Во як бывае: людзі, якія не сталі зоркамі ў ЧБ, раптам апынуліся ў чэмпіянаце Нідэрландаў. А таго, хто не падышоў Гурэнку, выбраў «Аякс»
Здзіўляемся.
Здавалася б, дзе чэмпіянат Беларусі, а дзе чэмпіянат Нідэрландаў. У нас няма ні «Аякса» з ПСВ, ні бесклапотнай гульні, ні вясёлых заўзятараў на трыбунах. І ўсё ж – пэўная сувязь ёсць. Бывае, што футбалісты, не загуляўшы ў ЧБ, раптам аказваюцца ў нідэрландскім футболе. Вось вам два свежыя прыклады і яшчэ адзін, пра які вы ўжо маглі забыцца.
Не спадабаўся мінскаму «Дынама», але перайшоў у «Аякс»
У нядзелю «Аякс» паведаміў пра пятае падпісанне ў бягучае трансфернае акно. За 3 мільёны еўра амстэрдамцы набылі ў «Санкт-Паўлі» цэнтральнага абаронцу Якава Медыча, заключыўшы з навічком кантракт на пяць гадоў. Два апошнія сезоны 24-гадовы харват стабільна гуляў за гамбургцаў у другой Бундэслізе, адпрацоўваючы 400 тысяч еўра, што былі сплачаныя прадстаўніку нямецкага Д3 «Веэну».
У пачатку 2018-га Медыч мог апынуцца ў мінскім «Дынама», калі каманду ўзначальваў Сяргей Гурэнка. На той момант балканец зʼяўляўся футбалістам «Вінаградара» з харвацкага Д3 (усяго толькі) і ацэньваўся парталам Transfermarkt у 50 тысяч еўра.
У студзені 2018-га Медыч прылятаў на прагляд у Мінск і нават прымаў удзел у спарынгу з «Коўна Жальгірысам» на пазіцыі правага цэнтральнага абаронцы. Клуб заяўляў пра тое, што бярэ 19-гадовага замежніка з сабой на збор у Турэччыну, але пасля з’явілася інфармацыя пра тое, што дынамаўцы не збіраюцца падпісваць Медыча.
Спачатку ў тэксце гаварылася, што Медычы не прыязджаў на прагляд у «Дынама» – маўляў, ад ягоных паслуг адмовіліся пасля прагляду відэанарэзкі. Гэтая інфармацыя не адпавядае рэчаіснасці. Прыносім прабачэнні чытачам.
Праз паўгода Якаў апынуўся на алоўку скаўтаў «Нюрнбергу». Нямецкі клуб падпісаў харвата як вольнага агента і адправіў набірацца досведу ў сваю другую каманду, якая выступала ў Д4.
Былы салігарчанін запальваў у Ізраілі і канфліктаваў у зборнай
На наступны дзень пасля падпісання «Аякса» пра свой трансфер абвясціў «Херэнвен». Серадняк Эрэдывізі выклаў 1,2 мільёна еўра за 24-гадовага нападаючага Іона Нікалаеску. Яшчэ некалькі гадоў таму малдаванін выступаў у беларускай вышэйшай лізе. Летам 2018-га «Зімбру» адпусціў форварда ў «Шахцёр» за 100 тысяч еўра, адкуль той праз паўтара года адправіўся на паўсезона ў арэнду да «Віцебску».
І калі ў Салігорску малады футбаліст за спінамі Мікалая Януша, Дарка Бодула і Дзяніса Лапцева ўвогуле не атрымаў шанцу (выйшаў на поле ўсяго ў 15 матчах, прычым пераважна ў канцоўках, і не набраў ніводнага пункта), то ў Віцебску ў сезоне-2020 за 18 матчаў выбіў 9+1 (у тым ліку рэалізаваў чатыры пенальці) і ў верасні таго года за 250 тысяч еўра зʼехаў у славацкі ДАК.
Мінулы сезон Нікалаеску правёў у «Бейтары» – серадняку чэмпіянату Ізраіля. Аднак нават у такой камандзе нападаючаму ўдавалася быць навідавоку ў адрозненне ад таго ж беларуса Івана Бахара. З 15 мячамі ў 27 матчах Іон стаў чацвёртым бамбардзірам чэмпіянату. Дапамагаў малдаванін і партнёрам – на ягоным рахунку шэсць галявых перадач і пятае месца сярод распасоўшчыкаў. Амаль усе матчы сезону Нікалаеску правёў ад званка да званка, што ўдаецца далёка не кожнаму форварду.
Таксама Іон можа пахваліцца перамогай у Кубку Ізраіля. У траўні 2023-га «Бейтар» у фінале разграміў «Макабі» з Нетаніі 3:0. Першы гол у тым матчы на свой рахунак запісаў якраз Нікалаеску.
Ужо пасля сезону ў Ізраілі форвард адправіўся ў зборную Малдовы на матчы кваліфікацыі ЧЕ-2024. Спачатку правёў крыху больш за гадзіну супраць Албаніі (0:2), а затым стаў суаўтарам сенсацыйнай хатняй перамогі над Польшчай (3:2). На перапынак гаспадары пайшлі пры ліку 0:2, але ў другім тайме Нікалаеску аформіў дубль (адзнакі 0:26 і 1:01), а на 85-й хвіліне Малдове ўдалося вырваць тры балы – 3:2. Цяпер у малдаванаў пяць балаў пасля чатырох матчаў і трэцяе месца ў групе.
Пры гэтым у лістападзе 2022-га Нікалаеску быў адлічаны са зборнай галоўным трэнерам Сяргеем Клешчанкам. Прычынай сталі паводзіны футбаліста перад таварыскімі матчамі з Азербайджанам (1:2) і Румыніяй (0:5). Нападаючы балюча рэагаваў на заўвагі коўча і самавольна пакінуў трэнаванне. Пасля такога выбрыка Клешчанка адправіў футбаліста дадому. На гэтым гісторыя не скончылася. Неўзабаве Нікалаеску апублікаваў у сацсетках зварот, дзе ў сваё апраўданне напісаў, што «яму былі створаныя непаважлівыя ўмовы». Да пачатку наступнага збору нацкаманды Нікалаеску і Клешчанка ўлагодзілі канфлікт.
Сезон-2023/24 Іон пачаў у «Бейтары». Разам з камандай прайграў у Суперкубку «Макабі» з Хайфы (1:3), а затым вылецеў у другім раўндзе кваліфікацыі Лігі канферэнцый ад ПАОКа (0:0, 1:4). Праз некалькі дзён пасля еўракубкавай няўдачы нападаючы ўжо пазаваў у форме «Херэнвена».
Экс-гулец БАТЭ стаў самым дарагім у сваім клубе
Не блішчэў у Беларусі і Вілум Вілумсан. Пасля продажу зімой-2018/19 Мірка Іванавіча ў «Црвену Звезду» кіраўніцтва БАТЭ пачало шукаць замену сербу. У тое трансфернае акно барысаўцы зрабілі адно набыццё ў цэнтр поля, выклаўшы чвэрць мільёна еўра за на той момант 20-гадовага гульца моладзевай зборнай Ісландыі. Вілумсан даволі доўга адаптаваўся ў вышэйшай лізе, часта заставаўся на лаўцы запасных. Паўабаронцу ўдалося стрэліць толькі на чацвёрты сезон у Беларусі – за першы круг чэмпіянату-2022 Вілум набраў 4+3 у дзесяці матчах.
Гэтага хапіла, каб летам таго года падпісаць двухгадовы кантракт з «Гоў Эхед Іглз». Узамен БАТЭ атрымаў грашовую кампенсацыю, памер якой не сталі раскрываць. Аднак вядома, што «жоўта-сінія» за трансферы Вілумсана і Аляксандра Філіпавіча ў «Партызан» сумарна зарабілі ў раёне 250-300 тысяч еўра.
Час, каб разварушыцца ў чэмпіянаце Нідэрландаў, ісландцу практычна не спатрэбіўся. Вілумсан хутка стаў гульцом старту і стабільна праводзіў на полі па 90 хвілін. За сезон паўабаронца выйшаў у 27 матчах, набраўшы 8+3 па «гол+пас». Вілуму ўдавалася паражаць вароты топавых клубаў Эрэдывізі. У кастрычніку 2022-га ў канцы матчу з «Аяксам» ён прынёс сваёй камандзе сенсацыйную нічыю 1:1 (адзнака 6:25).
Таксама на рахунку Вілумсана мячы ў вароты «Тветне» (1:1) і АЗ (1:4), якія стабільна прадстаўляюць Нідэрланды ў еўракубках. «Гоў Эхед Іглз» завяршыў сезон на 11-м месцы з агульных 18, што стала найлепшым вынікам з 1986 года.
У Эрэдывізі ісландзец паказвае сябе разнапланавым футбалістам. Калі ў БАТЭ яго выкарыстоўвалі выключна ў цэнтры поля, то ў «Гоў Эхед Іглз» Вілум можа выйсці і на правым флангу атакі, і нават адзіным форвардам.
За год у Нідэрландах паўабаронца моцна дадаў у трансферным кошце. Калі пры пераходзе з БАТЭ Вілумсана ацэньвалі ў 400 тысяч еўра, то за мінулы сезон лічба ўзрасла да 1,3 мільёна еўра. Сёння экс-барысавец – самы дарагі футбаліст «Гоў Эхед Іглз» і 12-ы па кошце сярод усіх ісландцаў.
