Бізнесмен Кныровіч параўнаў умовы для заняткаў спортам у Беларусі і Польшчы. Ці дагонім суседзяў? Або і так наперадзе?
«Гісторыя пра птушачак і спорт».
Аляксандра Кныровіча беларуская публіка ведае не толькі як бізнесоўцу, але і як медыяперсону з нестандартным поглядам і меркаваннем. Па адной з версій, менавіта праз адкрытую крытыку ў розных медыя лукашэнкаўская сістэмы прадпрымальнік у студзені 2017-га спачатку быў арыштаваны, а потым асуджаны да шасці гадоў калоніі ва ўмовах узмоцненага рэжыму (гэта здарылася ў 2018-м, праз 17 месяцаў пасля затрымання) – па «афіцыйнай», то бок, рэжымнай, версіі, за «ўхіленні ад выплаты падаткаў у асабліва буйным памеры і дачу хабару».
Як бы там ні было, у жніўні 2021-га Кныровіч выйшаў на волю і пакінуў Беларусь. Свой учынак ён патлумачыў тым, што «лепш буду сумаваць па Радзіме, займаючыся справай, чым седзячы чарговы раз у калоніі». У інтэрв'ю DW Кныровіч выказваў думку, што яго публічная пазіцыя ці спроба зноў заняцца бізнесам «хутка прывялі б да новай арыгінальнай крымінальнай справы».
Цяпер Кныровіч жыве ў Польшчы. Не так даўно на сваёй старонцы ў Facebook бізнесмен падзяліўся назіраннямі датычна да масавага спорту ў Польшчы і Беларусі. Атрымалася ў нейкай ступені сумная «Гісторыя пра птушачак і спорт»:
– Я вярнуўся ў спартзалу, да трэнаванняў. Хочацца крыху вярнуцца ў форму. Ну, у тую самую, якая была да прызямлення ў найлепшую калонію свету. Хаджу ў розныя спартзалы. Трэнуе мяне цяпер трэнер-беларус, у самым цэнтры Варшавы, на 5-м паверсе вялізнага офіснага будынка, але паколькі я ўвесь час катаюся туды-сюды, то і залы наведваю розныя.
І стала мне ўчора вельмі і вельмі сумна. Справа ў тым, што залы розныя, але ўсе вельмі высокай якасці. А ўчора дык увогуле, было нешта вельмі падобнае да таго самага мінскага «Свету Фітнеса», толькі з нармальным плавальным басейнам, невялікім, метраў на 25, ну і з джакузі, парнымі і гэтак далей.
І прыгадаў я, як 20 гадоў таму гэта было «элітнай паслугай». Мінімальны абанемент на год каштаваў 1200$, і сказаць «Я хаджу ў «Свет Фітнеса» было... прыкметай статусу. Ды і долар быў іншы.
У Польшчы ж дзейнічае сістэма велізарная Multisport. Яна павінна стымуляваць працоўных (а прывязаная яна да юрыдычных асоб) займацца спортам. Мой месячны абанемент каштуе 64 злотых у месяц (16 $). За гэтыя грошы мне даступна 4700 аб'ектаў у Польшчы і 38 відаў актыўнасцяў. І шмат-шмат усякіх бонусаў. Ну і, безумоўна, гэтыя выдаткі наймальнік уключае ў бухгалтарскія выдаткі.
І вось патрэнаваўся я, зайшоў у лазню, выйшаў новенькі на свежае паветра, і стала мне вельмі і вельмі сумна. Умовы для заняткаў спортам – гэта не пенсіі, не зарплаты, не цана на транспарт або бензін. І таму пра гэта асабліва і не гавораць і не пішуць. Але каб стварыць у Беларусі такую ж інфраструктуру, якая сёння існуе ў Польшчы, і зрабіць яе настолькі ж даступнай для грамадзяніна, трэба патраціць гадоў дзесяць і непрадказальна вялікую суму грошай, якіх у краіне, вядома ж, і няма. На гэтыя мэты. Затое ёсць... самі ведаеце на што.
Ішоў я, сумаваў, думаў пра гэта. Пра Multisport, бясплатныя футбольныя палі (з добрым газонам) і баскетбольныя пляцоўкі ў кожным мікрараёне, пра веладарожкі і пляцоўкі для варкаўта. І тут мяне зусім дабіў кракаўскі гарвыканкам.
Я наткнуўся вачыма на таблічку, якой гэтая ўстанова апавяшчала мяне пра тое, што калі ўжо я хачу падкарміць птушачак, якія ў вялікай колькасці водзяцца ва ўсякіх зялёных месцах Кракава, то рабіць гэта трэба не батонам, а толькі вызначаным відамі ежы, інакш птушкам будзе не вельмі... Ну і апісанне пэўных варыянтаў.
Вельмі цяжка апісаць розніцу ў якасці інфраструктуры. Як для людзей, так і для птушак. Але вельмі ад усяго гэтага сумна, – напісаў Кныровіч, дадаўшы мапу спартыўных аб'ектаў і актыўнасцяў у Варшаве ад Multisport.
Ці налічым такую ж колькасць даступных спартыўных аб'ектаў у Мінску?
Вось як на допіс адрэагавалі чытачы Кныровіча ў Facebook:
1) Як кажуць, і смех, і грэх.
2) Карыстальнік Alex St, здаецца, падзяліўся асабістым досведам. Для больш дакладнага разумення: 139 злотых па курсе – гэта прыкладна 106 беларускіх рублёў.
3) Віталь Трахтэнберг таксама сумуе:
4) Ёсць ў каментарах і аптымісты, якія сумаваць разам з Кныровічам не хочуць:
