Мільённы штраф «Шахцёру» – спроба УЕФА забраць свае ж грошы, але наўрад ці яна будзе паспяховай
Хутчэй за ўсё, сыграе іншы варыянт.
Сезон-2024 – катастрофа для «Шахцёра». З-за справы аб «дагаварняках» клуб пачаў сезон з -20 ачкамі, а яшчэ меў трансферны бан, з прычыны якога цяпер шмат гуляе ўчорашнімі дублёрамі. Вынік – чатыры балы на старце ЧБ, а затым сем паражэнняў запар.
А 18 траўня дабіла сітуацыю навіна з УЕФА: еўрапейцы абвiнавацiлі «Шахцёр» у «пратэрмінаванай крэдыторскай запазычанасці» і наклалі штраф у 1,01 млн еўра. А калі найбліжэйшы выхад «гарнякоў» у турніры УЕФА здарыцца па сезон-2026/27 уключна, то каманду гуляць туды не пусцяць.
Зрэшты, час казаць не пра патэнцыйныя еўракубкi «Шахцёра», а пра яго далейшы ўдзел хаця б у ЧБ. «Трыбуна» даведалася, што цяпер адбываецца ў клубе.
Новае пакаранне «Шахцёра» – наступства ўсё той жа гісторыі, якая прынесла клубу забарону на падпісанне новых гульцоў. Гаворка пра даўгi перад былымі і цяперашнімі футбалістамі. Сутнасць у тым, што ў «Шахцёры» пасля прыняцця рэжымнага ліміту на заробкі ўвялі «двайную бухгалтэрыю». Гульцам давалі стандартныя кантракты, сумы ў якіх упісваліся ў ліміт, такія дамовы рэгістраваліся ў АБФФ і УЕФА. Але былі і дадатковыя пагадненнi – іх футбольным арганізацыям не паказвалі, а вось сумы там прапісвалі па беларускіх мерках вялізныя.
Бачачы, што па прадстаўленых дакументах усё чыста, АБФФ выдавала «Шахцёру» ліцэнзію на ЧБ, а УЕФА дапускала да еўракубкаў. І ў 2022-м салігарчане правялі чарговую кампанію – беспаспяховую: у першым адборачным раўндзе ЛЧ прайгралі абодва матчы «Марыбару» (0:2, 0:1), па шчаслівым жэрабі патрапілі не ў другі, а адразу ў трэці раўнд кваліфікацыі Лігі канферэнцый, але там саступілі «Клужу» (0:0, 0:1) і на гэтым выступленнi скончылі.
Але паралельна развіваліся і іншыя падзеі – былыя гульцы «Шахцёра» пачалі падаваць пазовы ў палату па вырашэнні спрэчак ФІФА. Прычына была простай: клуб не выканаў свае абавязацельствы па дадатковых пагадненнях. І ўжо ў верасні 2022-га палата вынесла рашэнні на карысць нігерыйца Эзэ Акеухі і славенца Дарыа Калабарыча – сумарна ім засталіся вінныя ў раёне мільёна еўра.
Далей колькасць іскаў ад футбалістаў расла – і дасягнула 11. У выніку ФІФА ў чэрвені 2023-га наклала на «Шахцёр» бан на пераходы на тры трансферныя вокны, а потым паўтарала гэтае рашэнне яшчэ дзевяць разоў (адна забарона была раптоўна накладзеная толькі на два вокны). Увогуле, гэтай зімой у «гарнякоў» не праглядалася шанцаў падпісаць новых футбалістаў – хоць некаторыя верылі ў гэта і нават заключалі папярэднія кантракты.
У 2023-м схамянуліся і ва УЕФА – выходзіла, што ў 2022-м «Шахцёр» схлусіў, што ў яго ўсё нармальна па фінансах, атрымаў ліцэнзію на еўракубкі, а потым аказалася, што насамрэч клуб да моманту матчаў з «Марыбарам» ужо меў пратэрмінаваныя даўгі. Сітуацыя была дастаткова відавочнай, але разбіральніцтва ў еўрапейскай арганізацыі ішло паўгода – і толькі 15 сакавіка 2024-га быў вынесены ўжо згаданы вердыкт: штраф і бан у еўракубках. Аднак Салігорск падаў апеляцыю – яе ўжо разгледзелі хутчэй і ў траўні прынялі канчатковае рашэнне. Як нам удалося даведацца, «Шахцёр» яшчэ і застаўся вінен 2 тысячы еўра за апеляцыйную працэдуру.
Чаму штраф склаў менавіта 1,01 млн еўра? Усё проста: роўна столькі «Шахцёр» атрымаў ад УЕФА за ўдзел у еўракубках сезона-2022/23. 550 тысяч еўра належыла за вылет у трэцім кваліфікацыйным раўндзе ЛК, па 100 тысяч – за ўдзел у кожным раундзе адбору, які не скончыўся выхадам у групу (у «гарнякоў» іх атрымалася два), і яшчэ 260 тысяч – як «суцяшэнне» для чэмпіёна краіны, які не дайшоў да групавога этапа. Сумарна якраз 1,01 млн – і гэтыя грошы, паводле нашай інфармацыі, у 2023-м «Шахцёр» паспеў атрымаць на свой рахунак.
Цяпер еўрапейцы лічаць выплату неправамернай – таму што салігарчан, калі б гісторыя з даўгамі выявілася раней, наогул не павінны былі дапускаць да той еўракампаніі. Вось ва УЕФА і хацяць свае грошы назад. Адзначым, што ў рашэнні арганізацыі не ўказаны канкрэтны тэрмін аплаты штрафу.
Па нашай інфармацыі, «Шахцёр» мае намер падаць новую апеляцыю – у Спартыўны арбітражны суд у Лазане. Але гэта клубу наўрад цi дапаможа. А ён цяпер і так працягвае знаходзіцца ў цяжкім фінансавым становішчы. Да гэтага часу не закрытыя даўгі перад тымі, хто падаваў пазовы ў ФІФА: сумарны памер, па нашых звестках, складае 1,3 млн еўра. Застаюцца ў клуба і запазычанасці перад іншымі арганізацыямі – за жыццё ў гасцініцах, арэнду стадыёна і не толькі. У жніўні 2023-га мы пісалі пра гэта падрабязна – тады агулам даўгі складалі каля 8 млн еўра. У снежні інсайдар Уладзіслаў Татур паведамляў, што колькасць паменшылася – зрэшты, запазычанасці ўсё роўна ацэньваліся ў 5-7 млн еўра.
Як кажуць нашыя суразмоўцы з беларускага футбола, якія знаёмыя з сітуацыяй у «Шахцёры», цяпер вялікая верагоднасць таго, што пасля заканчэння сезона-2024 куратар клуба, кіраўнік «Беларуськалія» Іван Галаваты ўсё ж запусціць для «гарнякоў» працэдуру банкруцтва, каб пазбегнуць разлікаў па даўгах. Такі расклад ужо быў верагодны ў канцы 2023-га, аднак тады ўсё ж было прынятае рашэнне паспрабаваць выратаваць сітуацыю. У клубе нават пачалі разлічвацца па даўгах з беларускімі гульцамi.
Але, здаецца, праблемы з былымі легіянерамі і новае рашэнне ад УЕФА паставяць на клубе крыж.
