Як беларускія тэнісісткі сустракаліся з сусветнымі поп-зоркамі: тыя былі прыкметна старэйшыя, аднаму выдумалі прэтэнзіі да сэксу, іншы разбіў сэрца

Спартсмены нярэдка перасякаюцца з шоў-бізнэсам - хаця б у тым сэнсе, што выбіраюць яго прадстаўнікоў сабе ў партнёры. Праўда, больш прыкладаў таго, што спорт у такіх парах прадстаўляюць мужчыны. Але бываюць і жаночыя выпадкі - у тым ліку такое здаралася і ў белспорце. Успамінаем, як тэнісісткі з нашай краіны (прынамсі, з беларускімі каранямі) сустракаліся з зоркамі музыкі – прычым амерыканскімі.

Марыя Шарапава і Адам Левін

Шарапава нарадзілася ў 1987-м у сям'і гамяльчукоў, якія пасля трагедыі на Чарнобыльскай АЭС пераехалі далей ад родных мясцін – у сібірскую Нягань у Расіі. Але яшчэ ў раннім дзяцінстве Марыі сям'я здзейсніла яшчэ адзін пераезд - у Сочы. А ўжо ў восем гадоў дзеля развіцця тэніснай кар'еры бацька перавёз Марыю ў ЗША, дзе яна з таго часу і жыла - але на міжнародным узроўні прадстаўляла Расію.

Да свайго паўналецця Шарапава ўжо лічылася топ-тэнісісткай. У 17 яна паспела выйграць "Уімблдон", у фінале перамогшы першую сеяную Серэну Уільямс, яе ж адолела ў фінале выніковага чэмпіянату WTA-2004, а да красавіка 2005-га пасля серыі паспяховых выступленняў стала другой ракеткай свету. А яшчэ - заключыць выдатны рэкламны кантракт: пасля перамогі на «Уімблдоне» Шарапава запомнілася спробай патэлефанаваць сваёй маме проста з корта - тагачасны флагман вытворчасці мабільнікаў Motorola ўразіўся і прапанаваў каля 1,5 мільёна долараў на год за рэкламу сваіх «раскладанак».

Спонсар жа закаціў для Марыі шырокае святкаванне 18-га дня нараджэння, які надышоў 19 красавіка 2005-га. Вечарыну зладзілі напярэдадні ў шыкоўным начным клубе Нью-Ёрка, Mototrola сабрала "сваіх" тагачасных зорак, сярод якіх былі, напрыклад, Фергі і Ліндсі Лохан. Але, мяркуючы па фота, усю ўвагу Шарапавай у той вечар перацягнуў Адам Левін. Спявак, якому незадоўга да таго споўнілася 26, ужо быў паспяховы як саліст гурта Maroon 5 – іх дэбютны альбом 2002 года не падаў, а ўзнімаўся ўсё вышэй у рэйтынгах, а ў лютым 2005-га гурт атрымаў “Грэмі” ў намінацыі “Найлепшы новы артыст». А яшчэ Левін атрымаў некаторую вядомасць у свецкай хроніцы як аматар мяняць дзяўчат, у асноўным бландынак.

У таблоідах хутка пайшлі чуткі, што пасля прыемнага знаёмства Левін стаў рэгулярна бачыцца з Шарапавай. Сама тэнісістка ў адказ на пытанні пра асабістае жыццё казала, што занадта занятая тэнісам, але рэпарцёры не сунімаліся. Улетку таго года The Sun паведамляла, што крыніца ў асяроддзі Левіна перадала, што Адаму "вельмі падабаецца Марыя, і яны ўжо некалькі месяцаў ціха сустракаюцца". Аднак неўзабаве прэса стала паведамляць новую інфармацыю - маўляў, спевака ўжо заўважаюць з яго калегай Джэсікай Сімпсан (таксама бландынкай, на той момант 25-гадовай).

У 2007-м грымнуў скандал - па сусветнай жоўтай прэсе, а асабліва моцна ў рускамоўных СМІ разышлася нібыта цытата Левіна пра стасункі з Шарапавай, дзе абгульваліся яе знакамітыя стогны пры ўдарах на тэнісным корце. «Я быў так расчараваны! Думаў, сэкс будзе гучным, а замест гэтага яна проста ляжала, як дохлая жаба», - гаварылася ў «цытаце». Было адно "але" - яе "першакрыніцай" выступіла газета са скандальнай рэпутацыяй Exile, дзе хутка заявілі, што навіна была сатырычнай. Але абвяржэнне з боку Левіна было цалкам сур'ёзным - а яго прадстаўнік наогул заявіў, што спявак з тэнісісткай перасякаліся роўна адзін раз, на той самай вечарынцы. Праўда, крыніца ў асяроддзі Шарапавай заявіла, што яны ўсё ж былі парай, прынамсі, «некалькі тыдняў». А газета зрабіла са скандалу шоў і аб'явіла конкурс на «найлепшае абвяржэнне», за якое абяцала аплаціць пераможцу паслугі прастытуткі.

Шарапава з часоў вечарынкі ўзяла «кар'ерны «Вялікі шлем» (усяго пяць перамог на самых прэстыжных турнірах), была першай ракеткай свету, атрымала не адзін вялізны спонсарскі кантракт (заробак за кар'еру ацэньваецца ў амаль 40 млн долараў) і выбудавала ўласны бізнэс. Усяму гэтаму ніяк не перашкодзіла дыскваліфікацыя на 15 месяцаў за прыём мельдонію ў 2016-м. Кар'еру Шарапава завяршыла перад каранавіруснай пандэміяй 2020-га, аб'явіўшы пра гэта адначасова ў двух модных часопісах. У яе асабістым жыцці было яшчэ некалькі гучных раманаў, героямі якіх станавіліся ў тым ліку вядомыя спартсмены - славенскі баскетбаліст Саша Вуячыч і балгарскі тэнісіст Грыгар Дзімітраў. У 2018-м Шарапава пачала сустракацца з брытанскім мільянерам Аляксандрам Гілксам - у выніку яны заручыліся, а ў 2022-м у пары нарадзіўся сын.

Левіна звязвалі яшчэ з мноствам жанчын, але ў 2012-м ён сустрэў намібійскую мадэль Бехаці Прынслу - неўзабаве пара расталася, але ўсё ж па асобнасці яны ўжо не змаглі. У 2014-м спявак і мадэль узялі шлюб, у якім да гэтага часу знаходзяцца. У пачатку 2023-га ў саюзе нарадзілася ўжо трэцяе дзіця. Праўда, незадоўга да таго Левін патрапіў у скандал - занадта ўжо далёка заходзіў у перапісках у Instagram з выпадковымі красунямі, завошта публічна папрасіў прабачэння, настойваючы, што словы не цягнули за сабой дзеянняў. Што тычыцца музычнай дзейнасці, Левін застаецца салістам Maroon 5 – гурт запісаў яшчэ шэсць альбомаў і застаецца камерцыйным. Праўда, свежы кліп на трэк Middle Ground сабраў невялікія для гурта 1800000 праглядаў за два тыдні.

Ніякіх верыфікаваных каментароў наконт стасункаў адзін з адным ні ад Шарапавай, ні ад Левіна так і не паступіла.

Вікторыя Азаранка і Redfoo

Мінчанка Азаранка, дачка метадысткі РЦАП па тэнісе, у гэты від прыйшла ў 7 гадоў, у 16 змагла з'ехаць у ЗША, а ў 22 выйграла свой першы турнір "Вялікага шлема" - Australian Open-2012 - і стала першай ракеткай свету. У тым жа 2012-м Азаранка стала і алімпійскай чэмпіёнкай - узяла золата ў міксце з Максімам Мірным, а ў адзіночным разрадзе забрала бронзу (срэбра, дарэчы, узяла Шарапава). За год тэнісістка зарабіла амаль 8 млн долараў прызавых, а яшчэ паведаміла прэсе, што рассталася з бойфрэндам - украінскім тэнісістам Сяргеем Бубкам-малодшым, сынам рэкардсмена ў скачках з шастом.

Амерыканец Стэфан Гордзі ў дзяцінстве займаўся тэнісам, але зламаў руку і спорт пакінуў. Зрэшты, больш яго захапляла музыка - у маладосці ён змог замацавацца ў рэперскім асяроддзі роднага Лос-Анджэлеса, пад псеўданімам Redfoo прадзюсаваў як свае, так і чужыя трэкі, але вялікай вядомасці да 30 гадоў не меў. Тады Стэфану прыйшла ў галаву ідэя зрабіць са сваім пляменнікам Скайлерам Гордзі больш папсовы праект з упорам на танцы пад музыку і ўвогуле на шоў. Гурт LMFAO "стрэліў" у пачатку 2010-х – з хітамі Party Rock Anthem, Sexy and I Know It і Sorry For Party Rocking. У 2012-м гурт прыпыніў дзейнасць, але кліпы глядзяць да гэтага часу – першы прабіў ужо 2 мільярды праглядаў, другі набліжаецца да мільярда, трэці мае 600 мільёнаў.

У пачатку восені 2012-га Азаранка з Redfoo пазнаёміў амерыканскі тэлевізіёншчык Кен Саламон - гэтага захацела тэнісістка, якой падабалася музыка LMFAO. Артыст амаль нічога не ведаў пра спартсменку, але ім аказалася весела разам. І тут Вікторыя зрабіла новаму знаёмаму арыгінальную прапанову - разам прыйсці на прэс-канферэнцыю пасля матчу US Open, што і здарылася проста ў 37-ы дзень нараджэння выканаўцы. З'яўленне нечаканага спадарожніка Азаранка патлумачыла журналістам так: "Ён вялікі фанат тэніса, я вялікі фанат музыкі, вось мы і тут".

З таго часу спявак і тэнісістка сталі рэгулярна з'яўляцца разам на самых розных мерапрыемствах. Вядома, у прэсе сталі хадзіць чуткі пра раман – але пазней музыка заявіў, што “доўгі час проста сябраваў” са спартсменкай, але потым яна яго “спакусіла”. Ужо на пачатку 2013-га Азаранка прызналася, што закаханая. «Я сустракаюся з унікальным хлопцам. Магу гарантаваць, што ён сапраўды асаблівы чалавек, ён - каханне ўсяго майго жыцця. Рада, што ён побач са мной», - заяўляла Вікторыя. Redfoo у гэты ж час напісаў, што шчаслівы сустракацца з сусветным нумарам адзін і усё стала канчаткова зразумела і без імёнаў.

У 2013-м Азаранка працягвала паказваць топавыя вынікі - другі выйграны AO, паўфінал «Ралан Гарос», другі запар фінал US Open. Усё было добра і ў адносінах. «Іх аснова - наша падабенства. Я люблю музыку і тэніс, яна любіць музыку і тэніс. Мы абодва любім павесяліцца ад душы. Але Віка больш руплівая», - распавядаў Redfoo. «Ён паказвае, што трэба быць сабой, адкрытым і сумленным, мець зносіны па-чалавечы з усімі - спонсарамі, журналістамі», - казала Азаранка аб тым, што бойфрэнд дапамог ёй разняволіцца.

Таксама кожны з пары засвяціўся ў сферы іншага: музыкант заявіўся на рэгіянальны адбор да US Open (прайграў першы ж матч, але быў задаволены сабой), а Азаранка знялася ў кліпе Redfoo на сольны трэк Let“s Get Ridiculous у ролі сцюардэсы – хаця, па яе прызнанню, партнёр хацеў яе "ўціснуць у кожную сцэну кліпа" і нават зрабіць русалкай, але яна адмовілася. Кліп на сёння мае 85 мільёнаў праглядаў, Азаранка ў леапардавай сукенцы ўзнікае там на адзнацы 2:07.

Але потым нешта зламалася ў тэнісе Вікторыі, якая выходзіла на корт у слухаўках з запампаванымі ў плэер унікальнымі рэміксамі ад партнёра. За паўгода на стыку 2013-га і 2014-га спартсменка прайграла 7 з 15 сваіх матчаў. Іншыя назіральнікі падазравалі, што прычына - як раз стасункі з Redfoo. З несканцэнтраванасцю на тэнісе звязвалі і траўмы Азаранкі, якія сталі частымі, праз іх яна прапускала важныя турніры. У той жа час музыка вясной 2014-га публічна разбурыў чуткі пра хуткае вяселле пары: «Гэта вельмі сур'ёзна, жыццё халасцяка заканчваецца назаўжды. Пакуль мы з Вікай не жэнімся, не». Пры гэтым СМІ сцвярджалі, што Азаранка, якая ўжо казала пра магчымую куплю сумеснай нерухомасці з музыкам, у тую пару марыла пра вяселле - зразумела, што такая публічная заява партнёра не магла яе ўсцешыць.

У самым пачатку лета 2014-га тэнісны журналіст Бэн Ротэнберг выдаў інсайд: пара расталася. Неўзабаве музыка пацвердзіў гэтую інфармацыю, патлумачыўшы ўсё несупадзеннем працоўных графікаў пры важнасці для абаіх сваіх кар'ер. У верасні музыка называў тэнісістку «самым каханым чалавекам да гэтага часу» і заяўляў, што «крыагенна замарозіў наша каханне, каб потым мы маглі яго размарозіць». Прыкладна той жа сэнс ён заклаў у напісаны тады трэк Meet Her At Tomorrow - словы гучалі так: "Учора я даў ёй свабоду, цяпер у маім сэрцы крыху пуста, але калі гэта наканавана, то я сустрэну яе заўтра". А вось Азаранцы было балюча, у чым яна прызналася ў пачатку 2015-га: «Гэта разбіла мне сэрца, і я не баюся гэта прызнаць, гэта жыццё. Я была ў дэпрэсіі, хаця і не разумела гэтага. Мы з Каралін Вазняцкі, [якая прыкладна ў той жа час расталася з жаніхом], плакалі адна ў адной на плячы. Але цяпер усё ў мінулым».

Ніякай «размарозкі кахання» ў выніку не здарылася. Азаранка праз некаторы час на Гаваях пазнаёмілася з інструктарам па гольфе Білі Маккігам, з якім пачала стасункі, а ў канцы 2016-га нарадзіла сына Леа. Праўда, скончылася ўсё растаннем з бацькам дзіцяці і доўгімі судамі за права апекі, па выніках якіх Леа ўсё ж застаўся з маці. З тых часоў Вікторыя прысвячае сябе сыну - ні пра якія новыя стасункі не чуваць. У тэнісе ж галоўным усплёскам быў выхад у фінал US Open у 2020-м.

Redfoo у 2018-м распавядаў, што сустракаецца з гастрольным менеджарам Жасмін Алькуры - мяркуючы па яе акаўнце, стасункі працягваюцца, больш за тое, пара зусім нядаўна стала бацькамі. Музыка з 2017-га спыніў творчую актыўнасць і захапіўся праграмаваннем – у 2022-м арганізаваў хакатон з дэвізам "калі я змог, зможа кожны". Пра сваё жыццё Redfoo перыядычна распавядае ў Instagram на 500 тысяч падпісчыкаў, дзе называе сябе «рок-вечарынкавы веган, кодэр, аматар тэніса і татачка, які гуляе ў шахматы». Месяц таму ён усё ж вярнуўся ў музыку - адзін дыджэй вырашыў "ускрэсіць караля рок-вечарынак" і ўгаварыў яго на трэк Long Live Party Rock. Аднак поспеху такі камбэк не набыў - усяго 32 тысячы праглядаў на YouTube.