Самая эпічная бойка ў ЧБ: на поле лезлі нядаўнія разгоншчыкі пратэстаў, суддзя скончыў (потым даў Шмоліку працаваць п'яным), ад доўгіх банаў адкупіліся
Адзін з удзельнікаў сядзіць за наркотыкі.
Не так даўно «Трыбуне» ўдалося даведацца, што літоўскі экс-варатар Сімас Скіндэрыс, які доўгія гады правёў у ЧБ, атрымаў ад рэжымнага «суда» сем гадоў за кратамі па абвінавачанні, звязаным з наркотыкамі, і ўжо адбывае тэрмін. Пры гэтым былы футбаліст у канцы 2020-га аказаўся фанатам бесчалавечнага гвалту сілавікоў Аляксандра Лукашэнкі – цяпер, хутчэй за ўсё, адчувае падобнае на сабе.
Мабыць, да 2020-га найбольш яскравым эпізодам з жыцця Скіндэрыса быў актыўны ўдзел у самай эпічнай бойцы ў гісторыі ЧБ. Тады рэферы выдаліў з поля траіх футбалістаў (хоць мог з дзясятак), на поле выходзіў АМАП Лукашэнкi, а АБФФ вынесла шмат суровых пакаранняў. Успомнім гэтую гісторыю падрабязней.
Усё ўзарвалася пасля пенальці ў канцоўцы сустрэчы, гасіў страсці выгляд носьбітаў формы Лукашэнкі
Шыльда матчу 28-га тура ЧБ-2004 паміж «Тарпеда-СКА» і «Зоркай-ВА-БДУ» не прадвяшчала нічога агністага. «Студэнты», праўда, яшчэ не выратаваліся ад вылету, а вось «аўтазаводцы» ніякіх турнірных намаганняў ужо не мелі: не маглі ні дагнаць топ-3, ні апусціцца ніжэй за сваё шостае месца.
Аднак у пачатку другога тайма пачалі разгарацца страсці. Гульцы і трэнерскі штаб «Тарпеда-СКА» пачаў выказваць незадаволенасць дзеяннямі арбітра сустрэчы Мікалая Мяцельскага. Гэта вылілася ў жоўтыя карткі для абаронцы-капітана Аляксея Навумава і паўабаронцы Андрэя Доўнара. Праз 25 хвілін Доўнар атрымаў другую жоўтую картку, на гэты раз за грубую гульню, і быў выдалены з поля.
Канчаткова ж палыхнула пасля таго, як Мяцельскі паставіў у вароты «аўтазаводцаў» пенальці пасля фолу Аляксандра Собаля на Віталіі Шапятоўскім. Па відэа рашэнне выглядала бясспрэчным, але тарпедаўцы пайшлі ў атаку на суддзю. Сярод самых актыўных былі Міхаіл Марціновіч, які штурхаў Мяцельскага, Навумаў, Аляксандр Быліна і Дзмітрый Макар. А пакуль гэтая чацвёрка актыўнічала ў адным месцы, Скіндэрыс, які займаў вароты «Тарпеда-СКА», уступіў у канфлікт з гульцамі гасцей. У выніку гульцы сталі штурхацца практычна «сценка на сценку». Убачыўшы гэта, на поле пабег АМАП Лукашэнкі – здаецца, сам ягоны выгляд супакоіў футбалістаў. Дарэчы, ніводзін з іх за гэты час не атрымаў нават жоўтай карткі.
Пасля таго, як страсці згаслі, хаўбек «студэнтаў» Канстанцін Якубоўскі аформіў з «кропкі» адзіны гол у матчы.
Але надоўга спакою гульцоў каманд не хапіла. Ужо праз хвіліну Юрый Пракопчык у цэнтры поля ўляцеў у Быліну, чым пачаў другі раўнд бойні на стадыёне «Тарпеда». Актыўнічалі ўсё тыя ж: Марціновіч уляцеў Пракопчыку з калена ў жывот, Макар штурхнуў суперніка ў спіну, Навумаў схапіў аднаго з гульцоў за шыю, Скіндэрыс прыбег на разборкі з варот. Але тут рэжымны АМАП выйшаў на поле практычна адразу, з-за чаго бойка маштабнай не атрымалася (яшчэ і юныя фанаты каманд не адважыліся прарывацца «на падмогу»). Мяцельскі паказаў чырвоныя карткі Пракопчыку, Быліну і Скіндэрысу.
А пасля фінальнага свістка, як пісаў «Прессбол», «раз'юшаныя тарпедаўцы на чале з настаўнікам зладзілі суддзі сакавіты вербальны «авертайм». Рэферы ж пакінуў у пратаколе запіс, што яго ў нецэнзурнай форме абражалі Навумаў і галоўны трэнер «Тарпеда-СКА» Сяргей Падпалы.
Рэжымнаму АМАПу «не ўдалося адпачыць» ад разгону пратэстаў
Праз некалькі дзён пасля матчу ў «БелГазеце» выйшаў невялікі матэрыял пра паядынак з каментарыямі ад галоўных трэнераў каманд. Цікавіліся ў іх у асноўным пра бойку і ўплыў на гэты эпізод з боку арбітра. Але Падпалы пачуў ад журналіста яшчэ і іранічнае пытанне – ці не шкада трэнеру АМАП Лукашэнкі, які «нядаўна ў поце папрацаваў на апазіцыйных дэманстрацыях, а цяпер яму і на футболе адпачыць не ўдалося». Коўч сур'ёзна адказаў, што рэжымныя носьбіты формы «ніякага актыўнага ўдзелу ў бойцы не прымалі, хлопцы разыходзіліся без старонняй дапамогі».
Гаворка ж ішла пра тое, што за тыдзень да гульні рэжым сваім тыповым гвалтам разганяў мірныя пратэсты ў Мiнску. Цяпер здаецца, што на іх выйшла зусім няшмат людзей – незалежныя назіральнікі налічылі не больш за тры тысячы. Матываваў іх пайсці на вуліцы рэферэндум, якім Лукашэнка перакрэсліваў беларускую канстытуцыю і дазваляў сабе ісці на прэзідэнцкія выбары не двойчы, а бясконцую колькасць разоў. Праваабарончы цэнтр «Вясна» тады заявіў пра «поўную неадпаведнасць афіцыйных вынікаў выбараў і рэферэндуму сапраўднаму волевыяўленню беларускага народа» (лукашэнкаўскі ЦВК «налічыў» 87,97% тых, хто прагаласаваў «за»). А пазней Мікола Статкевіч і Павал Севярынец атрымалі ад рэжымнага «суда» па два гады «хіміі» за нібыта «арганізацыю масавых беспарадкаў». Цяпер яны таксама палітвязні, а рэжым зноў адмаўляе наяўнасць палітвязняў у прынцыпе.
У АБФФ вынеслі суровыя пакаранні і гульцам, і клубам, і суддзі
КДК АБФФ пасля матча вынес удзельнікам бойкі на футбольным полі вельмі суровыя пакаранні. Гульцы «Тарпеда-СКА» Скіндэрыс і Марціновіч, а таксама капітан «Зоркі-ВА-БДУ» Ігар Квяткоўскі атрымалі па дзесяць гульняў дыскваліфікацыі за ўдар суперніка па твары, Быліна – столькі ж за ўдар па твары і плявок. Капітану «аўтазаводцаў» Аляксею Навумаву далі восем гульняў за ўдар па твары плюс мат у адрас арбітра. Собаль з «Тарпеда-СКА» і Юрый Пракопчык з «Зоркі-ВА-БДУ» атрымалі па сем матчаў за наўмысныя ўдары супернікаў, за гэта ж па пяць гульняў далі тарпедаўцу Макару і «студэнту» Уладзіславу Пяткевічу. Зрэшты, у выніку ніхто не прапусціў больш за пяць гульняў – астатнія ў пачатку 2005-га замянілі на штрафы з разліку 25 базавых велічынь (тады прыкладна 278 долараў) за кожны «дараваны» матч.
Акрамя таго, каманды панеслі і грашовы штраф: «Тарпеда-СКА» павінен быў выплаціць 10 тысяч еўра, «Зорка-ВА-БДУ» – 5 тысяч. Але «студэнты» не заплацілі нават у падоўжаны АБФФ тэрмін – і ў выніку сума падвоілася.
Галоўны трэнер «Тарпеда-СКА» Сяргей Падпалы за «неэтычныя і некарэктныя паводзіны» у адрас Мяцельскага быў дыскваліфікаваны на тры гульні.
Пакаранне было і ў дачыненні да арбітра Мікалая Мяцельскага і інспектара Віктара Кавалёва – іх адхілілі да канца сезона (там заставалася ўсяго два туры), але адзначылі «сур'ёзныя памылкі» суддзі і рэкамендавалі падумаць, ці трэба далей даваць гэтым людзям прызначэнні на матчы. Па выніку Мяцельскі ў вышэйшай лізе больш не судзіў. Праўда, неўзабаве сам стаў інспектарам. На гэтай пасадзе ён працаваў да лета 2008-га, пакуль не атрымаў пажыццёвую дыскваліфікацыю за працу на матчы «Віцебска» і «Нафтана» – тым самым, дзе галоўны арбітр сустрэчы Сяргей Шмолік працаваў п'яным. Мяцельскага абвінавацілі ў тым, што ён не зняў арбітра з матча ні перад стартавым свістком, ні ў перапынку.
Вiдэа: Sport. Past Perfect
