18-гадовы беларус упершыню забіў за «Арыс» – толькі выйшаў на замену, а да таго хапала праблем
Добры пачатак сезону.
28 жніўня кіпрскі «Арыс» пад кіраўніцтвам беларускага трэнера Аляксея Шпілеўскага правёў матч 2-га тура чэмпіянату супраць «Доксы» – перамога 2:1. Унёсак у станоўчы вынік зрабіў малады беларускі форвард Арцём Шуманскі, які ўпершыню згуляў у сезоне. Ён выйшаў на замену адразу пасля перапынку і адкрыў лік на 58-й хвіліне ўдарам з-за межаў штрафной:
Для 18-гадовага футбаліста гэта толькі другі афіцыйны матч у складзе кіпрыётаў, негледзячы на тое, што перайшоў ён у «Арыс» на пачатку студзеня 2023 года. Справа ў тым, што ў тым жа месяцы Шуманскі перанёс аперацыю на калене - рэабілітацыя і паступовая падрыхтоўка да асновы адклалі дэбют ажно да канца чэмпіянату. Беларус згуляў за «Арыс» толькі ў апошнім туры, калі ягоная каманда ўжо забяспечыла сабе чэмпіёнскі тытул і магла сабе дазволіць саступіць АПАЭЛу (3:4), Шуманскі атрымаў 45 хвілін на полі.
Рэзультатыўны дэбют у сезоне, магчыма, паспрыяе беларускаму форварду ў канкурэнцыі, а яна ў клубе даволі жорсткая: проста цяпер у «Арыса» ёсць яшчэ шэсць нападаючых, прычым Шуманскі – самы малады і «зялёны». У гульні супраць «Доксы» ён замяніў 21-гадовага форварда Джэйдэна Монтнара, які ў 2-м раундзе кваліфікацыі Лігі чэмпіёнаў засмуціў былы клуб беларуса БАТЭ: вызначыўся голам у першай сустрэчы (6:2) і асістам у другой (5:3).
Шуманскі стаў толькі трэцім нападаючым, які адзначыўся голам у толькі стартаваўшым чэмпіянаце Кіпра за «Арыс». Нагадаем, што адразу пасля трансферу кіраўніцтва кіпрыётаў заявіла, што разлічвае на футбаліста «як на аднаго з вядучых гульцоў каманды ў найбліжэйшай будучыні».
Пакуль «Арыс» з 6 пунктамі ідзе на другім месцы ў табліцы чэмпіянату Кіпра.