Сабаленка ляніва адбіваецца ад іміджу людажэркі – дапамагае іспанская сяброўка: сышліся ў гарачыя дні вайны, пры Арыне зняла ўкраінскую стужку, дапамагала Кальцову з сюрпрызам
Блізкасць да «рук на ягадзіцах».
На днях перад стартам турніру WTA у Штутгарце на некалькі пытанняў ад заўзятараў адказала іспанская тэнісістка Паула Бадоса. Сярод іншага яе спыталі, з кім яна адсвяткуе тытул у выпадку поспеху. «Выберу Арыну Сабаленку. Думаю, будзе весела», - адказала спартоўка. Нядзіўна - Бадоса і Сабаленка ўжо год як вялікія сяброўкі, і Паўла нават спрабуе абяліць Арыну ў іміджавых пытаннях, што звязаныя з вайной ва Украіне і вернасцю Сабаленкі суагрэсарскаму рэжыму Лукашэнкі. Раскажам больш падрабязна пра тое, як развіваліся ўзаемаадносіны тэнісістак.
Бадоса старэйшая за Сабаленку ўсяго на паўгода. 25-гадовая іспанка нарадзілася ў Нью-Ёрку - там яе бацькі працавалі мадэлямі, і яшчэ ў раннім дзяцінстве Паула паспела зняцца ў некалькіх фотасесіях. Калі дзяўчынцы было 7, сям'я пераехала ў Барселону, дзе Бадоса і пачала займацца тэнісам - і ў 2015-м выйграла юніёрскі «Ралан Гарос». На дарослым узроўні ў спартоўкі доўга не атрымлівалася, ад чаго ў яе былі вялікія псіхалагічныя праблемы, але ў 2021-м яна змагла заявіць пра сябе, калі ў кастрычніку таго года выйграла буйны турнір (яго нават называюць «пятым у «Вялікім шлеме») у Індыян-Уэлсе, у фінале адолеўшы беларускую тэнісістку Вікторыю Азаранку.
У Бадосы быццам бы няма славянскіх каранёў, але ўсё тэніснае жыццё яна неяк звязаная з рускамоўнымі гульцамі: у дзяцінстве фанацела ад дачкі гамяльчан Марыі Шарапавай, у юніёрскім узросце моцна сябравала з расіянкай Дар'яй Касаткінай, у 2020-м на "Ралан Гарос" стала ў пару з яшчэ адной расіянкай (выступае за Казахстан) Аленай Рыбакінай. У самым пачатку 2022-га Бадоса згуляла на турніры ў Адэлаідзе ў дуэце з Азаранкай - пры гэтым у першым крузе адзіночкі Вікторыя абгуляла Паўлу (парай яны прайшлі два раунды і зняліся).
З Сабаленкай да 2022-га Бадоса асабліва не размаўляла - у 2021-м яны два разы сустрэліся на корце, абодва разы прарэжымная падпісантка саступіла. Як аказалася, у абедзвюх засталося ўражанне, што іншая - пагардлівая зазнайка. Аднак каб адчуць сябе «роднаснымі душамі», гэтым дваім было дастаткова пагутарыць крыху бліжэй. Гэта здарылася на выставачным турніры ў Індыян-Уэлсе 8 сакавіка. Фатографы зафіксавалі, як Сабаленка і Бадоса ля корта над нечым бесклапотна смяяліся.
Тады ішлі самыя цяжкія дні вайны ва Украіне, якую з 24 лютага працягвае Расія з выкарыстаннем тэрыторыі Беларусі. Сабаленка праз пару дзён пасля таго матчу, перад стартам афіцыйнай праграмы Індыян-Уэлса, запэўніла журналістаў, што "без праблем надзене стужачку" ў колерах украінскага сцяга, бо "людзям патрэбная нашая падтрымка, яны павінны разумець, што мы вельмі перажываем". Аднак тут жа прарэжымны загадчык беларускага тэнісу Сяргей Рутэнка заявіў, што запісаныя на відэа словы Сабаленкі нібыта «перайначылі». Сухі вынік - стужку тэнісістка так ні разу і не надзела.
Бадоса праграму Індыян-Уэлса стала гуляць якраз з маленькай сіне-жоўтай стужкай на кепцы - гэты знак падтрымкі не знікаў да самага вылету іспанкі ў паўфінале. А вось праз тыдзень на новым турніры стужкі ў Бадосы ўжо не было. Супадзенне гэта ці не, але ў Маямі тэнісістка заявілася не толькі ў адзіночку, але і ў пару - з Сабаленка.
Дуэту ў афіцыйным акаўнце WTA хутка прыдумалі назву Sabadosa - а ў перапынках паміж гульнямі дзяўчыны весела танчылі, і Бадоса выклала ў сябе ў профілі з подпісам, што яны з Сабаленка амаль што двайняты.
На кортах сумесна ў «Сабадосы» не тое каб пайшло - на трох турнірах за месяц яны выйгралі два з чатырох матчаў (у Штутгарце зняліся пасля першай перамогі) і на гэтым сумесныя выступы скончылі. Але гэта не перашкодзіла застацца найлепшымі сяброўкамі ў WTA-туры. Сабаленка казала, што з Бадосай яны «вельмі падобныя характарамі». Іспанка наогул расхвальвала калегу - маўляў, у прарэжымнай падпісанткі "добрае сэрца, яна вельмі класная і сціплая".
Апроч кучы сумесных сторыс, тэнісісткі паказвалі свае цёплыя ўзаемаадносіны за апошні год і больш арыгінальнымі спосабамі. У жніўні на турніры ў Таронта прыдумалі акцыю: гульцы чыталі пазітыўныя паштоўкі ад заўзятараў (а потым пісалі свае). Бадосе паштоўку зрабіла Сабаленка - пажадала поспехаў і назвала найлепшай. “Я ведаю, ад каго гэта. Яна найлепшая!» - адрэагавала іспанка.
У кастрычніку Бадоса пайшла з Сабаленкай на вячэру ў мексіканскай Гвадалахары, дзе быў чарговы турнір. Іспанка пажартавала над сяброўкай - сказала афіцыянтам, што ў падпісанткі за рэжым нібыта дзень нараджэння (на справе ён у траўні). Для Сабаленкі выкацілі віншаванне і камплемент ад шэфа, а яна пыталася ў сяброўкі, што за ##### [фігня] адбываецца.
У снежні ў Дубаі, дзе на выставачным турніры Сабаленка і Бадоса ўвайшлі ў адну каманду з адным з найлепшых тэнісістаў у гісторыі Новакам Джокавічам, дзяўчаты зноў пайшлі на вячэру. А там Сабаленку чакаў сюрпрыз - у месца, пра якое загадзя распавяла іспанка, без папярэджання прыбыў (хоць павінен быў быць на працы ў КХЛ) бойфрэнд беларускай тэнісісткі прарэжымны падпісант з хакейнай каманды Лукашэнкі Канстанцін Кальцоў. Сабаленка дзякавала сяброўцы за дапамогу і называла сюрпрыз найлепшым у жыцці.
У сакавіку 2023-га "Сабадаса" зноў сустрэліся ў Індыян-Уэлсе - і так радаваліся гэтаму, што абдымкі з адрывам іспанкі ад зямлі перараслі ў паляпванні па ягадзіцах. Сабаленка ў адказ на пост фатографа, які зняў гэты момант, нагадала, што ў яе і Паўлы ёсць хлопцы.
Сярод іншага Бадоса пару разоў спрабавала «адмазаць» Сабаленку ад якой-небудзь датычнасці да агрэсараў вайны ва Украіне – гэта пры прарэжымным подпісе і сустрэчы з Лукашэнкам ужо пасля зверстваў ягонага рэжыму ў 2020-м.
У канцы красавіка 2022-га Бадоса раскрытыкавала рашэнне "Уімблдона" не пускаць на турнір прадстаўнікоў Расіі і Беларусі. Іспанка не ўхваліла перасячэнне "палітыкі са спортам" (вось ужо не згубілася б сярод рэжымных чыноўнікаў) і заявіла, што вайна - гэта "нешта вельмі сур'ёзнае, чаго не павінна быць", але "несумленна прымешваць тое, у чым Арына не вінаватая". Гэты выступ прыстойна здзівіў украінскую тэнісістку Марту Касцюк - яна канстатавала, што Бадоса не адзіная паказвае, што «тэнісны свет такі вось жорсткі», і распавяла пра досвед зносін з іспанкай: «У Індыян-Уэлсе Паўла да мяне падышла, спытала, як я, ці ўсё ў мяне добра з роднымі - і ўсё. Потым я пыталася, ці не хоча яна разам згуляць - яна сказала, маўляў, можам недзе паспрабаваць, але наогул яна не гуляе пару. А потым я ўбачыла, што яна ў Маямі і Штутгарце ў пары з Сабаленкай. Мяне гэта вельмі здзівіла».
У красавіку 2023-га Бадоса зрабіла яшчэ адну спробу - зноў заявіўшы, што «палітыку і спорт нельга змешваць». Іспанка сказала, што ў курсе стаўлення да вайны не толькі Сабаленкі, але і іншай былой напарніцы Азаранкі. Бадоса запэўніла, што абедзве "супраць вайны" і "не вінаватыя, што нарадзіліся там, дзе нарадзіліся". Пра розніцу ў падыходах прынамсі да стужачак у падтрымку Украіны, наяўнасць якой залежала толькі ад саміх тэнісістак, у іспанкі, нажаль, дадаткова не спыталі.
Млява адбіцца ад прыхільнасці да рэжыму паспрабавала на днях і сама Сабаленка - калі яе наўпрост спыталі, як яна ставіцца да рэгулярных віншаванняў непасрэдна ад Лукашэнкі, якога раней называла чальцам сваёй каманды.
Але і тут Сабаленка прадэманстравала поўную пакорлівасць рэжыму - хоць і заўважыла, што словы Лукашэнкі "не дапамагаюць" ёй у жыцці, але дадала, што той "можа каментаваць усё, што захоча", а калі ўкраінцы яе "зненавідзяць яшчэ больш пасля яго выступленняў" , то, маўляў, на здароўе. У чарговы раз Сабаленка таксама сказала, што «не можа спыніць вайну» (што не тлумачыць, чаму тэнісістка не зрабіла ўвогуле ні кроку ў гэтым кірунку), і перайшла да заяваў, што нехта яе нібыта «не любіць толькі таму, што нарадзілася у Беларусі», а нехта і ўвогуле «ненавідзіць практычна ні за што». Наконт названых вышэй прычын нелюбові, якія значна больш сур'ёзныя, чым месца нараджэння, Сабаленка працягвае рабіць выгляд, што іх не існуе.
