Каб узяць тытул, худнеў са 140 кг. Вось за што лукашысты схапілі ў Гродне чэмпіёна Еўропы па каратэ

У канцы красавіка тэлеграм-каналы сілавікоў Лукашэнкі зрабілі справаздачу пра новыя масавыя затрыманні ў Гродна (пад папярэднюю хвалю, напрыклад, патрапілі фанаты хакейнага «Нёмана»). Сярод схопленых аказаўся чэмпіён Еўропы па каратэ сеншы Давід Ацьман - 27-гадовага атлета звінавацілі ў падпісцы ў Instagram на партал «Радыё Свабода» (лукашэнкаўскія носьбіты формы старанна змагаюцца з крыніцамі аб'ектыўнай інфармацыі). Зрэшты, мяркуючы па актыўнасці ў сацсетках, спартсмен ужо дома.

Кар'ера Ацьмана ў адзінаборствах пачалася даволі позна: у каратэ ён прыйшоў толькі ў 19 - прывяла сяброўка, якая з дзяцінства займалася ў секцыі. Пазней Давід спрабаваў сябе ў кікбоксінгу і тайскім боксе і нават узяў срэбны медаль чэмпіянату Беларусі па панкратыёне - адзінаборстве, што сумяшчае элементы барацьбы і кулачнага бою. На думку байца, заваяваць золата перашкодзіла судзейская памылка.

Праз некалькі гадоў Ацьман вярнуўся ў каратэ. У 2020-м была ўхвалена яго заяўка на ўдзел у чэмпіянаце Еўропы па правілах сеншы - там, у адрозненне ад каратэ-кекусінкай, дазваляюцца ўдары ў галаву. Праўда, у апошні момант турнір праз пандэмію скасавалі. Па выніку ЧЕ правялі летам 2021-га, Давід ізноў падаў заяўку. Спартсмен рыхтаваўся да спаборніцтваў у экстраным фармаце: за сціслы тэрмін яму трэба было скінуць больш за 10 кілаграмаў, бо ў суперцяжкай вазе (звыш 90 кг) была ўстаноўленая верхняя планка 130 кг, у той час як на момант пацверджання заяўкі гарадзенец важыў 141.

З гэтай задачай Ацьман справіўся і адправіўся ў балгарскую Варну, дзе выйграў усе тры баі і забраў першы міжнародны тытул. У чвэрцьфінале ён у трэцім раундзе накаўтаваў украінца Уладзіміра Дамашчанку, у паўфінале па рашэнні суддзяў быў мацнейшы за расіяніна Цімура Гасташава, а ў фінале адолеў васьміразовага чэмпіёна Украіны і чэмпіёна Еўропы па кікбоксінгу Данілу Ваяводкіна. Вынік двубою вырашыў удар локцем, які адправіў суперніка ў накдаўн (відэа фінальнага бою можна паглядзець тут з адзнакі 1 гадзіну 42 хвіліны).

У Гродне Ацьман з'яўляецца саўладальнікам начнога клуба "Галактыка" і фітнес-цэнтра "Тытан", дзе праводзіць сілавыя трэніроўкі, а таксама сам займаецца кікбоксінгам і тайскім боксам.

Акрамя таго Давід захапляецца электроннай музыкай: ужо выпусціў некалькі трэкаў, а ў лістападзе 2022-га ў сацсетках падзяліўся, што падпісаў кантракт з NoCopyrightSounds – брытанскім лэйблам гуказапісу. NCS створаны, каб вытворцы кантэнту маглі бясплатна выкарыстоўваць музыку пры стварэнні ролікаў на YouTube ці ў Twitch пры ўказанні выканаўцы і адпаведных спасылак у апісанні да відэа.