Трэнер з Беларусі магутна працуе ў Казахстане: змагаецца з «Астаной» за золата, выйшаў у фінал Кубка, у яго цягнуць тыя, каго вы добра ведаеце па ЧБ
Час Сяднёва?
Беларускіх спецыялістаў у замежных чэмпіянатах сёння няшмат, але некаторыя паказваюць прыстойныя вынікі. Віктар Ганчарэнка ў жніўні мінулага года вярнуўся ва «Урал», які пачаў сезон з чатырох паражэнняў і адной нічыёй, – і здолеў пакінуць каманду ў элітным дывізіёне, выдаўшы з верасня па сакавік серыю з 16 матчаў без паражэнняў (11 перамог і 5 нічыіх). Акрамя таго клуб з Екацерынбурга дайшоў да паўфіналу Кубка Расіі.
Арцём Булойчык працуе ў штабе Сяргея Ігнашэвіча ў «Балтыцы» (Калінінград) і дапамог камандзе ўпершыню за 25 гадоў выйсці ў РПЛ. У клубе ён адказвае за стандарты, і са сваёй задачай добра спраўляецца: 13 мячоў (то бок чвэрць галоў) «Балтыка» забіла са стандартных палажэнняў.
А Аляксей Шпілеўскі ў першы свой паўнавартасны сезон у «Арысе» (Лімасол) узяў першае для клуба золата ў гісторыі, стаўшы заадно найлепшым трэнерам чэмпіянату Кіпра.
Адразу двое нашых суайчыннікаў узначальваюць клубы ў чэмпіянаце Казахстана. Віталь Жукоўскі са сваім «Атырау» пасля першай паловы сезона ідзе на сёмым месцы ў чэмпіянаце. Плюс да ўсяго «зялёна-белыя» дабраліся да паўфіналу Кубка, але там у двухматчавым супрацьстаянні саступілі «Таболу» (0:1, 0:1). У другога беларуса справы складаюцца куды лепш – Аляксандр Сяднёў і яго «Ардабасы» прэтэндуюць на два трафеі, а хутка яшчэ і стартуюць у еўракубках.
Лідаруе ў чэмпіянаце і прызнаваўся калегамі трэнерам месяца
Гэты сезон ужо трэці для 49-гадовага спецыяліста ў Шымкенце. Два папярэднія каманда заканчвала з беларусам на пятым месцы, зараз сурʼёзна разлічвае на золата. За 15 матчаў чэмпіянату «Ардабасы» саступіў толькі раз – у чацвёртым туры дзейнаму чэмпіёну «Астане» (0:2). З тых часоў «паўднёўцы» правялі ў КПЛ 11 сустрэч без параз, у дзевяці з іх перамаглі. У траўні (чатыры перамогі ў чэмпіянаце і адна ў Кубку) Сяднёў быў прызнаны найлепшым трэнерам лігі. Прычым выбіралі трэнеры чэмпіянату: за кандыдатуру беларускага спецыяліста прагаласавалі 9 калегаў з 13. Адметна, што другое месца ў апытанні заняў Жукоўскі.
Пасля нядаўняй выязной перамогі над «Акжэтпесам» (4:0) «Ардабасы» зноў вярнуў сабе першае месца, але пакуль дзеліць яго з «Астаной»: у калектываў па 38 пунктаў, але шымкентцы маюць матч у запасе. Пры гэтым і «Ардабасы», і «Астана» ідуць з відавочным пераборам балаў: чаканая колькасць пунктаў (xPTS) у першых 29,9, у другіх – 32,8.
Другі год запар згуляе ў фінале Кубка
Летась з «Ардабасы» Сяднёў узяў першы трафей у трэнерскай карʼеры. У фінале Кубка супраць «Акжайыка» асноўны час скончыўся нічыёй 4:4, а ўжо напрыканцы другога экстратайму перамогу шымкентцам прынёс дакладны ўдар Эльхана Астанава з пенальці – другі трафей у гісторыі клуба.
У гэтым годзе «бела-сінія» блізкія да паўтарэння поспеху. Яны па чарзе прайшлі «Мактаарал» (1:2, 4:1), «Кызыл-Жар» (2:0, 0:1) і «Астану» (0:1, 2:0) – у фінале, які пройдзе 4 лістапада, трэба гуляць з «Таболам», які выбіў «Атырау» Жукоўскага.
Леташняя перамога ў Кубку адкрыла камандзе дарогу ў Еўропу. «Ардабасы» трапіў у другі кваліфікацыйны раунд Лігі Канферэнцый, дзе чакае варшаўская «Легія».
У яго забіваюць адразу чатыры экс-гульцы «Энергетыка-БДУ»
На заўважных ролях у камандзе добра нам знаёмыя па вышэйшай лізе Беларусі футбалісты. Прычым уся чацвёрка экс-гульцоў ЧБ зрабіла сабе імя ў «Энергетыку-БДУ».
Найлепшы бамбардзір «вышкі»-2022 Бабур Абдыхолікаў не забівае ў такіх жа абʼёмах, як у Беларусі, але ўсё роўна ідзе ў топ-3 найлепшых снайпераў лігі – на ягоным рахунку шэсць галоў у 15 матчах чэмпіянату, а таксама адзін мяч у шасці гульнях Кубка (адзнака 1:26).
Добры сезон праводзіць 26-гадовы беларускі форвард Усевалад Садоўскі. У нападаючага, які гуляў у Сяднёва яшчэ ў «Руху», чатыры галы ў 14 матчах чэмпіянату, а таксама два галы ў шасці гульнях Кубка. Беларус ідзе на пятым месцы ў лізе па колькасці ўдараў (у пераразліку на 90 хвілін у яго ў сярэднім 3,36 удару), а таксама ў топ-10 па колькасці ўдараў галавой (7) (адзнака 5:43).
Шахбоз Умараў у 19 матчах чэмпіянату і Кубка выбіў 4+2, прычым ягоны гол у другім кубкавым паядынку супраць «Астаны» (2:0) перавёў матч у дадатковы час, дзе «Ардабасы» даціснуў суперніка (адзнака 7:02).
Уладзіслаў Васільеў, які таксама гуляў у «Руху» Сяднёва (а яшчэ браў чэмпіёнскі тытул з брэсцкім «Дынама»), у «Ардабасы» гулец ратацыі: паўдзельнічаў у 8 з 15 матчаў чэмпіянату (6 разоў выходзіў у старце) і адзначыўся толькі адным голам, затое важным – прынёс перамогу ў матчы супраць «Аксу» (адзнака 3:04).
