У Англіі адбылося неверагоднае – заўзятар стаў лайнсменам падчас матча! Асноўны бакавы і 4-ы арбітр траўміраваліся

У англійскай Лізе 1 (трэці дывізіён) з матчаў 19 жніўня больш за ўсё запомніўся адзін з трох, у якім не было галоў. «Портсмут» і «Чэлтнем» згулялі 0:0, але гэты матч дакладна будуць абмяркоўваць.

Усё з-за даволі рэдкай анамаліі – працы заўзятара лайнсменам.

• У першым тайме матча, на 37-й хвіліне, лайнсмен пацягнуў ікраножную цягліцу – яго, па рэгламенце, замяніў чацвёрты арбітр матча.

• У другім тайме, на 57-й, ікраножную цягліцу пацягнуў ужо сам чацвёрты арбітр – гульню прыйшлося спыняць і шукаць рэферы сярод заўзятараў.

Падчас гэтага перапынку адбылася зусім незвязаная з гэтым, але таксама незвычайная падзея – дзіцё выбегла на поле і зрабіла сальта.

Замену лайнсмену ўсё ж знайшлі – сярод заўзятараў гаспадароў.

• Гэтым добраахвотнікам аказаўся рэферы мясцовай лігі Джуліян Браўнінг. Неўзабаве ён з'явіўся на лініі і дапамог працягнуць матч – прычым рабіў гэта ў пазалочаных буцах.

• Сам Браўнінг распавёў пасля матча, як збіраў сабе рыштунак на хаду:

«Я быў у шортах і красоўках. Я атрымаў ад другога памочніка рэферы форму, шорты і шкарпэткі, якія былі запаснымі ў іншага суддзі, і знайшоў пару залатых буцаў у распранальні. Калі ўжо і хочацца, каб ваша прысутнасць была прыкметнай, то чаму б не абуць залатыя буцы, а?»

• Абодва трэнеры былі ўдзячныя за тое, што матч усё ж дайгралі дзякуючы фанату-добраахвотніку. Галоўны трэнер «Портсмута» Джон Маўзінью распавёў, што матч увогуле маглі прыпыніць, калі б не знайшлі новага лайнсмена:

«Існаваў шанец, што гульню могуць адмяніць, таму што ніхто не ведаў нічога пра мужчыну, які спусціўся да нас. Аднак для мяне гэта не было асаблівай праблемай, бо ён прыйшоў з нашай паўднёвай трыбуны! Ён быў кваліфікаваным арбітрам і, дзеля справядлівасці, «Чэлтнем» таксама былі рады працягу гульні. Гэта быў сюррэалістычны дзень, але я не лічу, што гэты інцыдэнт з'яўляецца прычынай таго, што мы не змаглі забіць».

А коўч «Чэлтнема» Уэйд Эліят увогуле назваў яго найлепшым суддзёй:

«Я думаю, што ўсе яны (суддзі – заўв.) павінны з'есці кары і выпіць чатыры пінты піва да таго, як выходзіць на поле, гэта, здаецца, зрабіла сваю справу. Ён быў, мабыць, найлепшым рэферы, які ў нас быў у гэтым годзе. Я хваляваўся, калі ён падышоў і прывітаўся з паўночнай трыбунай, але гэта адна з тых рэчаў – гульцы вельмі добра справіліся з гэтым. Было б лёгка страціць фокус».

• Хаця Браўнінг да апошняга вагаўся, ці варта яму выходзіць на поле:

«Нам было цікава, што адбываецца. Кожны, хто сядзіць вакол мяне, ведае, што я мясцовы арбітр, не бліскучага ўзроўню. Спачатку я быў крыху няўпэўнены. Яны зрабілі аб'яву другасна, і я падумаў: «Ох, а што я страчу?» Я не быў на газоне «Фратан Парк» з таго часу, як мне было 11 гадоў, калі я гуляў у фінале школьнага кубка ў 1978 годзе.

Я вялізны прыхільнік «пампеяў», я быў з клубам 50 гадоў, я заўсёды быў уладальнікам сезоннага квітка. Адрэналін падняўся. Мяне хвалявалі дзве рэчы – адна, калі здарыцца спрэчнае рашэнне, а таксама калі «Портсмут» заб'е, як я буду рэагаваць?»

Фота: portsmouth.co.uk