Валерый Жукоўскі: «Мне 39 - якія ў мяне могуць быць варыянты? Звалі «Барселона», «Чэлсі», але больш спадабалася прапанова Пунтуса»

Беларускі паўабаронца Валерый Жукоўскі распавёў пра сыход з «Макслайна» (Д2) і свае планы.

У 14 матчах чэмпіянату ў першай лізе ён забіў 3 мячы і аддаў 4 галявыя перадачы.

– Кантракт заканчваецца, і я сышоў. Датычна этапу кар'еры ў «Макслайне» пытанняў няма – толькі станоўчыя эмоцыі. З боку клуба ўсё было добра. Усё, што мне паабяцалі, яны зрабілі. Як з майго боку – не ведаю. Наколькі задаволены маёй гульнёй – гэта ў іх трэба пытацца. Няхай ацэньваюць іншыя. Футбалістам цяжка гэта рабіць аб'ектыўна.

– І ўсё ж…

– Мусіць, мог бы і лепш згуляць.

– Ёсць пэўнасць наконт далейшых планаў?

– Не. Яшчэ не ведаю, што буду рабіць далей.

– Але збіраецеся яшчэ пагуляць?

– Я адкрыты чалавек і кажу шчыра – не ведаю, хачу я гэтага ці ўжо няма. На сёння няма канчатковага рашэння. Пакуль адпачываю.

– У летняе трансфернае акно былі іншыя варыянты, акрамя «Макслайна»?

– Мне 39 гадоў – якія ў мяне могуць быць варыянты? Ха, звалі «Барселона», «Чэлсі», але больш спадабалася прапанова Юрыя Іосіфавіча [Пунтуса]. Вырашыў, што не пацягну ў «Чэлсі». А вось у «Барселоне», думаю, змог бы… Мне перыядычна тэлефануюць, цікавяцца, як справы, якія планы. Многія, з кім гуляў, ужо трэніруюць…

– Дарэчы, бачыце сябе трэнерам?

– Яшчэ раз кажу: у дадзены момант адпачываю і не вызначыўся, чаго хачу. Усяму свой час, – сказаў Жукоўскі.