Герман Несцераў: «Кожная каманда, нягледзячы на месца ў табліцы, змагаецца на мяжы сваіх магчымасцяў, каб прайсці як мага далей»

– У гэтым матчы, напэўна, усё ж прысутнічала нейкае хваляванне, вельмі нясмела пачалі, але потым, так бы мовіць, разагрэліся і пачалі выконваць тое, што ад нас прасіў трэнерскі штаб. Ключавым момантам я б назваў першую шайбу, было важна завалодаць ініцыятывай. Пасля фінальнай сірэны я ўжо проста «выдыхнуў».

– Якую ролю ў гэтай серыі адыграла наша канадская пляцоўка? Усё ж за тры дамашнія матчы «Гомель» закінуў восем разоў толькі пры дзвюх прапушчаных шайбах.

— На гэтай пляцоўцы мы правялі ўвесь сезон і больш прывыклі да яе, нам добра гуляць на такой пляцоўцы, яна падыходзіць да нашага стылю гульні.

– Да старта плэй-оф вярнуўся ў склад Іван Сякерін, ён гуляў у першай тройцы разам з табой, стабільна набіраў ачкі. Што можаш сказаць пра яго, наколькі яго вяртанне паўплывала на гульню каманды?

– Вядома, мы ўсе чакалі яго хутчэйшага вяртання. Ваня вялікі працаголік, добры хакеіст з разумнай галавой, у нас у тройцы з ім вельмі добрае паразуменне, што і прынесла свой плён у гэтых паядынках.

– Перад чвэрцьфіналам многія казалі, што пара «Гомель» – «Нёман» будзе самай непрадказальнай, бо супернікі даволі роўныя і зыход матчаў будуць вырашаць дробныя дэталі. Ці сапраўды так і атрымалася?

– Так, увогуле так і выйшла. «Гомель» і «Нёман» сапраўды роўныя каманды, суседзі ў турнірнай табліцы. Як у плэй-оф, так і ў рэгулярцы ў нас з імі былі добрыя гульні, напружаныя, ніхто ніколі не хацеў саступаць.

– Усё яшчэ да канца не вядома, якія каманды будуць гуляць у паўфінале, «Гомель» можа выйсці як на «Віцебск», так і на «Металург». Ці сачыў за матчамі ў паралельных парах? Ці здзівілі вынікі ў іх?

– Так, атрымоўвалася паглядзець па тэлевізары. Усюды максімальны напал, у плэй-оф ідуць ужо зусім іншыя гульні, чым у рэгулярцы. Кожная каманда, нягледзячы на іх месца ў турнірнай табліцы, змагаецца на мяжы сваіх магчымасцей, каб прайсці як мага далей, таму вынікам дзівіцца няма чаго, – сказаў Несцераў.