«Барселона» не плануе падпісваць кагосьці на замену Гаві

«Барселона» не збіраецца выходзіць на трансферны рынак, каб падпісваць новага паўабаронцу на замену траўміраванаму Гаві.

Нагадаем, сёння ў 19-гадовага выхаванца «Ла Масіі» дыягнаставалі разрыў пярэдняга крыжападобнага звязка калена і пашкоджанне меніска. Праз гэта ён прапусціць ад 7 да 9 месяцаў.

Як паведамляе Marca, у «Барсе» не плануюць падпісваць кагосьці на замену Гаві, паколькі зараз прыярытэтам з'яўляецца трансфер форварда «Атлетыка Паранаэнсе» Вітора Роке. А купляць яшчэ аднаго гульца будзе задорага ва ўмовах няпростай эканамічнай сітуацыі.

Акрамя таго, у каталонскім клубе вераць у Ферміна Лопеса і тое, што ён здольны замяніць Гаві, а таксама лічаць, што пяці паўабаронцаў будзе дастаткова да канца сезона (Педры, Ілкай Гюндаган, Фрэнкі дэ Ёнг, Арыёль Рамэу і Лопес).