Што за маладога беларуса падпісалі ў Бельгіі: гуляў не толькі за Радзiму, спрабаваў у «Лацыа», працуе з украінцамі
Шлях Максіма Кірэева.
Днямі беларускае прозвішча з'явілася ў кантэксце бельгійскага футбола – стала вядома, што 18-гадовы атакуючы паўабаронца Максім Кірэеў падпісаў двухгадовы кантракт з «Льерсам» з другога дывізіёна Бельгіі. За спіной хлопца чатыры матчы ў форме зборнай Беларусі U-19, але, па вялікім рахунку, для нашага футбола гэта новае прозвішча.
«Трыбуна» даведалася, а зараз расказвае вам падрабязнасці біяграфіі і кар'еры хлопца, якіх не знайсці ў адкрытых крыніцах.
У футбол трапіў ужо ў Бельгіі, дзе жыве з маленства
Звестак пра біяграфію Кірэева зусім няшмат. Нічога вы не даведаецеся і з сацыяльных сетак гульца. У Instagram, напрыклад, няма ніводнага паста – толькі больш за паўтысячы падпісак. Хоць, мяркуючы па адзнаках, старонка вядзецца ўжо больш за сем гадоў. У Фэйсбуку профіль таксама ёсць, але актыўнасцю не вылучацца.
Цікава, што нідзе няма згадак пра тое, што Кірэеў нейкім чынам звязаны з Беларуссю, хаця менавіта ў нашай краіне ён нарадзіўся ў ліпені 2004-га. Як удалося даведацца «Трыбуне», калі Максім быў зусім маленькім, яго бацька па асабістых прычынах пераехаў у Бельгію, там асталяваўся, наладзіў жыццё, а праз некаторы час перавёз і дзіця з жонкай.
Менавіта ў Бельгіі Кірэеў у дзевяцігадовым узросце акунуўся ў футбол – патрапіў у акадэмію «Андэрлехта», дзе ў наступным гуляў за каманды ўсіх моладзевых узроўняў. Адзначым, што побач з ім трэніраваўся і гуляў, напрыклад, бельгіец Рамэа Лавія – высакарослы паўабаронца пасля этапу ў структуры «Андэрлехта» патрапіў у сістэму «Манчэстэр Сіці», а зайграў у АПЛ летась за «Саўтгемптан». З Кірэевым у футбаліста склаліся даволі цёплыя адносіны – адзін аднаго называюць братамі.
У дзяцінстве выдзяляўся на фоне аднагодкаў нават на міжнародных турнірах
Разам Максім і Рамэа выступалі ў адной камандзе на розных турнірах. Спецыялісты называлі звязку паўабаронцаў адной з самых яркіх у акадэміі «Андэрлехта». Зрэшты, у індывідуальным плане беларус быў часам на галаву вышэйшы за партнёраў па камандзе.
У кастрычніку 2016-га «Андэрлехт» адправіўся ў Катар на турнір ASPIRE ACADEMY (менавіта на тым спаборніцтве зроблена фота, што размешчана вышэй). Бельгійскі калектыў быў складзены з хлопцаў 2004 года нараджэння (Максім быў у іх ліку) і выступаў супраць аднагодкаў. Згодна з рэгламентам, патрабавалася правесці ўсяго два матчы ў групавым этапе – найлепшы калектыў аб'яўляўся пераможцам. Андэрлехт трапіў у групу з туніскім клубам «Эсперанса» і катарскай «Эспайр Акадэмi». У першым жа паядынку – супраць гаспадароў – бельгійцы здабылі перамогу 5:1, Кірэеў адзначыўся дублем. У другім матчы «Андэрлехт» уступіў саперніку з Туніса (1:2), але, набраўшы, як і апаненты, тры ачкі, па дадатковых паказчыках першынстваваў у сваім турніры. Кірэеў быў прызнаў самым каштоўным гульцом сярод каманд з футбалістаў не старэйшых за 13 гадоў.
Адзначым, што не толькi Лавія, а i некаторыя iншыя партнёры Кірэева па «Андэрлехце» на тым турніры з часам перайшлі ў структуры клубаў вядучых еўрапейскіх чэмпіянатаў. Напрыклад, выхаванцы акадэміі «Андэрлехта» таго перыяду зараз знаходзяцца ў «Ліле», «Віторыі Гімараеш», некаторыя паспелі дэбютаваць у элітным дывізіёне Бельгіі.
Пайшоў з «Андэрлехта» і прабыў паўгода без практыкі, мог апынуцца ў «Лацыа»
У чэрвені 2022-га Кірэеў скончыў акадэмію «Андэрлехта». На той момант хлопцу споўнілася 17. Наступным этапам у кар'еры беларуса павінна была стаць каманда «Андэрлехт U-21» – па сутнасці, дубль бельгійскага калектыва. Гуляюць там хлопцы, якія ў свой час скончылі акадэмію «Андэрлехта», ва ўзросце ад 17 да 21 года. Але Кірэеву прама сказалі, што гульнявую практыку гарантаваць не могуць. Нават нягледзячы на тое, што ён паказвае нядрэнны футбол, вылучаецца на фоне аднагодкаў, але канкураваць са старэйшымі дзецьмі – гэта ўсё ж зусім іншае. Таму паўабаронца, у тым ліку па парадах агентаў, прыняў рашэнне сысці са структуры «Андэрлехта» і пашукаць новы клуб.
Паводле адзнак у Instagram футбаліста, супрацоўнічае ён з кампаніяй PROSTAR. Пры гэтым у профілі агенцтва на Transfermarkt сярод кліентаў Кірэеў не значыцца. Затое там ёсць некалькі іншых беларусаў: Міхаіл Сівакоў, Яўген Яблонскі, Кірыл Капленка, Павел Назаранка, Кірыл Кірыленка. Кампанія займаецца справамі гульцоў з розных краін, але ў асноўным – украінцаў, у тым ліку такіх вядомых, як Руслан Маліноўскі, Віталь Міколенка, Яраслаў Ракіцкі, Андрэй Ярамоленка і іншыя. Агенцтва зарэгістравана ў Кіеве. Сярод супрацоўнікаў кампаніі фігуруюць вельмі вядомыя персоны на постсавецкай прасторы – агент Вадзім Шаблій, экс-гулец зборнай Украіны Сяргей Сярэбранікаў, экс-гулец зборнай Фінляндыі Аляксей Яроменка-малодшы.
Па нашай інфармацыі, ушчыльную справамі Кірэева займаецца Сярэбранікаў. 46-гадовы ўраджэнец Улан-Удэ ў свой час пагуляў за расійскія і ўкраінскія клубы, але значную частку кар'еры правёў у бельгійскім футболе (з 2002-га па 2014-ы). Там жа пасля таго, як скончыў гуляць, застаўся і праз час заняўся агенцкай дзейнасцю.
Як нам удалося даведацца, не без уплыву Серабраннікава Кірэеў вырашыў змянiць абстаноўку ў надзеі адшукаць клуб, дзе яму будзе прадастаўлена гульнявая практыка. Праўда, пошукі зацягнуліся. Максім паспеў з'ездзіць на прагляд у Італію, у структуру «Лацыа».
Са студзеня 2023 года ўраджэнец Беларусі трэніраваўся з клубам бельгійскага Д2 «Льерсам». На днях бакі падпісалі кантракт.
Засвяціўся ў зборнай Бельгіі, але зараз гуляе за беларускую
За плячыма Кірэева некалькі матчаў на міжнародным узроўні не толькі за клуб, але і за зборныя, прычым дзвюх краін. Працяглае жыццё ў Бельгіі, наяўнасць адпаведных дакументаў у бацькоў дазволілі ў свой час узяць бельгійскае грамадзянства і Максіму. У выніку хлопец у 2019 годзе атрымаў выклік у зборную Бельгіі U-15. Ён правёў 51 хвіліну ў таварыскім матчы супраць Швейцарыі (1:2). Паўабаронца нічым у тым паядынку не вызначыўся і больш у зборныя не запрашаўся.
Затое праз тры гады аб'явіўся ў складзе юніёрскай зборнай Беларусі, куды яго запрасіў Міхаіл Мархель. Па нашай інфармацыі, ад выкліку гулец адмаўляцца не стаў, таму што хацеў паказаць сябе на міжнароднай арэне, каб хутчэй знайсці клуб – у той момант Кірэеў трэніраваўся індывідуальна. У юніёрскую зборную Бельгіі прабіцца было цяжка з-за канкурэнцыі.
У верасні 2022-га Максім адыграў тры паядынкі ў кваліфікацыі чэмпіянату Еўропы. У групе 12 беларусы змагаліся з аднагодкамі з Германii, Славакіі і Арменіі. Ва ўсіх матчах на поле выходзіў Кірэеў. Са славакамі (1:1) адыграў 30 хвілін, замяніўшы Аляксандра Французава (цяпер форвард БАТЭ). Супраць немцаў (1:5) з'явіўся ў старце і саступіў месца на полі Кірылу Цапянкову (паўабаронца «Дынама-Брэст») праз 70 хвілін. У заключным матчы з Арменіяй (1:1) таксама выйшаў у аснове і адыграў 78 хвілін (быў заменены на Аляксандра Гуза, сённяшняга гульца «Іслачы»). Беларусы занялі ў групе трэцяе месца, завяршыўшы кваліфікацыю, а адзінае, чым вызначыўся Кірэеў у пратаколе, гэта жоўтая картка ў апошнім туры.
Наступны раз у форме зборнай Беларусі U-19 паўабаронца выйшаў на поле 28 сакавіка 2023 года. Тады каманда Мархеля праводзіла таварыскі матч з аднагодкамі з Расіі ў Мінску ў дутым манежы на праспекце Пераможцаў. Кірэеў выйшаў у старце на пазіцыі нападаючага ў пары з Французавым, адыграў 74 хвіліны. Запомніўся тым, што атрымаў папярэджанне на 19-й хвіліне, а на 50-й прайшоў паўполя, адарваўся ад саперніка і аформіў асіст на Французава пры першым беларускiм узяцці варот (адзнака 1:11:05). Беларусы ў выніку атрымалі валявую перамогу 2:1.
Не выключана, што чатыры матчы за зборную якраз дапамаглі Максіму знайсці сабе новы клуб.
Не баіцца праяўляць сябе на полі
Нам удалося пагутарыць з некалькімі футбольнымі спецыялістамі, якія бачылі дзеянні Кірэева на полі. Суразмоўцы адзначаюць, што ў гульні беларуса вельмі моцна заўважная еўрапейская школа. Хлопец выдатна бачыць поле, валодае выдатнай тэхнікай і дрыблінгам на хуткасці. Кірэеў не баіцца ісці ў обыгрыш, у многіх сітуацыях рызыкуе без боязі страціць мяч, прычым часцей робіць гэта эфектыўна.
Адзначаюць нашы суразмоўцы і чалавечыя рысы Кірэева. Прыехаўшы ў зборную, ён адразу знайшоў агульную мову з партнёрамі, вылучаўся камунікабельнасцю і адкрытым характарам.
Што наконт слабых бакоў, то, як гавораць спецыялісты, была прыкметная доўгая адсутнасць гульнявой практыкі ў рэальных матчах. Не заўсёды паразуменне з партнёрамі аказваецца на высокім узроўні – усё з-за таго, што многія месяцы Кірэеў працаваў па індывідуальнай праграме. Зрэшты, па словах нашых суразмоўцаў, падпісанне кантракту з «Льерсам» і праца з калектывам могуць хутка ўстаранiць гэтыя недахопы. Спецыялісты, адзначаючы амбіцыйнасць і мэтанакіраванасць хлопца, мяркуюць, што ён надоўга не затрымаецца ў Д2 Бельгіі.
