Зменшчык Навіцкага знік з ТБ з-за бяды з тварам – але лёг у бальнiцу толькі пасля працы на хакеі Лукашэнкі насуперак праблемам з дыкцыяй
Дзмітрыя Аўрамчыка пакінуў блізкі чалавек - а вось сам ён так не зрабіў.
20 сакавіка чарговы выпуск праграмы «Ясна пра хакей з Дзмітрыем Аўрамчыкам» на канале «Яснае TV» дзяржаўнага «Белтэлекама» выйшаў у эфір без Дзмітрыя Аўрамчыка. Замест яго ў кадры з'явіўся каментатар канала і ФХБ, калега Аўрамчыка Аляксей Рагалевіч – ён сказаў, што Дзмiтрый «наўрад ці хутка вернецца», а прычына гэтага «роўна тая ж, якая амаль год таму прымусіла Джасціна Бібера адмяніць свой канцэртны тур».
У чэрвені 2022-га гастролі Бібера сарваліся з-за таго, што ў спевака паралізавала паўтвара. Гэта вельмі непрыемная сітуацыя віруснай прыроды, якая можа пачынацца са звычайнага болю ў вуху, з-за чаго чалавек думае пра дробныя праблемы са здароўем і не адразу прыступае да патрэбнага лячэння. А прамаруджванне павялічвае шанцы на тое, што параліч можа застацца назаўжды. Праўда, працэнт аднаўлення тваравых функцый вялікі – але на гэта патрабуюцца звычайна многія месяцы лячэння.
Тым часам Аўрамчык знік са студый на матчах хакейнага ЧБ, дзе даўно супрацоўнічае з ФХБ, прапусціў закрыццё сезона «Дынама», для якога працуе вядучым на хатніх матчах, і яшчэ адзін выпуск «Ясна пра хакей». Затое актывізаваўся Telegram-канал Аўрамчыка – праўда, у кароткіх відэа ён прамаўляў толькі асобныя фразы, а ў кадры з'явіўся адзін раз: вочы былі закрытыя акулярамі, а рот адкрываўся не цалкам – плюс некаторыя складанасцi з дыкцыяй, як быццам пры праблемах з зубамі. Аднак усё гэта падыходзіла і пад апісанне частковага паралічу.
31 сакавіка Аўрамчык у сваіх сацсетках усё ж расказаў падрабязнасці. У яго сапраўды паралізавала правую палову твару – на гэтым баку няма мімікі: не адкрываецца рот, не закрываецца вока. Аўрамчык паказаў, як гэта выглядае – наўрад ці хтосьці хацеў бы сабе такога.
Лекары паставілі дыягназ неўрыт тваравага нерва – гэта значыць выявілі запаленне адной з пар чэрапна-мазгавых нервовых адгалінаванняў з-за віруснай інфекцыі. Прычым, па словах Аўрамчыка, у яго дрэнныя аналізы – гэта значыць прагноз такі, што аднаўленне зацягнецца надоўга. Праўда, на вядучым паспрабуюць яшчэ нейкі «дарагі прэпарат» – але без гарантый таго, што ён паскорыць працэс. Як сказаў Дзмiтрый, добрыя лекары настроілі яго на шмат месяцаў лячэння. Магчыма, на гэта паўплывала і позняя рэакцыя – Абрамчык адчуў боль у вуху 10 сакавіка, але візіт да лекара запланаваў толькі на 14 сакавіка, таму што перастаў адчуваць густы, аднак раніцай таго дня прачнуўся ўжо з паралічам.
Апроч іншага, вядучы панаракаў на самы цяжкі перыяд – за час у лякарні ў даважку пашкодзілі яго машыну, бацька прыгразіў самагубствам, а таксама Дзмiтрыя «пакінуў самы блізкі чалавек». А вось сам Аўрамчык такога не дапусціў. У відэа ён згадаў, што ляжыць у бальнiцы з 20 сакавіка – хоць лячыцца пачаў з 14 сакавіка, але «адпрацаваў выходныя, як мог трымаў твар, каб можна было размаўляць».
Што ж такога было 18-19 сакавіка, дзеля чаго трэба працаваць нават з тваравым паралічам? Матчы каманды Аляксандра Лукашэнкі. Аўрамчык да выбараў называў яго «арыенцірам», але і пасля фальсіфікацый і гвалту сілавікоў нічога не змянілася – больш за тое, Дзмiтрый канчаткова змяніў Уладзіміра Навіцкага ў ролі вядучага на гульнях Лукашэнкі ў хакей. За два дні, пасля якіх Аўрамчык усё ж такі лёг у бальніцу, у каманды Лукашэнкі было адразу дзве сустрэчы – 18 сакавіка з камандай з Гомельскай вобласці, а 19 сакавіка супраць «зорак» «Юнацтва» ў гонар 20-годдзя клуба. Абедзве гульні лукашэнкаўцы, канешне, выйгралі – хоць каманда ад «Юнацтва» вяла 6:2, але нават з нагоды юбілею ёй перамагчы не дазволілі (вынік – 6:8). У каментарах Аўрамчыка былі чутныя праблемныя моманты – у свежых відэа, дарэчы, з дыкцыяй у яго ўжо лепш.
Пару тыдняў таму Джасцін Бібер выклаў відэа, на якім нарэшце шырока ўсміхаецца – параліч быў пераадолены. Думаем, у Аўрамчыка з часам таксама атрымаецца. А пакуль каманда Лукашэнкі ўсё ж такі абышлася без яго – 1 красавіка яе чарговы матч правёў радыйшчык Аляксей Клачкоў.
