Разбіраем усе галы ў вароты БАТЭ ў матчы з «Балкані»: хто недапрацаваў, хто прывёз і што можна сказаць пра Хадаркевіча з Банэ

24 жніўня БАТЭ правёў чарговы матч у еўракубках – і зноў атрумаў разгромную паразу. У плей-оф кваліфікацыі Лігі канферэнцый барысаўцы ў гасцях саступілі чэмпіёну Косава «Балкані» 1:4. Прапускаць не менш за чатыры мячы ў Еўропе – гэта нейкая традыцыя для сённяшняга БАТЭ. У апошніх сямі матчах супернікі засмуцілі барысаўцаў 23 разы. «Трыбуна» на ўмовах ананімнасці папрасіла аднаго з абаронцаў чэмпіянату Беларусі разабраць моманты з галамі ў вароты БАТЭ і растлумачыць галоўныя памылкі «жоўта-сініх».

10-я хвіліна. Уладзіслаў Малькевіч зрабіў мяккі закід на Дзяніса Лапцева ў штрафную, нападаючы, нягледзячы на апеку супернікаў, здолеў апрацаваць мяч і з лёту патрапіць у вароты

- Па-першае, адзначу, што перадача на Дзяніса атрымалася добрая. Ды і форвард чакаў паса, адчыняўся пісьменна. Тэхніка і майстэрства дазволілі адкрыць лік. Лічу, гэты гол – практычна цалкам заслуга гульцоў БАТЭ, а не віна абаронцаў «Балкані».

31-я хвіліна. Лорэнц Трашы падае з кутнюю на лінію варатарскай, адкуль Байрам Яшаніца ўдарам галавой адправіў мяч у далёкі кут брамы Андрэя Кудраўца

- На самай справе тут усё проста. БАТЭ банальна прайграў барацьбу ў паветры. Таму ж Хадаркевічу трэба было ісці на мяч, а не чакаць, пакуль ён прыляціць. У выніку Яшаніца выйграў барацьбу ў абаронцаў (у прыватнасці, у Руслана) і забіў. Усё відавочна.

Пры гэтым гульцы БАТЭ размяшчаліся правільна, тут прэтэнзій няма. Проста Хадаркевіч не бачыў футбаліста, які выбягаў з-за спіны. Як ужо казаў, абаронцу трэба было самому ісці на мяч, а не чакаць.

58-я хвіліна. Арменд Тачы выканаў падачу са штрафнога ад левага фланга, мяч прыляцеў на далёкі кут варатарскай, адкуль галавой прабіў Блеарт Таляй. Мяч уляцеў у сетку рыкашэтам ад штангі

– Тут ужо прадушылі Банэ. Нічога звышнатуральнага: проста чарговы паказнік, як касавары пісьменна дзейнічаюць на «стандартах». Падача, Банэ прайграў барацьбу ўверсе, ну і Блеарт галавой адправіў мяч у сетку. Паўтаруся, афрыканец ушчэнт прайграў эпізод.

66-я хвіліна. Атака «Балкані» па флангу, навес Тачы ў цэнтр штрафной, мяч трапляе да Таляя, і ён, нягледзячы на апеку Руслана Хадаркевіча і Данілы Нячаева, прабівае з разваротам па цэнтры варот і забівае

- Тут я адразу задаюся пытаннем, чаму Хадаркевіч быў высока, а не ў лінію з Банэ і Нячаевым. Куды ён пайшоў, навошта? Добра, пайшоў, але нават у такім выпадку Банэ трэба было дзейнічаць па гульцу, у цэнтры штрафной. Аднак важна разумець, што афрыканскія футбалісты, будзем шчырымі, дрэнна навучаныя тактычна, у гэтым плане з імі трэба шмат працаваць. Атрымалася так, што Банэ проста глядзеў на мяч, сачыў за развіццём сітуацыі з боку. Памыліўся і Нячаеў. Яму трэба было ісці на суперніка, кідаць свайго апанента на флангу і дапамагаць у цэнтры. Тым больш Хадаркевіч страціў пазіцыю, не паспяваў вярнуцца. Увогуле, тут насамрэч памыліўся шмат хто, ледзь не ўся абарона.

89-я хвіліна. Гульцы «Балкані» разыгрываюць кутні, Тачы падае з флангу, і мяч, нікога не зачапіўшы, трапляе ў далёкі кут брамы

- Ізноў «стандарт». Гэты кампанент, відавочна, у «Балкані» вельмі добра адпрацаваны, найграны. Выдатная падача, Тачы застаўся на флангу адзін і ўдарыў максімальна нязручна для брамніка – мяч ішоў па сыходнай. У гэтым моманце, думаю, Хадаркевіч мог зрушыцца правей, паспрабаваць неяк выбіць мяч, накрыць апанента. Але ён застаўся, па сутнасці, на месцы. А падача, яшчэ раз адзначу, была вельмі класная.

Таксама мы звярнулі ўвагу суразмоўцы на некалькі іншых небяспечных момантаў у матчы, якія ледзь-ледзь не прывялі да галоў у вароты БАТЭ.

7-я хвіліна. БАТЭ праваліўся на правым флангу. Малькевіч упусціў апанента, і той увайшоў у штрафную і з вострага вугла небяспечна прабіў

- Відаць, што правы абаронца Уладзіслаў Малькевіч банальна праспаў «сценачку», супернік пісьменна разыграў камбінацыю. Беларусу трэба было прачытаць «сценку», неяк звузіць прастору для перадачы. Плюс трэба заўважыць, што Малькевіча ніхто не страхаваў. Адзначу памылку Валерыя Бачарова. Ён пры розыгрышы суперніка мог падстрахаваць Малькевіча.

Таксама лічу, што ў гэтым эпізодзе Хадаркевічу трэба было высоўвацца на гульца «Балкані» крыху раней, а не стаяць з рукамі за спінай і чакаць, патрапіць у яго мяч ці не. Трэба было скарачаць адлегласць, ісці на апанента, тады момант быў бы не такі небяспечны. Можа, і ўдару не здарылася б.

14-я хвіліна. Недалёка ад цэнтру поля БАТЭ страціў мяч і дазволіў «Балкані» правесці контратаку. З краю штрафной адбыўся прастрэл у цэнтр, удар – мяч патрапіў у абаронцу

- БАТЭ спрабаваў выйсці ў атаку, але недалёка ад цэнтру поля супернік накрыў, мне здаецца, Бачарова. «Балкані» пачаў хуткую контратаку, але ў дадзеным эпізодзе барысаўскія абаронцы, лічу, дзейнічалі правільна. Яны звужалі прастору, не давалі магчымасці для манеўру. Адзінае, абаронца, які дзейнічаў злева ў БАТЭ, мог прачытаць забяганне апанента і крыху раней высунуцца на мяч, каб зусім перапыніць перадачу.

61-я хвіліна. Атака «Балкані», барысаўцы прайграюць барацьбу ў цэнтры поля, пасля чаго ідзе праход па флангу і ўдар вышэй за браму

- «Балкані» пачынаюць свой напад розыгрышам ад варот, у цэнтры поля барацьбу суперніку прайграе Жымо. Афрыканца банальна праціснулі. Відавочная памылка Жымо. Ты – левы абаронца, бачыў, што на тваім флангу ёсць гульцы «Балкані». Калі не быў упэўнены на 100 працэнтаў, што выйграеш барацьбу ў апорнай зоне, не трэба было вылучацца. А афрыканец пайшоў і прайграў. Трэба было аддаць апорную зону профільнаму гульцу, а не кідаць свой фланг. У выніку прайграў у цэнтры поля, даў суперніку прайсці па краі. Пашанцавала, што ўдар прыйшоўся вышэй за браму. Але і Банэ ў цэнтры абароны дзейнічаў не зусім пісьменна – проста чакаў, што зробіць супернік, а не сустракаў яго. Тым не менш галоўная віна ў тым, што такі момант наогул узнік, на Жымо. Паўтаруся, ён страціў сваю зону, прайграў барацьбу ў цэнтры і дазволіў шмат зрабіць суперніку.

А яшчэ я звярнуў увагу, што калі Жымо змагаўся, яму ўвогуле не дапамагаў апорны паўабаронца Валерый Бачароў, ніяк не імкнуўся пазмагацца. Проста назіраў збоку. А потым паглядзіце, у якім тэмпе ён і іншы «апорнік» вярталіся да брамы Кудраўца. Таксама вельмі паказальна.

62-я хвіліна. Абаронца «Балкані» робіць доўгі пас наперад праз цэнтральную зону, мяч даходзіць да нападаючага, які рухаецца наперад, але Хадаркевіч і Банэ паспяваюць накрыць апанента – афрыканец выбівае мяч на кутні

- Тут наогул і «апорнікі», і цэнтральныя абаронцы згулялі вельмі дрэнна. У цэнтры поля трэба было гуляць вузей, каб перадача проста не прайшла. Але футбалісты расцягнуліся па флангах, выпусцілі прастору. А два цэнтральныя абаронцы памыліліся ў тым, што, першапачаткова разабраўшы гульцоў, цэнтральнага нападаючага ўвогуле не трымалі. Мне здаецца, ім тут банальна ніхто не падказаў, што ёсць форвард без нагляду. А яны і не заўважылі яго. Банэ накрываў правага нападаючага, Хадаркевіч – левага, а ў цэнтры застаўся адзін гулец «Балкані», зусім непрыкрыты. Ну і не забываем пра тое, што далёка не лепшым чынам згулялі апорныя паўабаронцы, якія ў прынцыпе дазволілі перадачы пайсці.

З іншага боку, у гэтым жа эпізодзе хачу пахваліць Банэ. Ён здолеў уратаваць вароты за кошт хуткасці. Зразумеў, што форвард «Балкані» не такі спрытны, як здавалася, нагнаў яго і здолеў выбіць мяч за лінію.

Якія ўражанні і якія чаканні ад матчу ў адказ?

- У гэтай гульні ўсё вырашылі «стандарты». Бачна, што «Балкані» найгравалі гэты кампанент перад матчам. Так, удавалася праціскаць апанента, але недзе касавары самі памыляліся ў завяршэнні, недзе, як у адным з эпізодаў, страхаваў Банэ. У выніку ўсё ўдалося вырашыць з дапамогай стандартных становішчаў. Што да БАТЭ, то, як бачым, каманда добра кантралюе мяч, у прынцыпе, дзейнічае пісьменна, але калі суперніку ўдаецца зладзіць контратаку, то, мякка кажучы, «жоўта-сінія» выглядаюць не вельмі прывабна.

- Пра што кажа такая вялікая колькасць мячоў, што прапушчаныя са «стандартаў»? Няўжо БАТЭ не адпрацоўвае гэты элемент на трэнаваннях?

- Шчыра, цяжка тут нешта каментаваць, бо не ведаю, колькі ўвагі гэтаму кампаненту надаюць у БАТЭ. А памылкі здараліся і будуць здарацца ва ўсіх.

- Шмат крытыкі ляціць у адрас абаронцы Банэ, з-пад якога ў гэтым сезоне заляцела нямала мячоў і ў чэмпіянаце Беларусі, і ў еўракубках. Што скажаце пра афрыканца?

- Так, з-пад Банэ шмат забіваюць, гэта факт. Але я ўсё роўна лічу, што гэта неблагі абаронца, проста ён шмат памыляецца тактычна. Калі прыбраць гэтыя моманты, то ўсё будзе добра.

Калі я сам гуляў з афрыканцамі, адзначаў, што ў гэтым плане (менавіта па тактыцы), яны дзейнічаюць не лепшым чынам, не заўсёды надзейныя. Калі гульцы з Афрыкі прыязджалі ў клубы, дзе я выступаў, ім патрабаваўся час, каб прывыкнуць да футбола, неяк абвучыцца тактычна. І тады ўжо ўсё атрымлівалася. Плюс, вядома, важна разумець мову, каб камунікаваць з партнёрамі. Калі яны не ведаюць мову, на полі часам губляюцца.

Пры контратаках «Балкані» футбалісты БАТЭ ззаду не падказвалі адзін аднаму. Той жа Хадаркевіч, мне здаецца, мусіў больш камунікаваць з калегамі. Ён – дасведчаны цэнтральны абаронца, і павінен быў кіраваць апорнымі паўабаронцамі, гульцамі абароны. Ды ўсёй абаронай, можна сказаць. Але не рабіў гэтага.

- Хадаркевіч зʼявіўся ў БАТЭ зусім нядаўна, але адразу стаў гуляць у старце. Як лічыце, ён паспеў згуляцца з партнёрамі?

- Мне здаецца, тут не варта казаць аб адсутнасці або наяўнасці зладжанасці з партнёрамі ў Барысаве. Як мы памятаем, Хадаркевіч у прынцыпе даўно не гуляў, у «Дынама» не меў практыкі. Перайшоў у БАТЭ, які гуляе ў чэмпіянаце Беларусі з пазіцыі сілы, і памылак у футбаліста там няшмат. А вось у еўракубках ужо праяўляецца доўгі прастой. Але Кірыл Альшэўскі вырашыў паступіць так – паставіць гульца ў аснову... Яго права.

Пры гэтым я не хацеў бы казаць, што ва ўсіх прапушчаных мячах вінаватая толькі абарона БАТЭ. Абарона, як кажуць, пачынаецца зверху. Крайнія хаўбекі таксама мусяць удзельнічаць у адборы. Але па эпізодах бачна, што яны не ішлі ў барацьбу, пакідалі цэнтральных абаронцаў адных супраць апанентаў. Часам гульцоў абароны БАТЭ было нават менш, чым гульцоў атакі «Балкані». Увогуле, недапрацавалі не толькі абаронцы, але і хавы, а таксама апорныя паўабаронцы, якія гулялі, як мне здаецца, залішне шырока. У выніку ўсё вылілася вось у такую буйную паразу.

Ды і справа ж не толькі ў канкрэтных выканаўцах. Важна разумець, што ва ўсіх беларускіх каманд не было перад сезонам матчаў з замежнымі камандамі, зноў ніхто не ездзіў на зборы за мяжу, дзе можна было б правесці спарынгі, адчуць узровень хаця б расійскіх калектываў. Усе гулялі супраць знаёмых апанентаў. Вось і вынік.

- Як лічыце, БАТЭ гуляў бы больш надзейна, калі б за каманду ў гэтым сезоне выступалі тыя, хто вымушаны быў скончыць з футболам праз «чорныя спісі»? Маю на ўвазе найперш абаронцу Максіма Бардачова і паўабаронцу Станіслава Драгуна.

- Тут нават няма чаго адказваць, усё вельмі відавочна. БАТЭ, асабліва ў апорнай зоне і ў цэнтры абароны, яўна не хапае такіх вопытных гульцоў, як Макс і Стас.

- Якія чаканні ад матчу БАТЭ з «Балкані» ў адказ?

- Усё можа быць, як у другім матчы з «Шэрыфам». БАТЭ будзе імкнуцца рэабілітавацца пасля паразы, будзе дзейнічаць больш пісьменна, улічыць усе памылкі. Тыя ж «стандарты» гульцы адпрацуюць на трэнаваннях. Паспрабуюць забіць хуткі мяч, каб выправіць сітуацыю. Думаю, БАТЭ можа перамагчы з мінімальным лікам або з розніцай у два мячы, але прайсці ў групу будзе вельмі цяжка.