Дзед дзяцей Міхалка – 34-разовы чэмпіён Эстоніі па веславанні. Яго дачка-акторка заўзела за МТЗ-РІПА, займалася муай-тай і была ў форме для здымкі топлес у «Ляпісаў»
Святлана Зелянкоўская нарадзілася праз 10 месяцаў пасля Алімпіяды бацькі, а пазнаёмілася з ім праз 27 гадоў.
23 красавіка на YouTube-канале «ТОК» выйшла інтэрв'ю з беларускай акторкай Святланай Зелянкоўскай, якая ў свой час доўга працавала ў Купалаўскім тэатры, а кінароля княгіні Анастасіі Слуцкай у 2003-м зрабіла яе вядомай на ўсю Беларусь. У размове Зелянкоўская, сярод іншага, узгадала і гісторыю пра сустрэчу ў Эстоніі з бацькам, якога да таго не ведала. У выніку з Таліна, дзе ў канцы 2004-га выступалі купалаўцы, актрысе прыйшлося ехаць у Тарту, дзе жыў бацька - сам ён прыехаць на спектакль не змог праз наступствы аперацыі. За некалькі гадзін размовы Зелянкоўская зразумела, што гэта "ейны чалавек". Аднак тая сустрэча так і засталася адзінай. «Пасля ён памёр. Так што я як ведала, што трэба сустрэцца, трэба паспець», - распавяла Святлана.
Кантакты бацькі Зелянкоўскай дапамаглі знайсці ў эстонскім спартыўным камітэце. Раней акторка ўспамінала, што ён «быў чальцом нацыянальнай зборнай СССР па акадэмічным веславанні, прымаў удзел у Алімпіядзе 1976 гада ў Манрэалі». А ў самым першым расповедзе пра сустрэчу згадвала: "Ён адразу пачаў называць мяне Генадзьеўнай, а я яго Фёдаравічам". Карацей, прозвішча па такіх даных назваць няцяжка - вырас у Тарту і стаў 7-м на Алімпійскіх гульнях-1976 у распашных двойках ураджэнец расійскай Чувашыі Генадзій Фёдаравіч Кінка.
Атлету на той момант было ўжо 33 гады - і ён упершыню ўдзельнічаў у настолькі буйным турніры: ні на ЧЕ, ні на ЧС да таго яго прозвішча ў пратаколах не знаходзіцца. Магчыма, на гэта паўплывала змена партнёра - калі ў 1972-м (ужо пасля Гульняў таго года) Кінка выйграў чэмпіянат СССР у пары з Тойва Армісанам, то ў 1976-м паўтарыў поспех ужо з Ційтам Хелмей, з якім і паехаў на АГ. Акрамя гэтага, у Кінка было яшчэ восем медалёў савецкага ўзроўню. А ўжо ўнутры Эстоніі быў чэмпіёнам цэлых 34 разы - перамагаў і ў двойцы, і ў адзіночцы, і ў чацвёрцы, і ў васьмёрцы. На момант сустрэчы з ужо дарослай Зелянкоўскай Кінка даўно працаваў простым настаўнікам фізкультуры ў гімназіі Тарту. Памёр вясляр у канцы 2007 года.
Генадзій Кінка справа
Зелянкоўская нарадзілася 29 траўня 1977-га - праз 10 месяцаў пасля адзінай Алімпіяды яе бацькі. Мінчанку выхоўвала маці, якая таксама была спартыўнай жанчынай – займалася лыжным спортам і тым самым акадэмічным веславаннем. Святлану таксама рана аддалі ў спорт - але веславанне яе не прыцягвала, "хацелася нейкага больш прыгожага віду". Пачала дзяўчынка з фігурнага катання, але потым паспрабавала і ушу, а таксама лёгкую атлетыку і вялікі тэніс. Наконт апошняга бабуля Зелянкоўскай нават пасварылася з яе мамай, бо лічыла, што за багаццем секцый у дзіцяці знікае дзяцінства (сама Святлана цяпер лічыць, што ўсё было ў парадку). Але ў выніку пераважыла творчае - мама пачала вадзіць Святлану на розныя кінапробы, і Зелянкоўская засталася ў гэтай сферы.
У 22 гады акторка выйшла замуж за мастака Аляксандра Чарвонца, ад якога нарадзіла дачку Аксінню. Але саюз даволі хутка распаўся - успамінаючы пра гэта, Зелянкоўская сказала, што, "напэўна, не пагуляла [да шлюбу] і вырашыла пагуляць пасля". А ў 2008-м актрысу сталі заўважаць з адным з самых вядомых беларускіх музыкаў, лідарам гурта “Ляпіс Трубяцкі” Сяргеем Міхалком. Пазнаёміліся яны яшчэ ў 2003-м - група Міхалка і трупа Зелянкоўскай перасекліся ў цягніку, выпілі і пачалі скандаліць, у чым прыняў актыўны ўдзел Сяргей. Пасля гэтага Святлана мужчыну "не ўзлюбіла, не магла на яго нават глядзець". Але праз некалькі гадоў яны сустрэліся на запісе навагодняга віншавання "Белсата" - як адзначае актрыса, "ён ужо змяніўся, стаў спартыўным, не выпіваў". Пазней у інтэрв'ю яна не раз і не два будзе адзначаць выдатныя кандыцыі Міхалка.
Пасля сустрэчы Міхалок патэлефанаваў Зелянкоўскай - выбачэнні за выпадак у цягніку перацяклі ў размову на дзве гадзіны. Наступныя дзве сустрэчы артыстаў прайшлі, па іроніі, на перонах, ну а далей усё перарасло ў паўнавартасныя стасункі, якія ў 2015-м былі ўзаконеныя ўжо ва Украіне. У 2019-м і 2020-м, ва ўзросце ўжо больш за 40 гадоў, Святлана нарадзіла сыноў Фёдара і Мірона - а яшчэ ў 2013-м у пары з'явіўся сын Макар. Усе яны - адпаведна, унукі весляра-чэмпіёна. Праўда, у канцы 2022-га Зелянкоўская расказала, што разышлася з Міхалком. У свежым інтэрв'ю прычынамі жанчына назвала "шмат чаго - пачалі аддаляцца, калі яшчэ кавід быў, і палітычныя моманты ёсць".
Сярод іншага Міхалок у свой час захапіў Зелянкоўскую, якая да яго «не жыла правільна», ЗЛЖ. «Я прыхільнік як здаровага ладу жыцця, так і рацыянальнага харчавання, і дзень без трэніроўкі ці хаця б зарадкі сапраўды лічу бяздарным», – заяўляла акторка.
Яна расказвала больш падрабязна пра свае нагрузкі ў інтэрв'ю goals.by у 2012-м: «Займаюся ў трэнажорнай зале, бегаю. Хаджу на індывідуальныя заняткі па тайскім боксе. Ён дапамагае мне адчуваць сябе больш упэўнена, здымае негатыў. Улетку люблю хадзіць у конна-спартыўны клуб». А ў 2009-м акторка знялася топлес у кліпе на трэк «Ляпісаў» «Зорачкi» - потым казала, што не баялася, «бо была ў добрай форме».
Захаплялася Зелянкоўскім спортам і як глядачка. У 2000-х нямала здзівіла спартовых журналістаў, на некаторы час стаўшы заўсёдніцай дамашніх матчаў МТЗ-РІПА - потым тлумачыла, што заўзела за каманду праз «знаёмых рабят з Украіны» у складзе, і дадавала, што «жыўцом адчуваеш сваё дачыненне да таго, што адбываецца». Па тэлевізары акторка любіла глядзець не белфутбол, а фігурнае катанне, фрыстайл і біятлон. Прычынай сваёй цікавасці Зелянкоўская называла падабенства спорта і тэатра: «Ёсць канфлікт, актыўнае дзеянне, супрацьдзеянне, эмоцыі. Адзінае – гэта непрадуманы спектакль, невядома, якім атрымаецца фінал».
