Шаранговіч – у Мексіцы, Протас – у Дамінікане. Падчас паўзы ў НХЛ гульцы з Беларусі зладзілі для семʼяў люксавы адпачынак
Кошт нумара за суткі – каля тысячы долараў.
У рэгулярным чэмпіянаце НХЛ наступіла невялікая паўза – ліга рыхтуецца да матчу зорак, які пройдзе 3 лютага. Беларускія гульцы вырашылі скарыстацца перапынкам і адпачыць.
Хакеіст «Калгары» Ягор Шаранговіч, у якога гэты сезон складаецца вельмі ўдала (выбіў ужо 35 пунктаў у 49 матчах сезона), разам з жонкай і сынам адправіўся ў Мексіку. Мяркуючы па геатэгу, сям'я спынілася на прыватным паўвостраве Пунта Міта, які з трох бакоў аточаны 15 кіламетрамі пляжаў і бухт Ціхага акіяна. Выглядае шыкоўна.
Аляксей Протас, які нядаўна падоўжыў сваю супрацу з «Вашынгтонам» (мае 3+15 у 46 гульнях сезона) і патрапіў пад лёгкі тролінг партнёраў, якія скандавалі яму «мільянер» перад адным з матчаў, абраў для сямейных вакацый Дамініканскую Рэспубліку. Сямʼя адпачывае ў гатэлі Hyatt Zilara Cap Cana на папулярным пляжы Хуанільё.
Як заяўлена на сайце гатэлю, ён прадстаўляе сабой «трапічны рай, дзе госці могуць папесціць сябе раскошай па сістэме «ўсё ўключана» ў атачэнні мясцовай культуры, цудоўных відаў на акіян і такіх неверагодных зручнасцяў, як прасторныя басейны з барамі, аквапарк з лянівай ракой і горкамі, 25 унікальных рэстаранаў і бараў, фітнес-цэнтр сусветнага класа і многае іншае». За нумар у такім гатэлі гасцям давядзецца выкласці прыстойную суму.
Жонка Протаса Таццяна ў сваім інстаграм падзялілася ўражаннямі ад гатэля і падзякавала за рэкамендацыю сяброўцы хакеіста «Вашынгтона» Аляксандра Аляксеева.
«Ідэальна, што комплекс дзеліцца на дзве часткі (як два розных гатэля) адзін з дзецьмі, іншы толькі 18+.
І ты можаш наведваць увесь комплекс (рэстараны, бары, кавярні, забаўкі), усё што душы заўгодна, але выконваючы вызначэнне правіла на тэрыторыі гатэля 18+.
А праз тое, што ў нас клубны доступ, то наогул куча плюшак вельмі класных.
Вельмі смачна ўсюды і крута, што есць асобны healthy restaurant.
Велізарная штодзённая праграма для дарослых і дзяцей, і яна рэальна цікавая (гульні, маляванне, спорт, шоў), карацей кожны дзень нешта новае.
І самае прыемна, што ўсё ўключана і не трэба пра нешта думаць».
