Падобна, што закупам Базанава ў Польшчы надышоў канец – на мяжы з былым босам АБФФ здарылася неспадзяванка
А пасля яму зладзілі лупцоўку.
Уладзімір Базанаў – чалавек-парадокс. З аднаго боку – адкрыты лукашыст, які, займаючы пасаду кіраўніка Беларускай федэрацыі футбола, праводзіў пасля выбараў-2020 рэпрэсіі ў сваім відзе спорту. Пры гэтым – вялікі аматар ездзіць па пакупкі ў Еўропу, што ў часткі беларусаў выклікала здзіўленне. Іх здзіўляла не тое, што Базанаву да спадобы еўрапейскі шопінг, а тое, што еўрапейцы ў прынцыпе яго пускаюць на сваю тэрыторыю. Так, здараліся непрыемнасці (чэхі высылалі футбольнага боса за «палітычную» дзейнасць), але пасля гэтага ўдалося атрымаць новы Шэнген і як мінімум ездзіць у Польшчу «на закупы» (1, 2). Але днямі Базанаў даведаўся, што і гэтая опцыя для яго закрылася. У яго ўвогуле больш няма магчымасці заехаць у ЕЗ па зямлі (а з Беларусі самалёты ў Еўропы не лятаюць). І візы для паездак як мінімум у сапраўдны момант у гора-кіраўніка таксама няма. На гэтым фоне яго падпільнавала яшчэ адна непрыемнасць.
Што здарылася?
27 кастрычніка 2023 года жаночая зборная Беларусі праводзіла нібыта дамашні матч Лігі нацый супраць Славеніі. Пасля прымусовай пасадкі самалёта з Раманам Пратасевічам у траўні-2021 супернікі ў большасці сваёй не маюць магчымасці прыляцець у нашу краіну праз перакрытую паветраную прастору, і таму намінальна дамашнім стадыёнам для беларускіх каманд стала арэна імя «Феранца Сусы» ў Будапешце (там жа мужчынская «нацыяналка» 12 кастрычніка гуляла з Румыніяй). Дзяўчаты выехалі за некалькі дзён да сустрэчы са славенкамі праз Літву, адкуль, па нашых звестках, рэйсам Вільня – Варшава – Будапешт дабраліся да пункту прызначэння.
Суправаджаць зборную ў гэтай паездцы мусіў намеснік старшыні Беларускай федэрацыі футбола Уладзімір Базанаў, бо ён яшчэ і займае пасаду старшыні камітэту па жаночым футболе. Прычым, паводле нашых звестак, ехаць ён збіраўся ў кампаніі жонкі. Праўда, маршрут у пары адрозніваўся ад таго, які абрала каманда. Прычына – з 20 лістапада 2020 года Базанаў знаходзіцца ў санкцыйных спісах Літвы, Латвіі і Эстоніі праз удзел у паслявыбарных рэпрэсіях (роўна як псеўдаміністр спорту Сяргей Кавальчук, экс-кіраўнік федэрацыі хакея Дзмітрый Баскаў і былы баец Дзмітрый Шакута ў кампаніі яшчэ амаль трох лукашыстаў). Базанаву закрыты ўезд на тэрыторыі Прыбалтыкі, адпаведна, і вылецець з Вільні ён не мог.
Кемлівы палкоўнік-артылерыст узяў курс на апрабаваны кірунак – на Польшчу. Да суседзяў, якіх не стамляецца пляжыць прапаганда, Базанаў рэгулярна выбіраўся на «закупы». Калі ў траўні гэтага года польскае МЗС апублікавала свае спісы неўязных служак Лукашэнкі, то ўраджэнца Расіі сярод іх не аказалася ў адрозненне ад генеральнага сакратара федэрацыі Сяргея Жардзецкага і ейнага былога першага намесніка Юрыя Вяргейчыка.
Аднак гэтым разам спроба заехаць на польскую тэрыторыю аказалася няўдалай. Калі на беларускім пункце пропуску з боку Брэста ў былога так званага дэпутата праблем не ўзнікла, то палякі прапускаць яго адмовіліся. Як патлумачыў польскі бок сваё рашэнне (і ці патлумачыў увогуле), мы не ведаем. Аднак адзначым, што, згодна з 14-м артыкулам Шэнгенскага кодэксу, пры адмове ва ўездзе ставіцца штамп з літарай, якая абазначае прычыну адмовы. Таму пры жаданні Базанаў можа яе даведацца хаця б прыблізна.
Таксама, паводле нашых звестак, польскі бок у прынцыпе ануляваў намесніку старшыні АБФФ шэнгенскую візу, то бок сёння ён не можа патрапіць ні ў адну з краін Еўразвяза.
Такім чынам, за «хатнім» матчам жаночай зборнай Беларусі са Славеніяй 27 кастрычніка, а таксама за гульнёй у адказ, якая прайшла праз чатыры дні, Базанаў назіраў ужо з Беларусі.
Гэта не першая непрыемнасць для функцыянера, што звязана з ЕЗ. Якраз два гады таму яшчэ ў статусе кіраўніка АБФФ Базанава выслалі з Чэхіі, дзе ён таксама збіраўся скласці кампанію жаночай зборнай. І тады пакідаць несяброўскую краіну давялося разам з жонкай. І таксама не абышлося без анулявання шэнгенскай візы (была выдадзена Венгрыяй па запыце УЕФА).
Тым не менш, пасля інцыдэнту палкоўнік знаходзіў магчымасць закупляцца ў Польшчы.
Замест таго, каб шпацыраваць па Будапешце, слухаў разнос ад трэнера
Пасля няўдалага заезду ў ЕЗ Базанава чакала яшчэ адно не самае прыемнае выпрабаванне. 31 кастрычніка ў офісе АБФФ праходзіла працоўная сустрэча з прадстаўнікамі клубаў вышэйшай і першай ліг. Ад федэрацыі прысутнічалі кіраўнік, ягоныя намеснікі, у тым ліку Базанаў, тэхнічны дырэктар, а таксама начальнік дэпартаменту па правядзенні спаборніцтваў і кіраўнік дэпартаменту ліцэнзавання. Ад клубаў на сустрэчу былі запрошаныя дырэктары і галоўныя трэнеры.
З Гродна прыехаў у тым ліку Ігар Кавалевіч, які, груба кажучы, зладзіў жорсткую «лупцоўку» якраз Базанаву і ягонай камандзе часоў кіравання ў АБФФ. Новы бос федэрацыі прапанаваў усім без хітрыкаў распавесці, што іх хвалюе і што ў прынцыпе не падабаецца. Кавалевіч без сарамлівасці жорстка раскрытыкаваў усе тыя рэформы, якія праводзіліся, калі экс-ваенны быў галоўным у белфутболе. Больш за ўсё прадстаўнік Гродна абураўся праз ліміт на маладых гульцоў. Пра тое, што ліміты – гэта трызненне, галоўны трэнер «Нёмана» заявіў нядаўна і ў праграме «Вынікі тыдня» на лукашэнкаўскім ТБ.
Было нямала прэтэнзій у Кавалевіча і з іншых нагодаў. Базанаў, паводле нашай інфармацыі, сядзеў і слухаў гэтыя тырады на свой адрас замест таго, каб гуляць з жонкай па Будапешце і глядзець футбол.
Фота: abff.by
