Новы супернік Баньяі. Хорхе Марцін бліскуча выступіў на Гран Пры Германіі
Фота: motogp.com
Такімі тэмпамі чэмпіянат MotoGP хутка можна будзе пераймяноўваць у монасерыю Ducati. Па выніках этапу на Заксэнрынгу ў першай дзясятцы апынуліся толькі два гоншчыка на матацыклах іншых марак. Затое Франчэска Баньяя з завадской Ducati Lenovo Team і Хорхе Марцін з Prima Pramac Racing зладзілі нядрэннае шоў.
Пакуль мы глядзім гонкі і разбіраем іх падзеі ва Украіне працягваецца вайна. Яна не скончыцца заўтра, нашы суседзі пакутаваць будуць яшчэ доўга. Так не павінна быць, і ў інтарэсах усяго цывілізаванага свету хутчэй скончыць кровапраліцце – даць УСУ ўсю неабходную зброю. Перамога Украіны прынясе доўгачаканы мір, а таксама дапаможа вызваліцца беларусам. Слава Україні! Героям Слава! Верым! Можам! Пераможам! Жыве Беларусь!
Але і пра гонкі забывацца не варта, тым больш што не ўсе яны як Формула 1. Вось чэмпіянат свету MotoGP ад яе адрозніваецца ў лепшы бок, хаця і тут не ўсё ідэальна. Так, барацьба за чэмпіёнства тут сапраўдная, аднак вядуць яе гоншчыкі не зусім розных каманд. Калі ў той жа Формуле 1 нават Williams будуе аўтамабілі самастойна, а набывае толькі сілавыя ўстаноўкі, то ў MotoGP прыватныя калектывы проста набываюць матацыклы ў завадскіх, часта становячыся іх сатэлітамі.
Адным з такіх фактычна ёсць Prima Pramac Racing, чые гоншчыкі Хорхе Марцін і Жоан Зарка выступаюць на такіх жа Ducati Desmocedici GP23, як у Франчэска Баньяі і Энеа Басціаніні з завадской Ducati Lenovo Team. Затое выступаюць няблага, а гэта таксама трэба ўмець. Выдзяляецца тут асабліва малады іспанец, які і стаў галоўным героем Гран Пры Германіі, што прайшоў у мінулыя выхадныя.
Кваліфікаваўся Хорхе пры гэтым толькі шостым, тады як Баньяя ізноў стартаваў з поўлу. У суботнім спрынце Пэка зрабіў гэта таксама нядрэнна, адбіўшы атаку свайго былога напарніка Джэка Мілера. Гоншчык Red Bull KTM Factory Racing, аднак, не адступіў, і ў самым пачатку другога круга скарыстаўся барацьбой Франчэска якраз з Марцінам – у першы паварот яны ўвайшлі па занадта шырокай траекторыі, і аўстраліец выйшаў наперад.
Лідзіраваў Джэк, зрэшты, толькі да пятага круга, на якім яго абагнаў Марцін. Кругам пазней Джэка абышоў і Баньяя, распачаўшы барацьбу за першую пазіцыю. Праўда, угнацца за Хорхе было цяжка, і ён фінішаваў першым, у дзвюх з паловай секундах ад Баньяі, які задаволіўся другой пазіцыяй.
Мілер адмашку клецістым сцягам атрымаў трэцім, але паспрабаваў выправіць вынік у нядзелю, калі захапіў лідарства ўжо на старце. Праўда, страціў яго ўжо на першым кругу, дапусціўшы на яшчэ халодных шынах памылку ў адзінаццатым павароце. Джэк страціў некалькі пазіцый і пазней адкаціўся на шостую. Ну, хаця б не ўпаў, у адрозненні ад Марка Маркеса, які ў мінулы ўік-энд нападаўся ад душы.
Асабліва непрыемны эпізод для шасціразовага чэмпіёна прэм’ер-катэгорыі з Repsol Honda Team здарыўся ў пятніцу, калі ў другой свабоднай практыцы яго матацыкл у першым павароце знёс Жоана Зарка, які выязджаў на трасу з піт-лэйну. На шчасце, у гэтым інцыдэнце ніхто не пацярпеў, затое Маркес затым падаў яшчэ чатыры разы. Апошні быў па ходу ворм-апа перад гонкай у нядзелю, калі Марк пашкодзіў вялікі палец на левай руцэ.
Таму адзінаццатае месца ў спрынце так і засталося гэтым разам лепшым вынікам для адзінаццаціразовага пераможца Гран Пры Германіі. Пры гэтым этап на Заксэнрынгу праз траўму рукі, атрыманую на папярэднім Гран Пры Італіі, прапускаў і суайчыннік і напарнік Маркеса Жоан Мір. Таму не дзіўна, што ў першую дзясятку па выніках нямецкага Гран Пры патрапілі толькі той жа Мілер, а таксама гоншчык CryptoDATA RNF MotoGP Team (кліенцкая Aprilia) Мігель Алівейра, які гэтую дзясятку і замкнуў.
Ну а галоўныя разборкі шлі паміж наезнікамі Ducati. На трэцім кругу Марцін, які ізноў адразу прабіўся ў групу лідараў, лідарам і стаў, абагнаўшы Баньяю ў дванаццатым павароце. Пэка захаваў тэмп у дастатковай ступені, каб застацца непасродна за канкурэнтам з Pramac. Іх супрацьстаянне, праўда, некаторы час мела пазіцыйны характар, пакуль на дваццаць першым кругу італьянец не здзейсніў паспяховую атаку ў дванаццатым павароце.
Аднак усяго праз два кругі ў тым жа месцы шчыліну ў яго абароне знайшоў ужо Марцін, які вярнуў лідарства сабе. Баньяя ізноў прыняўся насядаць на яго, і на апошнім кругу давёў справу нават да кантакту, які, на шчасце, не прывёў да аварыі. Марцін не толькі ўстаяў на колах, але і ўтрымаў лідарства, узнагародай за што стала яго перамога. Баньяя фінішаваў следам у 0,064 секунды, трэцяе месца заняў Зарка, які стартаваў чацвёртым і ў гонцы выдатна пабароўся з некалькімі супернікамі.
Баньяя пакінуў Заксэнрынг лідарам чэмпіянату, у яго 160 ачкоў. Яго галоўным пераследнікам з’яўляецца цяпер Марцін, які мае 144 балы, а гоншчык Mooney VR46 Racing Team Марка Безэкі, які ў спрынце фінішаваў сёмым, а ў нядзельнай гонцы чацвёртым, са 126-цю ачкамі апусціўся на трэці радок. Prima Pramac Racing замацаваліся на першай пазіцыі ў заліку каманд, дзе ў іх 253 балы. Mooney VR46 Racing Team з 215-цю ачкамі на другой пазіцыі, а на трэцюю выбраліся Ducati Lenovo Team, у якіх 186 балаў.
Удзельнікам MotoGP застаўся апошні рывок перад летняй паўзай, і зробяць яны яго ўжо ў бліжэйшы ўік-энд у Асэне, дзе пройдзе Гран Пры Нідэрландаў.