Ідэальны ход гульнi Месі супраць Раналду: галы абодвух за тайм, прычым у Крышцiяну – не толькі з пенальці
Iх сукаманднiкi забiлi яшчэ шэсць разоў!
Легенды ў тым ліку супрацьстаянняў у Эль-Класіка Ліянель Месі і Крышцiяну Раналду сустрэліся зноў. Цяпер – у таварыскім матчы: «ПСЖ» Месі, якi кантралюецца катарскімі шэйхамі, прыехаў у Саудаўскую Аравію на матч са зборнай камандай з гульцоў мясцовых «Аль-Хілаля» і «Аль-Насра», куды нядаўна перайшоў Раналду.
Матч склаўся ідэальна для сваёй шыльды – першыя два мячы забілі як раз антаганісты. Ужо на 3-й хвіліне Нэймар ідэальна закінуў на Месі, які прыняў мяч і перайграў варатара.
А ў сярэдзіне першага тайма каманда гаспадароў спазнала хатняе судзейства – ім далі пенальці за стык у паветры Раналду і кiпера парыжан Кейлара Наваса. Да «кропкі» падышоў сам Крыш – і не прамахнуўся.
Але максімальна гарачай апынулася канцоўка першага тайма – выдаліўся Хуан Бернат з «ПСЖ», Маркіньяс вывеў парыжан наперад, а ўжо ў дададзеныя хвіліны Неймар па-піжонску не забіў пенальці, на што аператыўна сваім другім голам адказаў Крышцiяну – усе разгубіліся пасля яго ўдару галавой у штангу, а сам форвард дабіў мяч у сетку.
Зрэшты, галоўнае – гэта павага паміж зоркамі.
У другім тайме было яшчэ тры галы за першыя 15 хвілін – вызначыліся Серхіа Рамас і Кіліян Мбапе з пенальці за ПСЖ плюс карэйскі абаронца Чжан Хен Су за саудаўскую каманду. А потым Месі і Раналду сышлі з поля. Ужо без іх сапернікі ўстанавілі выніковы лік яркага матча – 5:4 на карысць «ПСЖ».
