Ва Украіне расіяне разнеслі хакейную арэну, якая перад самай вайной была хатняй для беларусаў – тыя ледзь вырваліся дадому і з таго часу ні словам не асудзілі агрэсію
Пляваць на суайчыннікаў – пляваць на ўкраінцаў.
У ноч з панядзелка на аўторак расійскія войскі нанеслі два ракетныя ўдары па горадзе Дружкаўка Данецкай вобласці, што за 30-35 кіламетраў ад лініі фронту. Адна з ракет трапіла ў лядовую арэну "Альтаір" і прабіла дах.
У акаўнце арэны ў Instagram аператыўна з'явілася фатаграфія з месца падзеі.
З раніцы з'явіліся здымкі наступстваў абстрэлу. Як аказалася, пасля пачатку вайны лёд на арэне растапілі і ператварылі палац у гуманітарны склад.
Пасля поўдня расійскі бок адрапартаваў, што яму ўдалося дзякуючы ракетнаму і авіяцыйнаму ўдарам знішчыць скопішча ваеннай тэхнікі і салдат каля чыгуначнай станцыі Дружкаўка. Паведамляецца пра шэсць сістэм залпавага агню (дзве HIMARS і чатыры Vampire), больш за 800 рэактыўных снарадаў да іх і да 120 вайскоўцаў УСУ. Украінскія крыніцы гэтыя звесткі абвяргаюць.
Арэну "Альтаір" на 650 гледачоў адкрылі ў 2013-м. У наступным годзе сюды пасля пачатку расійскага ўварвання ва Украіну перанеслі базу самых вялікіх школ Украіны па хакеі і фігурным катанні - абедзве знаходзіліся пад патранажам данецкага хакейнага клуба «Данбас». Паведамлялася, што ў 2015 годзе колькасць дзяцей у секцыях перавышала 1200 чалавек. З сезона-2015/16 «Альтаір» стаў хатняй арэнай не толькі для аднайменнага мясцовага клуба, але і для «Данбаса» - наймацнейшай каманды Украіны. Да 2014 года данчане базаваліся ў палацы спорту «Сяброўства» ў Данецку, а да поўнамаштабнага ўварвання 2022 года праводзілі матчы ў Марыупалі, Краматорску і Дружкаўцы.
Да вайны на «Альтаіры» гулялі беларусы
На момант пачатку вайны ў «Данбасе» значыліся тры беларусы - галоўны трэнер Павел Мікульчык, абаронца Уладзіслаў Сакалоўскі і нападнік Віктар Туркін, якія не раз бывалі на «Альтаіры». Першы ўзначаліў каманду падчас плей-оф Украінскай хакейнай лігі-2020/21 і прывёў данчан да чэмпіёнскага тытулу. У наступным сезоне «Данбас» дэбютаваў у Лізе чэмпіёнаў, дзе ў сваёй групе заняў трэцяе непрахадное месца пасля аўстрыйскага «Клагенфурта» і французскага «Руана», але наперадзе дацкага «Рунгстэда». Неўзабаве пасля вылету з ЛЧ ва ўкраінскім хакеі здарыўся раскол - мясцовая федэрацыя пасварылася з «Данбасам» і «Краматорскам» праз датэрміновы ад'езд са зборнай гульцоў гэтых клубаў. УХЛ наклала на каманды дыскваліфікацыю, а тыя адказалі стварэннем уласнай Суперлігі, куды ўвайшоў і СК «Сокал», які ўзначальвае брат Мікульчык Алег Мікульчык. Да пачатку поўнамаштабнага ўварвання беларускія трэнеры паспелі перасекчыся ў Суперлізе чатыры разы - «Данбас» перамог ва ўсіх матчах з агульным лікам 12:3.
У апошні раз каманда Паўла Мікульчыка была ў «Альтаіры» роўна за тыдзень да пачатку вайны - там разграміла аднайменны клуб з лікам 8:0. Туркін зарабіў у матчы асіст. Свой апошні паядынак у Суперлізе-2021/22 «Данбас» правёў за лічаныя гадзіны да расійскага ўварвання 24 лютага - у Краматорску быў абгуляны «Белы Барс» 6:0. Гэта была 24-я перамога «Данбаса» ў 25 матчах - каманда ішла на першым месцы. Да таго моманту Туркін паспеў правесці за цэлы сезон з улікам усіх турніраў 37 матчаў і набраць 31 (16+15) ачко. У падпісанта ліста ў падтрымку Лукашэнкі Сакалоўскага лічбы былі больш сціплымі - 9 (0+9) балаў у 43 паядынках.
Пасля пачатку вайны тройца спешна пакінула Украіну. Журналісты розных незалежных СМІ спрабавалі выйсці на сувязь з беларускімі хакеістамі і трэнерамі з украінскіх ліг, але тыя адмаўляліся штосьці казаць. Як высветлілася, у ФХБ незразумела на якіх падставах забаранілі гульцам каментаваць пачатак вайны і сваю эвакуацыю, а тыя і не былі супраць. Па дадзеных Zerkalo.io, федэрацыя практычна нічога не зрабіла, каб арганізаваць суайчыннікам выезд з зоны баявых дзеянняў, хоць тыя прасілі аб дапамозе.
Павел Мікульчык не стаў чакаць вырашэння ваеннага канфлікту і адправіўся працаваць у расійскую лігу - а менавіта ад абстрэлаў арміі Расіі трэнеру прыйшлося бегчы ў канцы лютага. З пачатку лета коуч як ні ў чым не бывала асістуе падпісанту за Лукашэнку і сябру Баскава Андрэю Міхалёву ў «Дынама-Шынніку» з МХЛ.
Туркін разам з сям'ёй з Украіны з'ехаў у Нямеччыну. Там хакеіст пагадзіўся распавесці «Трыбуне» пра пачатак вайны, але калі прачытаў пытанні для інтэрв'ю, перастаў выходзіць на сувязь. Бліжэй да лета Віктар вярнуўся ў Беларусь. Адразу казалі пра пераход нападніка ў “Брэст”, але па выніку аднагадовы кантракт быў падпісаны з “Віцебскам”. Прама зараз Туркін займае сёмае месца сярод бамбардзіраў экстралігі з 32 (10+22) ачкамі пасля 37 матчаў.
Сакалоўскі ўвогуле перад пачаткам бягучага сезона мог з'ехаць у Расію, дзе цікавасць да яго паслуг праяўляў «Тамбоў» з ВХЛ. Аднак за мяжу прыхільнік рэжыму Лукашэнкі не адправіўся, а падпісаўся з "Дынама-Маладзечна". Цяпер каманда ідзе ў хвасце табліцы экстралігі, а Сакалоўскі з'яўляецца самым выніковым абаронцай маладзечанцаў - 15 (6+9) балаў у 37 гульнях.
