Зайшоўшы ў купэ, Глеб не ведаў, куды схаваць валізы – яго ўратавала жонка. Але да Кубка «Легенд» даехаў
Каб не дапамога, магчыма, ехаў бы побач з чамаданам усю ноч.
Гэты уікенд былы футбаліст, а цяпер сябар выканкама АБФФ і ўладальнік трэнерскай ліцэнзіі Аляксандр Глеб разам з жонкай праводзіць у Маскве – экс-паўабаронца ўдзельнічае ў мясцовым футбольным турніры Кубак «Легенд».
Для паездкі ў суседнюю сталіцу Глеб па нейкай прычыне абраў цягнік, а не самалёт. Магчыма, захацеў зведаць забытыя адчуванні, бо, як распавяла ў сваім інстаграм жонка гульца, у цягніках ён «тысячу гадоў не ездзіў». Відаць, гэта было настолькі даўно, што былы футбаліст нават не ведаў, куды схаваць валізы ў сваім купэ СВ - таму проста паставіў іх побач з сабой на сядушку. Калі б на дапамогу не прыйшла жонка, то цалкам магчыма, Глеб бы і ехаў да Масквы побач з чамаданам.
Але рэжымніка ўратавалі, і пара дабралася да сталіцы. Паколькі яны прыехалі за суткі да пачатку турніру, то вольны вечар вырашылі правесці ў тэатры Crave, які пазіцыянуе сябе як «адзіны тэатр-кабарэ ў Расіі».
Кошты на квіткі ў Crave стартуюць ад 40 000 расійскіх рублёў на дваіх або прыкладна 406 еўра.
Праўда, мяркуючы па ўсім, відовішча сямейнай пары хапіла яшчэ ў першым аддзяленні, таму яны пакінулі тэатр у антракце.
Яшчэ перад пачаткам турніра жонка Глеба распавядала пра цяжкасці працы інстаграм у Расіі – магчыма, жанчына прапусціла, што ўжо амаль два гады гэтую сетку блакуюць па патрабаванні Генеральнай пракуратуры краіны «ў сувязі з распаўсюджваннем заклікаў да здзяйснення гвалтоўных дзеянняў у дачыненні да расіян, у тым ліку вайскоўцаў», якія Meta Inc. адмовілася выдаляць з Instagram.
.
У сваёй групе B Зборная свету, за якую і выступаў Глеб, заняла першае месца, адолеўшы «легенд» «Зеніта» (9:7) і «Дынама» (9:7). А Глеб нават вызначыўся забітым мячом.
Групу А выйгралі ветэраны маскоўскага «Спартака» – яны перамаглі каманды ЦСКА (3:1) «Лакаматыва» (13:8).
Глеб – не адзіны беларус, які засвяціўся на турніры. За маскоўскі «Лакаматыў» заяўлены Сяргей Гурэнка, за маскоўскае «Дынама» – Эрык Яхімавіч, Генадзь Туміловіч і ўкраінец, які гуляў і за зборную Беларусі, Максім Рамашчанка. Відэа з Туміловічам стала адным з момантаў дня.
