Трэнер зборнай Кандрацьева крыўдзіцца на «Беларусь 5», бо там зашмат негатыву пра яго фенаменальную каманду. Як у студыі дзяржТБ лаяліся найміты рэжыму
«Мы вам нешта вінныя? Гэта не так»
26 чэрвеня на рэжымным тэлебачанні было горача. На адзіны спартыўны канал краіны «Беларусь 5» у госці завітаў трэнер Дзмітрый Раўнейка з фенаменальнай зборнай Кандрацьева, якая нядаўна атрымала першую перамогу ў афіцыйным матчы за 2 гады (пацярпела Косава ў адборы да ЧЕ-2024 – 2:1). Так, скончылася амаль стаўшая гістарычнай серыя з 16 гульняў без перамог. А які цудоўны быў серыял – 13 параз і 3 нічыіх!
Не ведаю, ці ўсхвалялі гэты поспех у эфіры «На грани фола» і ці казалі пра «ўздым з кален» (псіхіку трэба берагчы і абмяжоўваць кантэнт з экранаў беларускага ТБ), але ўсё ж такі частка перадачы вартая ўвагі. Сітуацыя наступная: Раўнейка не спадабалася, як супрацоўнік «Б-5» Яўген Табула «прад'явіў» яму за праіграны матч з Ізраілем (тая самая 16-я параза, на якой серыя спынілася), і тут пайшло-паехала.
Табула: «Давайце адказ, калі ласка, на пытанне. У другім тайме матчу з Ізраілем зламаўся выхад з абароны ў атаку ад слова. У першым тайме хлопцы гулялі перыядычна праз Марозава і ён чапляўся, то ў другім шмат разоў гулялі на адбой. Больш за 20 удараў былі проста на вынас. Бахар зусім не чапляўся за гэтыя мячы. Таму мы ўвесь час гулялі ў абароне, наеліся і з 60-й хвіліны ледзь валачылі ногі».
Раўнейка: «Па-першае, адразу пастаноўка пытання: «Давайце адказ». Я ў вас не на сумоўі. Вы проста цікавіцеся – я дзялюся. А вы потым хвалюецеся, чаму да вас не прыходзяць людзі, чаму не маюць зносіны. Таму што тут першапачаткова такое, што мы вам нешта вінныя. А гэта не так».
Табула: «Ну чаму? Трэнеры і гульцы зборнай павінны заўзятарам...»
Раўнейка: «Не, яны не павінны прыходзіць менавіта да вас сюды. Глядзіце, у што ўсё пераліваецца. Не ў нейкую аналітычную праграму, а ў ток-шоу. Мы проста абмяркоўваем, выказваем сваё меркаванне. Тады трэба запрашаць агентаў. Чаму вы крыўдуеце, што трэнеры не жадаюць прыходзіць?»
***
Раўнейка ўспомніў пра ўласную годнасць? Каб не той нюанс, што працуе ён у зборнай, якая не парамагала два гады і да таго ж атрымлівае з кішэні рэжыму, які абкрадвае беларусаў, 7,5 тыс. еўра, было б цікава. А так... Годнасць годнасцю, але ў такіх абставінах трэба ўжо «раздивацца и работаць», Дзмітрый.
Але вернемся да тэмы. У спрэчку ўступіў каментатар Генадзь Салавей, з якім у Раўнейкі, здаецца, зусім не сяброўскія адносіны.
***
Салавей: «Усе [трэнеры] прыходзяць, акрамя аднаго [галоўнага трэнера зборнай Георгія Кандрацьева]».
Раўнейка: «Назавіце, дзе прыходзіць галоўны трэнер зборнай?»
Фёдар Прошкін: «Валерый Карпін у Расіі...»
Раўнейка: «Дзе яшчэ? Дык вы рабіце такую структуру, каб людзі хацелі сюды прыходзіць. Але калі гэта не так…»
Ілля Бакай: «Гэта значыць, галоўны трэнер не абавязаны прыходзіць на адзіны ў краіне спартыўны канал?»
Раўнейка: «Да вас – не. Калі б гэта было не абмеркаванне, каго зняць, а каго прызначыць, а больш нешта аналітычнае… Вы ж гледзіце, мусіць, Англію, яшчэ што-небудзь. Там прыходзяць тры былыя футбалісты, тры трэнеры, якія паміж сабой маюць зносіны, закідваюць нейкую тэму.
Напэўна, у вас яшычэ скажэнне карцінкі. Калі ты каментуеш і глядзіш чэмпіянат Англіі, Іспаніі ці Лігу чэмпіёнаў, то думаеш, што разбіраешся ў футболе. Але гэта ўсяго толькі карцінка са скрынкі, з верталёта.
Агульнае разуменне футбола крыху па-іншаму ўладкавана. Таму там больш нюансаў і ўсяго іншага».
***
Цікава, якіх экс-футбалістаў жадае бачыць на ТБ Раўнейка? Мабыць Драгуна, Стасевіча, Гутара, Бардачова і іншых, што трапілі ў «чорны спіс» «мінспорту» рэжыму, на які ён працуе?
***
Прошкін: «Але заўзятары ж таксама скрынку глядзяць».
Раўнейка: «Ёсць прэс-канферэнцыі. Вы можаце паехаць і задаць пытанні».
Салавей: «У Венгрыі?»
Раўнейка: «У Венгрыі. Вы ж спартыўны тэлеканал, адзіны ў краіне».
Салавей: «Нам не даюць акрэдытацыю. Напэўна вы ў курсе».
***
Мо не трэба на прапагандысцкім ТБ працаваць, хлопцы?
***
Раўнейка: «І што? Можна задаваць пытанні праз прэс-службу, праз іншых. Можна тут узяць інтэрв'ю ў галоўнага трэнера. З вашага тэлеканала ўжо прыходзілі і бралі інтэрв'ю. Але сюды ніхто не абавязаны да вас прыходзіць. Тым больш тут увесь час негатыўнае стаўленне да зборнай. Колькі ўжо я ў ёй – увесь час негатыў».
Прошкін: «Ды нармальнае стаўленне».
Раўнейка: «Увесь час у вас праблемы са зборнай».
Салавей: «А вы мяркуеце, што іх няма?»
***
На гэтай «разрыўной» ноце агляд сваркі служкаў рэжыму скончым. Цікавае, канешне, відовішча, поп-корнавае. А што думаеце вы?