Трэнер зборнай Беларусі Васільеў пра спаборніцтвы з расіянамі: «Нас там не жадаюць. Нас дапусцілі па-за конкурсам на два турніры ў лімітаваным складзе – падачка нейкая. Проста кінулі костку»

Галоўны трэнер зборнай Беларусі па фігурным катанні Алег Васільеў расказаў пра допуск беларускіх фігурыстаў да спаборніцтваў у Расіі.

– Сёння прыйшла інфармацыя, што адзін з лідэраў Германіі сказаў, што «мы не будзем выдаваць візы спартсменам, якія едуць з Расіі і Беларусі на міжнародны старт». Таму вельмі шмат падводных камянёў. Самі функцыянеры міжнароднага саюза канькабежцаў гэта разумеюць, але на іх аказваецца вялікі ціск з палітычных бакоў розных. Ёсць адзін маленькі нюанс: у радзе ISU сярэдні ўзрост людзей, якія там засядаюць, набліжаецца да 80 гадоў. Людзі ў такім узросце не прымаюць крытычных рашэнняў, а імкнуцца абыходзіцца нейкімі больш спакойнымі і нейтральнымі заявамі.

Таму ёсць плюсы, ёсць мінусы. Ёсць плюсы ў тым, што нас сапраўды хочуць бачыць, таму што шэраг спаборніцтваў без расійскіх фігурыстаў страціў сваю прывабнасць, – губляюцца спонсары, губляецца тэлевізійная карцінка, губляецца глядач.

– Ці чакаюць нас расійскія фігурысты да сябе на турнір?

– Адказ будзе сумным – не. Нас там не хочуць, нягледзячы на тое, што міністры нашых краін – Матыцын і Кавальчук – дамовіліся аб тым, што правільна і добра падтрымліваць адзін аднаго ў гэты складаны момант, даваць спартсменам магчымасць спаборнічаць на тэрыторыі сумежных дзяржаў. Але далёка не ўсе федэрацыі, у прыватнасці федэрацыя фігурнага катання Расіі, гатовы да гэтага.

З вуснаў Аляксандра Ільіча Когана (генеральны дырэктар Федэрацыі фігурнага катання Расіі – Tribuna.com) я чуў фразу, што «ў нас сваіх фігурыстаў у краіне дастаткова, нам бы іх забяспечыць усімі стартамі і нам пра іх трэба клапаціцца, каб яны раслі і развіваліся. А беларускія фігурысты – давайце самі старайцеся». Гучыць, вядома, не вельмі добра, але з гэтым нічога мы не можам зрабіць: ні мы, ні міністэрства спорту.

Увесь гэты сезон мы правялі проста ў просьбах аб тым, каб нас дапусцілі. Нас дапусцілі па-за конкурсам на два турніры ў вельмі лімітаваным складзе. З аднаго боку, нібыта нас дапусцілі, з другога боку, гэта была як падачка нейкая. Проста кінулі костку, – заявіў Васільеў.

Нагадаем, што міжнародны саюз канькабежцаў (ISU) адхіліў прадстаўнікоў Беларусі і Расіі ад спаборніцтваў пад сваёй эгідай у адказ на вайну, якая з 24 лютага 2022 года працягваецца Расіяй ва Украіне з выкарыстаннем тэрыторыі Беларусі.

28 сакавіка 2023-га МАК аб'явіў, што з гэтага моманту рэкамендуе дапускаць да міжнародных спаборніцтваў беларускіх і расійскіх індывідуальных атлетаў у нейтральным статусе, калі такія спартсмены не дапускалі «актыўнай падтрымкі» вайны ва Украіне, а таксама не маюць кантракта з ваеннымі або сілавымі ведамствамі Беларусі ці Расіі.