Найлепшы футбаліст Беларусі-2021 то быў патрэбны «Шахцёру», то не – справа ў грошах і не толькі (16 тысяч на месяц, нарэшце мяняе клуб)
Развязка ў дзіўнай гісторыі.
Як хутка ў беларускім футболе ўсё можа перамяніцца. У 2021 годзе Андрэй Салавей быў лідарам "Гомеля", набраў 25 балаў па сістэме "гол + пас" (18+7), ледзь не стаў з камандай прызёрам ЧБ і ў выніку забраў званне найлепшага футбаліста Беларусі. Пасля - пераход у «Шахцёр» услед за найлепшым трэнерам краіны Іванам Біёнчыкам і імклівае падзенне. У Салігорску нападаючы зайграць не здолеў, а растанне з клубам атрымалася вельмі балючым.
Паводле інфармацыі «Трыбуны», ужо ў найбліжэйшы чацвер Салавей адправіцца ў Казахстан, дзе падпіша арэндную дамову з «Аксу» з прэм'ер-лігі. Хаця яшчэ нядаўна казаў, што хоча застацца ў «Шахцёры», ды і галоўны трэнер «гарнякоў» Аляксей Бага пераконваў, што разлічвае на футбаліста. Што ж раптам здарылася? Даведаліся падрабязнасці.
Што паказаў у «Шахцёры»?
Пра тое, што Салавей папоўніць салігорскі клуб, стала вядома яшчэ зімой 2021-га, незадоўга да таго, як гулец атрымаў званне найлепшага футбаліста Беларусі. Пераезд стаў магчымы найперш дзякуючы Івану Біёнчыку, які працаваў з форвардам у «Гомелі». Трэнер прыняў прапанову "Шахцёра", а ўслед за сабой перавёз і нападаючага. Кантракт Салавей падпісаў з «гарнякамі» у сярэдзіне студзеня 2022-га. На той момант гулец, па дадзеных transfermarkt.world, каштаваў мільён еўра.
І спачатку падавалася, што ўсё будзе нядрэнна. У першых трох турах Андрэй аформіў тры балы па сістэме «гол + пас»: у матчы з «Дняпром» выбіў 1+1, а ў паядынку з «Іслаччу» вызначыўся галявым пасам. Праўда, толькі ў двух з трох паядынкаў Салавей з'явіўся з першых хвілін. Плюс нападаючы адгуляў увесь матч за Суперкубак-2022.
У той перыяд Салавей быў запатрабаваны і ў нацыянальнай зборнай. 26 і 29 сакавіка каманда Георгія Кандрацьева гуляла таварнякі з Індыяй і Бахрэйнам. У першым матчы Андрэй з'явіўся на полі на пачатку другога тайма, а далей згуляў са старту 85 хвілін. Пры гэтым у кожным матчы забіў па мячы. Дакладны ўдар перад самым перапынкам у сустрэчы з Бахрэйнам стаў для беларускай каманды пераможным.
У чэрвені Кандрацьеў яшчэ двойчы выпускаў Салаўя ў форме "нацыяналкі" (са Славакіяй на 19 хвілін, з Азербайджанам - на 61). Але да таго часу кар'ера форварда ўжо ішла наперакасяк. А пачалося ўсё ў сярэдзіне красавіка, калі праз нездавальняючыя вынікі Біёнчыка звольнілі. На яго месца прыйшоў знаёмы мясцовым заўзятарам расіянін Сяргей Ташуеў. З тых часоў форвард хоць і з'яўляўся на полі, але ў большасці сваёй – з лаўкі. Прычым выкарыстоўваўся на розных пазіцыях: гуляў правым і левым вінгерам, адцягнутым нападаючым, у цэнтры атакі. Да канца чэрвеня ў «вышцы» так і не вызначыўся ніводным балам. Варта сказаць, што за пару месяцаў Салавей толькі пару разоў выходзіў у старце і куды часцей з'яўляўся ў канцоўках сустрэч.
Адзіны станоўчы момант здарыўся 22 чэрвеня, калі ў паядынку 1/16 фіналу Кубка Беларусі з "Астраўцом" форвард згуляў 90 хвілін і голам і "асістам" дапамог камандзе прайсьці далей (2:1).
Пасля надышоў штыль. У чэмпіянаце тры туры запар Салавей не трапляў у заяўку (Ташуеў без канкрэтыкі казаў пра хранічную траўму ў гульца), затым большую частку часу сядзеў на лаўцы. Агульная колькасць гульнявых хвілін з 15 жніўня (ад таго часу, як ізноў пачаў трапляць у заяўку на паядынкі "вышкі") склала ўсяго 120 хвілін за шэсць матчаў. Плюс у кастрычніку згуляў 65 хвілін у 1/8 фіналу Кубка з "Мінскам" (без выніковых балаў).
Па звестках «Трыбуны», у сярэдзіне лета Салавей, незадаволены тым, што працуе на трынероўках на 100 працэнтаў, але ўсё роўна абдзелены гульнявой практыкай, мог сысці з «Шахцёра» ў арэнду. Тым больш паступалі канкрэтныя прапановы, у тым ліку ад лідараў ЧБ. Але кіраўніцтва і трэнерскі штаб не адпусцілі нападаючага, матываваўшы рашэнне тым, што гулец патрэбны камандзе. Ва ўсёй красе гэтая «патрэба» выявілася пры фармаванні складу для ўдзелу ў еўракубках – футбаліст нават не патрапіў у заяўку «гарнякоў». Таму Андрэй прыняў рашэнне заняцца здароўем (адчуваў дыскамфорт з пахвіннымі кольцамі).
Зараз жа адбываецца тое, што павінна было здарыцца яшчэ летась – Салавей пакідае «Шахцёр». Прынамсі да канца сезона ён будзе гуляць у арэндзе.
З'яжджаць з Салігорска не хацеў?
У канцы 2022-га "Шахцёр" узначаліў Аляксей Бага, які ўжо працаваў з камандай раней. І здавалася, што Салавей атрымае новы шанец, каб даказаць здольнасцьі права гуляць у аснове чэмпіёна. Хаця і была інфармацыя пра магчымы пераход у БАТЭ – і пасля нядаўняга кубкавага матчу з Жодзіна такі варыянт быў прымальны для Салігорска, але для БАТЭ было ўжо занадта позна. А раней Бага даваў зразумець, што не зацікаўлены ў сыходзе футбаліста.
- Па-першае, у яго дзейны кантракт з «Шахцёрам». Па-другое, калі і былі нейкія юрыдычныя нюансы, дык гэта не на адзін дзень і не на адно паседжанне. Калі мы ўпершыню пасля адпачынку сабраліся на базе, я пагутарыў з кожным з гульцоў. І намеру з'ехаць з Салігорска ў Салаўя не было. Так што мы да гэтай тэмы нават не вярталіся, - казаў трэнер.
Сам жа футбаліст даваў зразумець, што яму камфортна працаваць з Багай і меў намер змагацца за месца ў складзе. Тым больш у 2023-м Салаўю далі шанец праявіць сябе. Узімку ён прыняў удзел у пяці спарынгах, забіў тры мячы і зрабіў два асісты. Што да афіцыйных матчаў, то двойчы выходзіў у аснове (у Суперкубку згуляў 54 хвіліны, у першым матчы чвэрцьфіналу Кубка адбегаў 88). Але ва ўсіх выпадках - без выніковых балаў. За гульнёй Кубка ў адказ з «Тарпеда-БелАЗ» і за матчам першага тура ЧБ Салавей назіраў ужо з трыбуны - Бага не ўключаў гульца нават у заяўку. Ужо тады, паводле нашай інфармацыі, працэс растання гульца з клубам быў запушчаны.
Па звестках "Трыбуны", у чацвер нападаючы выправіцца ў Паўладар да "Аксу". Каманда ў гэтым сезоне стартавала з нічыёй і двух паражэнняў, зараз займае 10-е месца ў табліцы (розніца мячоў 4:8). Там Андрэй далучыцца да іншага беларуса - брамніка Аляксандра Гутара, які доўгі час знаходзіўся без гульнявой практыкі, але неўзабаве вернецца ў вялікі футбол.
Арэндны кантракт да канца года ў Салаўя - справа найбліжэйшых дзён. Але што здарылася? Чаму нападаючы, які не рваўся з'язджаць з Салігорску, раптам зазбіраў рэчы?
Мог аказацца ў "Славіі", а ў выніку адправіцца ў Казахстан
Паводле інфармацыі "Трыбуны", яшчэ зусім нядаўна Андрэй быў блізкі да пераходу ў "Славію". Іван Біёнчык вельмі моцна хацеў ізноў папрацаваць з футбалістам, быў з ім увесь час на сувязі. Ды і сам форвард пры такой увазе загарэўся жаданнем з'ехаць з Салігорска. Былі ўладжаныя практычна ўсе нюансы. Акрамя галоўнага - фінансавага. Калі форвард падпісваў кантракт з «Шахцёрам», яму далі заробак у раёне 16 тысяч рублёў. Усё ж такі зборнік, ды яшчэ і найлепшы футбаліст Беларусі-2021. Прычым, па ўмовах кантракту, у выпадку паспяховага выступу за "гарнякоў" аклад павінен быў расці з кожным годам. Пагадненне дзейнічае да 31 снежня 2024 года.
Аднак са «Славіяй» Салавей не дамовіўся. Футбаліст не хацеў ісці на істотнае паніжэнне (у два разы) заробку, а мазыране банальна не маглі задаволіць фінансавых запытаў. Разглядаўся нават варыянт, што "Славія" будзе плаціць гульцу столькі, колькі можа, а астатнюю частку дакладзе "Шахцёр". Але гэта "гарнякоў" не задаволіла. У выніку пара Біёнчык - Салавей не ўз'ядналася.
Заставацца ў Салігорску форвард таксама не толькі ўжо не хацеў, але і не мог. Хоць, як нам удалося даведацца, працаваў з максімальнай аддачай, камунікаваў з партнёрамі. Увогуле, знаходзіўся ў стандартным рэжыме і на першы погляд нельга было сказаць, што хутка гулец з'едзе.
Паводле інфармацыі «Трыбуны», зноў-такі ўся справа ў фінансах. Яшчэ летась па ініцыятыве клуба ўзнімалася пытанне пра скасаванне кантракта з гульцом, але пры такім сцэнары патрабавалася заплаціць Андрэю кампенсацыю. "Шахцёр" ісці на гэта не хацеў, а потым увогуле вырашыў пакінуць Салаўя ў сябе і вярнуцца да пытання зімой. Так і атрымалася.
Перад Салаўём, паводле нашых звестак, назапасіліся даўгі. Зарплата закрыты цалкам, а вось прэміяльныя і бонусы - нічога гэтага няма. Салавей расставацца з грашыма, што належылі па кантракце, не захацеў, што і даў зразумець кіраўніцтву клуба. Цяпер абавязкі дырэктара там выконвае Аляксандр Новік, многія пытанні вырашае новы спартыўны дырэктар Дзмітрый Агееў. У адказ на запыты гульца функцыянеры далі яму зразумець, што ніякіх бонусаў і прэміяльных не будзе, бо ён - слабы футбаліст і ўвогуле не заслугоўвае сваіх грошай. Да таго ж Салаўю было сказана ледзь не прамым тэкстам, што калі ён не жадае сядзець у глыбокім запасе, то мусіць знайсці новы клуб. Багу таксама намякнулі, што гулец можа хіба што трэніравацца з асновай, але не болей.
Усё можна было ўладзіць разрывам кантракту. Але "Шахцёр" ізноў не пайшоў на такі крок, каб не плаціць кампенсацыю. Таму адзіны прымальны для Салаўя варыянт - арэнда. Футбаліст, разумеючы, што за грошы можна змагацца доўга, а да таго ж вялікая рызыка застацца на год без футбола, усё ж пагадзіўся на ўмовы клуба і знайшоў сабе месца працы на бліжэйшы сезон - "Аксу" з Казахстана. Самае цікавае, што, паводле інфармацыі «Трыбуны», цікавасць да гульца клуб выяўляў яшчэ ў канцы 2022-га, але Салавей вырашыў застацца ў «Шахцёры».
Цяпер, як нам удалося даведацца, клубы паміж сабой дамовіліся. А ўмовы пагаднення з казахстанцамі ў Салаўя (калі «Аксу» выканае ўсе свае абавязальніцтвы ў поўнай меры) будуць нават лепшыя, чым у Салігорску.
Фота: fcshakhter.by
