Станіслаў Сувораў: «Спарынгаў з замежнымі камандамі «Шахцёру» не хапае»

Галоўны трэнер «Шахцёра» Станіслаў Сувораў распавёў, як у каманды праходзіць трэніровачны збор.

– Як ацэньваеце пройдзены этап міжсезоння і тое, як каманда ўвайшла ў працу?

– Правялі тры добрыя цяжкія тыдні на годным узроўні. Зразумела, што хлопцам трэба было да мяне звыкнуцца, таму што ў мяне, думаю, нялёгкія нагрузкі. Але мы знайшлі агульную мову і выдатна аддаліся працы.

– Многія каманды праводзяць зараз зборы ў абласных цэнтрах, дзе ёсць манежы. Аднак вы працуеце ў Салігорску на «сінтэтыцы» стадыёна «Шахцёр» пад адкрытым небам. Ці плануеце ўсё ж куды-небудзь выбрацца?

– Думаю, у нас у Салігорску і так лепшыя ў краіне ўмовы для трэніровачнага працэсу. Ёсць поле з падагрэвам; так, у першыя тыдні на ім было крыху снегу, але цяпер усё растала. Ёсць трэнажорная зала, СПА-цэнтр… Ехаць у манеж, каб проста пагуляць і патрэніравацца пад купалам, не бачу сэнсу.

Пры тых умовах, якія ў нас ёсць, сэнс куды-небудзь выязджаць з'явіцца толькі ў тым выпадку, калі будзе магчымасць пагуляць з нейкімі замежнымі камандамі. Вось такіх спарынгаў нам, вядома, бракуе. На жаль, мы не можам праводзіць зборы за мяжой і гуляць з супернікамі з іншых краін. Таму даводзіцца сустракацца з тымі ж камандамі, якія будуць нашымі сапернікамі ў вышэйшай лізе. Па сутнасці, як трэці круг чэмпіянату.

– «Шахцёр» ужо не першы спарынг праводзіць у незвычайным фармаце – 4 тайма па 30 хвілін. Ваша вынаходства?

– Мы практыкавалі гэта яшчэ тады, калі я працаваў у петрыкаўскім «Шахцёры». А тут ужо Арцём Чалядзінскі сам мяне прасіў, каб мы правялі матч у такім фармаце, а мне заставалася яго толькі падтрымаць, бо нам самім гэта было патрэбна. Сэнс тут у тым, каб лепш размеркаваць паміж футбалістамі нагрузку, і хлопцы атрымалі нармальную практыку. Груба кажучы, усё згулялі па 60 хвілін, хтосьці – 30, – сказаў Сувораў.