выкупляць долі давядзецца ў экс-журналіста газеты Дзмітрыя Беленькага (10 працэнтаў) і Аляксандра Дабрыяна, які сёння фактычна выконвае абавязкі галоўнага рэдактара «Прэсбола» (10), а таксама непасрэдна ў Арлова (30).
Нам пакуль невядома, якія планы ў федэрацыі адносна «Прэсбола». Ці будзе яна дабівацца разблакавання сайта пад уласныя гарантыі? Або ўключэння газеты ў падпісны каталог на 2024 год, дзе «Прэсбол» адсутнічае? Гэта тыя пытанні, якія сёння на парадку дня. Пры гэтым мы дакладна ведаем, што АБФФ праяўляе вялікую цікавасць да яшчэ аднаго медыярэсурсу. Гэта не газета і нават не сайт, аднак там ёсць сурʼёзная аўдыторыя, якая дакладна цікавая федэрацыі.
Па нашых звестках, АБФФ у апошні час вядзе актыўную камунікацыю з паблікам «Беларускі футбол». Гэты медыярэсурс ад моманту заснавання ў сакавіку-2013 сканцэнтраваны на асвятленні футбольных падзей у Беларусі. Як сказана ў апісанні старонкі «Беларускага футбола» ва «УКантакце» – «Усе самыя свежыя навіны нашага футбола, анлайн матчаў, а таксама шмат чаго іншага». Акрамя пляцоўкі ва «УКантакце» (група налічвае 52 тысячы падпісчыкаў) у «БФ» ёсць каналы ў «Тэлеграме» (6800), Tik-Tok (7000, у сярэднім кліпы праглядаюць па 30-50 тысяч чалавек), Instagram (16000).
Пры гэтым нідзе не пазначана, хто кіруе паблікам, хто стварае кантэнт і хто яго публікуе. Вядома, што адным з заснавальнікаў пабліка быў барысаўскі журналіст і футбольны энтузіяст Вячаслаў Мігуцкі. У снежні 2021 года ён пайшоў з жыцця – верагодна, учыніўшы суіцыд. Да апошняга ён заставаўся адным з кіраўнікоў і аўтарам «БФ».
Адным з адміністратараў старонак «БФ» быў Раман Качына, якога летам-2022 схапілі лукашэнкаўскія сілавікі. Тады малады чалавек сумяшчаў дзейнасць адміна з працай у «Прэсболе» і збіраўся паступаць у Інстытут журналістыкі БДУ (і ў выніку паступіў).
Нам толькі ўдалося высветліць, што сёння паблікам кіруюць тры партнёры ва ўзросце да 30 гадоў. Усе яны не звязаныя з прафесійным футболам, аднак вельмі любяць гэты спорт. Навіны і розныя матэрыялы для «БФ» пішуць з дзясятак чалавек.
Ніхто з аўтараў, як і кіраўнікоў, не атрымлівае грошай за сваю працу. Пры гэтым у пабліка бываюць рэкламныя калабарацыі. Напрыклад, проста цяпер на карцінках «Беларускага футбола» ў сацыяльных сетках размяшчаецца лога букмекерскай кампаніі Betera.
Па нашых звестках, кіраўнікам пабліка з АБФФ паступіла прапанова абʼяднацца, каб разам расказваць пра беларускі футбол. Як бачыць супрацу АБФФ? Федэрацыя хоча сумесна з «БФ» стварыць ТАА (зрэшты, у святле апошніх навін не выключана, што ТАА застанецца ранейшым – «Прэсбол-91»), запусціць паўнавартасны сайт у даважку да пляцовак у сацсетках і пісаць там пра футбол. Як нам вядома, «Беларускі футбол» яшчэ да пачатку дыялогу з федэрацыяй прыступіў да стварэння ўласнага сайта (не выключана, што якраз на гэты праект сыходзілі грошы рэкламадаўцаў, рэліз рэсурсу можа адбыцца ўжо ў лістападзе). Гэта толькі падагравала ўвагу з боку АБФФ.
У «БФ», наколькі нам вядома, да перспектывы калабарацыі з АБФФ ставяцца з энтузіязмам. Аўтары, якія пішуць для пабліка, спадзяюцца, што ў іх можа зʼявіцца рэальная праца ў СМІ і заробкі, а ў тых, хто вучыцца на журфаку (сярод аўтараў пабліка ёсць студэнты), атрымаюць камфортны варыянт для размеркавання.
У апошні час прапрацоўвалася пытанне аб дадатковым кадравым рэсурсе для новага, па сутнасці, футбольнага сайта. Паводле нашай інфармацыі, АБФФ у выпадку запуску сумеснага праекту да ўжо наяўных аўтараў «БФ» мела намер запрасіць журналістаў з «Прэсбола». У першую чаргу тых, хто піша менавіта пра футболе (што тады будзе з іншымі, невядома). Сярод магчымых кіраўнікоў медыяпраекта, паводле нашай інфармацыі, разглядаўся Дабрыян.
Па нашай інфармацыі, для часткі людзей, якія звязаныя з «БФ», рашэнне федэрацыі выкупіць юрыдычную асобу «Прэсбола» стала нечаканасцю, пры гэтым яны вераць, што супраца з АБФФ у той ці іншай форме ўсё роўна адбудзецца.
