Ціманоўская страціла тысячы долараў на сваім брэндзе адзення – дапамагалі ёй «аб'юзер» і «падманшчыца» (так выстаўлялі адзін аднаго ў гучнай публічнай сварцы)
Даходы ад продажаў бягуха абяцала дзецям ва Украіне.
4 жніўня споўнілася два гады з таго часу, як беларуская бягуха Крысціна Ціманоўская пераехала ў Польшчу. Здарылася гэта пасля яе публічнай адмовы на Алімпійскіх гульнях удзельнічаць у эстафеце на не сваёй дыстанцыі (там не хапала людзей праз памылкі беларускіх спартовых чыноўнікаў) – Ціманоўскую знялі з яе профільных спаборніцтваў, псіхалагічна ціснулі і спрабавалі прымусам вывезці ў Беларусь. Спартсменцы ўдалося падняць шум, знайсці паратунак у японскай паліцыі і атрымаць гарантыі ад польскіх уладаў – з таго часу яна змяніць грамадзянства, а цяпер паказвае вынікі, на якія ў Беларусі ў яе дысцыпліне ніхто не здольны.
З нагоды двухгоддзя «новага жыцця» Ціманоўская ў сваім Instagram расказвае пра тое, што адбылося за гэты час. У прыватнасці, многіх з 25 тысяч падпісчыкаў відавочна здзівіць, што лёгкаатлетка тройчы расставалася з мужам і год таму прыняла рашэнне развесціся – у акаўнце пара звычайна выглядала ідэальнай, а нядаўна муж зрабіў спартсменцы вельмі дарагі падарунак.
Здарылася яшчэ адно прызнанне – Ціманоўская заявіла, што страціла 8 тысяч долараў на сваім брэндзе адзення. Ён зʼявіўся ў спартсменкі ў канцы 2021 года. Тады лёгкаатлетка расказала, што з дзяцінства любіла прыдумляць уборы, таму ў свядомым узросце хацела як-небудзь паспрабаваць сябе ў ролі мадэльера, а падзеі ў Токіа падштурхнулі да гэтага. Па словах Ціманоўскай, там «нарадзілася калекцыя, ідэя якой – заўсёды змагацца да канца». На рэчы былі па-англійску нанесеныя заклікі: «Будзь моцным (моцнай), «Будзь смелым (смелай)», «Не здавайся», «Вер у свабоду».
Самі рэчы былі выкананы ў спартыўным стылі і вонкава асабліва нічым не адрозніваліся ад тых, якія можна купіць у любой профільнай краме. Акрамя згаданых надпісаў, якія былі выкананыя ў форме сэрца, на рэчах калекцыі таксама быў сімвал «Каманда Крысціны», а галоўнай «фішкай» лічыліся нашытыя ў розных месцах аўтографы Ціманоўскай.
Аднак вялікага развіцця гісторыя з брэндам не атрымала. Асобны акаўнт у Instagram пад яго набраў усяго пару сотняў падпісчыкаў, а праз месяц з невялікім пасля запуску заглух. Ціманоўская ў канцы студзеня 2022-га згадвала, што з брэндам «у працэсе адбываюцца складанасці», а пазней прызнавалася, што справа аказалася «не яе», а таксама што выдаткавала на ўсё 9 тысяч еўра (атрымліваецца, «адбілася» зусім малая частка сумы).
Узгадвала пра сваю калекцыю бягуха і неўзабаве пасля пачатку вайны, якую з 24 лютага 2022 года працягвае Расія ва Украіне з выкарыстаннем тэрыторыі Беларусі. Ціманоўская тады напісала, што «вырашыла аднавіць продажы рэчаў свайго брэнда, каб даход, атрыманы з продажаў, накіраваць на дапамогу дзецям-сіротам, якія пацярпелі на вайне». Бягуха дапусціла, што «камусьці сёння не да шмотак», але патлумачыла, што лічыць галоўным для сябе аказваць дапамогу. «Калі я не магу гэта зрабіць іншым спосабам, то я буду рабіць гэта праз свой брэнд. Бо для мяне даход ад продажаў не мае ніякага значэння, а для іх гэта можа стаць выратаваннем», – напісала Ціманоўская. Праўда, інфармацыі пра тое, якую суму ўдалося сабраць, калі ў прынцыпе ўдалося, у акаўнце брэнда не знайсці.
За 2023-і ў профілі брэнда Ціманоўскай выкладзены толькі адзін пост – зусім глуха. Затое сёлета здарыўся феерычны скандал вакол беларускага брэнда 10motifs. Ён дапамагаў спартсменцы са стварэннем ейнай калекцыі – магчыма, «сэрцайкі» з дарагіх Крысціне фраз узніклі таму, што 10motifs сам найбольш вядомы «сэрцамі» на сваіх рэчах.
У канцы лютага 2023-га саўладальнік 10motifs Павел Філіповіч абвінаваціў заснавальніцу брэнда Аляксандру Жук у тым, што яна не робіць свае рэчы, а толькі крыху змяняе гатовыя, якія купляе ў вядомых масавых крамах. У сітуацыі вырашыла разабрацца «Наша Нiва» – і выдаткавала па тры з лішнім гадзіны, каб толькі пагаварыць з кожным з дваіх.
Філіповіч паказаў дакументы, якія пацвярджалі закупы ў мас-маркетах, але гісторыя аказалася больш складанай. Жук і Філіповіч былі ў стасунках – у якіх мужчына распавядаў пра тое, што разводзіцца і мае адно дзіця, а потым выявілася, што ўсё яшчэ шчыльна жанаты, а дзяцей двое. Больш за тое, па словах Жук, Філіповіч спрабаваў яе кантраляваць – чытаў асабістыя перапіскі, пераконваў, што яе сябры нешта намышляюць супраць яе самой, – і паводзіў сябе неўраўнаважана: ладзіў скандалы, падчас якіх мог пачаць душыць. Пры гэтым ён здолеў угаварыць Жук перапісаць на яго 45% ейнага бізнесу ў якасці прызнання ягонай працы над прасоўваннем брэнда – а ў выніку стаў аднаасобна кантраляваць усе даходы бізнесу, рахунак у банку і акаўнты ў сацсетках.
Калі жанчына знайшла ў сабе сілы парваць з Філіповічам, ён запатрабаваў з яе мінімум 10 тысяч еўра за сваю долю. А калі Жук адмовілася, пачаў яе пераследаваць – ілюстрацыяй гэтага сталі расклееныя ля дому і крамы брэнда Жук абʼявы, якія самадастатковы чалавек пісаць не стане.
У сваю чаргу, Філіповіч заявіў «НН», што без яго брэнд Жук не прадаваўся б, абвінаваціў экс-сужыцельку ў тым, што аднойчы яна яго падрапала і парвала вопратку, а яшчэ спакойна прызнаўся, што падчас сварак уключаў дыктафон – і ў выніку запісы яму нібыта «дапамаглі пазбегнуць крымінальнай адказнасці». Пры гэтым Філіповіч не змог растлумачыць, як ён фармаваў кошты на рэчы брэнда, калі нібыта не ведаў, што яны пакупныя, а таксама мяўся ў адказах пра тое, навошта пасля разрыву з Жук паспрабаваў запусціць свой брэнд, рэчы якога былі максімальна падобныя да 10motifs. На пытанне, якія ў іх адрозненні, заявіў: «У нас этыкетка ўнутры, а не звонку».
Жук настройвалася на «доўгі і пакутлівы працэс судовых цяжбаў» з Філіповічам. Як яны ідуць – на публіку не выносіцца. Як бы там ні было, 10motifs, мяркуючы па сацсетках, працягвае працаваць і прадаваць рэчы, чаго не скажаш аб брэндзе Ціманоўскай.
